ជំនួបសម្ដែងការគួរសម និងពិភាក្សាការងារជាមួយក្រុមហ៊ុន DSV Air & Sea Co., Ltd. ដើម្បីស្វែងយល់បន្ថែមពីឱកាសវិនិយោគលើវិស័យហេដ្ឋារចនាសម្ព័ន្ធដឹកជញ្ជូន និងឡូជីស្ទីក នៅកម្ពុជា ទីស្ដីការក្រសួង៖ នាថ្ងៃព្រហស្បតិ៍ ទី៣១ ខែតុលា ឆ្នាំ២០២៤ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញទទួលជួបសម្ដែងការគួរសម និងពិភាក្សាការងារជាមួយប្រតិភូក្រុមហ៊ុន DSV Air & Sea Co., Ltd. ដឹកនាំដោយលោក SHINODA Ryo ដើម្បីស្វែងយល់បន្ថែមពីឱកាសវិនិយោគលើវិស័យហេដ្ឋារចនាសម្ព័ន្ធដឹកជញ្ជូន និងឡូជីស្ទីកនៅកម្ពុជា ដោយមានការអញ្ជើញចូលពីឯកឧត្តមជាថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។ ជំនួបពិភាក្សានេះធ្វើឡើងក្នុងគោលបំណងដើម្បីសិក្សាស្វែងយល់ពីឱកាសដ៏មានសក្កានុពលក្នុងការសហការ និងវិនិយោគលើវិស័យហេដ្ឋារចនាសម្ព័ន្ធ ដឹកជញ្ជូន និងឡូជីស្ទីក ជាពិសេសវិស័យដឹកជញ្ជូនផ្លូវទឹកនៅកម្ពុជា។ ឯកឧត្តម រដ្ឋលេខាធិការ បានលើកឡើងពីបច្ចុប្បន្នភាព នៃការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូនសំខាន់ៗមួយចំនួន ដែលក្រសួងបាន និងកំពុងអនុវត្ត រួមមានផ្លូវថ្នល់ ផ្លូវទឹក ផ្លូវដែក និងឡូជីស្ទីក ដែលមានកំណត់ក្នុងផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដែលបានរួមចំណែកយ៉ាងសកម្មដល់ការអភិវឌ្ឍសេដ្ឋកិច្ចកម្ពុជាឱ្យកាន់តែមានការរីកចម្រើន។ ជាមួយគ្នានោះដែរ ក្រុមហ៊ុន DSV Air & Sea Co., Ltd. បានសម្តែងចំណាប់អារម្មណ៍យ៉ាងខ្លាំងចំពោះឱកាសសហការ និងវិនិយោគលើវិស័យដឹកញ្ជូនផ្លូវទឹកនេះនៅកម្ពុជា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube