បច្ចុប្បន្ន ភ្នំពេញមានស្ពានអាកាសចំនួន៩ បាននិងកំពុងលេចរូបរាងឡើង ដោយមានទាំងកំពុងចររាចរណ៍ និងកំពុងស្ថិតក្នុងការសាងសង់នៅឡើយ ខណៈស្ពានទាំងនោះមានតម្លៃខ្ទង់លានដុល្លារ។១.ស្ពានអាកាសក្បាលថ្នល់៖ ស្ពានអាកាសក្បាលថ្នល់ជាស្ពានអាកាសដំបូងគេនៅភ្នំពេញ និងនៅប្រទេសកម្ពុជា បានបើកសម្ពោធដាក់ឱ្យប្រើប្រាស់ កាលពីថ្ងៃទី២៤ ខែមិថុនា ឆ្នាំ២០១០ មានបណ្ដោយ ៣០៨ ម៉ែត្រ ទទឹង ១៤,២ ម៉ែត្រ សាងសង់ដោយក្រុមហ៊ុន OCIC លោកអ្នកឧកញ៉ា ពុង ឃាវសែ ចំណាយថវិកាអស់ ៦,៤លានដុល្លារ។២.ស្ពានអាកាស ៧មករា៖ ស្ពាននេះ មានបណ្តោយប្រវែង ៣៤៥ ម៉ែត្រ ទទឹង ១៥,២០ ម៉ែត្រ លើមហាវិថីសហព័ន្ធរុស្ស៊ី សាងសង់ដោយក្រុមហ៊ុន OCIC ចំណាយថវិកាជាង ៨,៧ លានដុល្លារ។៣.ស្ពានអាកាសស្ទឹងមានជ័យ៖ ស្ពាននេះសម្ពោធដាក់ឱ្យប្រើប្រាស់ កាលពីថ្ងៃទី៣១ ខែកក្កដា ឆ្នាំ២០១៤មានប្រវែងសរុប ១.១៣៤ ម៉ែត្រ និងផ្លូវវាងក្រោមដី ប្រវែង ៤៨៧ ម៉ែត្រ ទទឹងជាង ៦ ម៉ែត្រ។ ស្ពានអាកាសស្ទឹងមានជ័យ ចំណាយថវិកាសាងសង់ប្រមាណ ១៨,៩ លានដុល្លារអាមេរិក។៤.ស្ពានអាកាសតិចណូ ឬ ស្ពានអាកាស ៥មករា៖ ជាស្ពានអាកាសស្របនឹងមហាវិថីសហព័ន្ធរុស្ស៊ី ក្នុងខណ្ឌទួលគោក រាជធានីភ្នំពេញ មានតម្លៃជាង ១៤,៥ លានដុល្លារអាមេរិក។៥.ស្ពានអាកាសផ្សារដីហ៊ុយ ៖ ស្ពាននេះមានប្រវែង៩៤២ម៉ែត្របណ្តោយ ៩០៥ម៉ែត្រ ទទឹង១៦.៥ម៉ែត្រ ស្ថិតនៅប្រសព្វរវាងមហាវិថីសហព័ន្ធ រុស្ស៊ី និងផ្លូវហាណូយ (១០១៩)។ស្ពាននេះ ចំណាយការសាសង់ប្រមាណ១៧លានដុល្លារ។៦.ស្ពានអាកាស និងផ្លូវក្រោមដីចោមចៅ៖ ផ្លូវក្រោមដីនេះជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហព័ន្ធរុស្ស៊ី មានប្រវែងសរុប ៤៧០ម៉ែត្រ ទទឹង៨,៥ម៉ែត្រ សម្រាប់ចរាចរមួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។ ស្ពានអាកាសមួយនេះ សាងសង់ឡើងដោយក្រុមហ៊ុន OCIC ចំណាយថវិកាជាង២២លានដុល្លារ។៧.ស្ពានអាកាសឫស្សីកែវ៖ ស្ពានអាកាសនេះ មានបណ្តោយសរុបប្រវែង ៤៨៣ម៉ែត្រ បណ្តោយស្ពានអាកាស ១៤៥ម៉ែត្រ និងផ្លូវគល់ស្ពានសងខាង ៣៣៨ម៉ែត្រ មានទទឹង ១៥.៨ម៉ែត្រ។ ស្ពានអាកាសឫស្សីកែវ សាងសង់ដោយក្រុមហ៊ុនវិនិយោគទុនអនិកជនកម្ពុជា (OCIC) ចំណាយថវិកាជិត ១០លានដុល្លារ។៨. ស្ពានអាកាសភ្លោះ៖ ស្ពានអាកាសនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ត្រូវចំណាយថវិកាជាង១៦លានដុល្លារ។ ស្ពានអាកាសនេះ បានបើកការដ្ឋានសាងសង់ កាលពីថ្ងៃទី១៧ ខែមិថុនា ឆ្នាំ២០២៤។៩. ស្ពានអាកាស«មរតកតេជោ»៖ ស្ពានអាកាសមួយនេះ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ ហៅផ្លូវលេខ២៧១ ក្នុងទឹកដីខណ្ឌចំការមន និងខណ្ឌមានជ័យ ដោយគ្រោងចំណាយថវិកាជាង ៣៦លានដុល្លារ (៣៦.៧៧៥.០០០ដុល្លាអាមេរិក)និងចំណាយពេលវេលាសាងសង់ ៣៦ខែ។ គិតត្រឹមចុងខែតុលា ឆ្នាំ២០២៤ នេះ ស្ពានអាកាស «មរតកតេជោ» ជំហានទី២ គ្រោងនឹងបញ្ចប់មុនពិធីបុណ្យចូលឆ្នាំប្រពៃណីជាតិ ឆ្នាំ២០២៥ ខាងមុខ ខណៈកាលពីថ្ងៃទី០១ ខែមេសា ឆ្នាំ២០២៤ ស្ពាននេះបានដាក់ប្រើប្រាស់ជាបណ្តោះអាសន្ន ជាន់ទី២ ដំណាក់កាលទី១៕