គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ខេត្តកណ្ដាល ត្រៀមបើកការដ្ឋានសាងសង់ក្នុងពេលឆាប់ៗ ក្រោមឥណទានជាង៦៣លានដុល្លារ ពីធនាគារនីហរ័ណ អាហរ័ណកូរ៉េ។បើតាមការផ្សាយរបស់ក្រសួងសាធារណការ និងដឹកជញ្ជូន នៅថ្ងៃទី២២ ខែតុលា ស្ថានីយប្រព្រឹត្តកម្មទឹកកខ្វក់ក្រុងតាខ្មៅ ជាគម្រោងជំហានទី១ សម្រាប់ការគ្រប់គ្រងប្រព័ន្ធប្រព្រឹត្តកម្មទឹកកខ្វក់ នៅក្នុងក្រុងតាខ្មៅ ឱ្យមានប្រសិទ្ធភាព ដែលសំដៅថែរក្សាបរិស្ថាន និងសុខភាពពលរដ្ឋ។ គម្រោងនេះ មានស្ថានីយបូមទឹកកខ្វក់ចំនួន ៧កន្លែង បណ្តាញប្រព័ន្ធបង្ហូរទឹកកខ្វក់ រួមមាន លូមេ លូខ្នែង លូខ្នែងរង ប្រវែង១២៥គីឡូម៉ែត្រ និងតំណភ្ជាប់លូទឹកកខ្វក់តាមខ្នងផ្ទះ ១ម៉ឺនតំណ និងមានសមត្ថភាពចម្រោះទឹកកខ្វក់បាន១ម៉ឺន ២ពាន់ម៉ែត្រគីប ក្នុង១ថ្ងៃ។ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ មានទីតាំងស្ថិតនៅភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល ដែលត្រូវបានចុះហត្ថលេខា លើកិច្ចសន្យាសាងសង់ កាលពីថ្ងៃទី២៩ ខែសីហា ឆ្នាំ២០២៤ ជាមួយក្រុមហ៊ុន KUMHO-TECHCROSS Joint Venture។ សូមបញ្ជាក់ថា សេចក្តីព្រាងច្បាប់ស្តីពីប្រព័ន្ធទឹកកខ្វក់ ត្រូវបានអនុម័តដោយគណៈរដ្ឋមន្ត្រី កាលពីថ្ងៃទី២៣ ខែសីហា ឆ្នាំ២០២៤។ សេចក្តីព្រាងច្បាប់នេះ មានគោលបំណងធានាប្រសិទ្ធភាព គុណភាព សុវត្ថិភាព និងនិរន្តរភាពនៃប្រព័ន្ធទឹកកខ្វក់ និងការការពារបរិស្ថាន រួមចំណែក ធ្វើឱ្យប្រសើរឡើងនូវសុខុមាលភាពសាធារណៈនៅកម្ពុជា។ សូមរំឭកដែរថា រាជរដ្ឋាភិបាលកម្ពុជា បានទទួលឥណទានសម្បទាន ជាង៦៣លានដុល្លារ ពីធនាគារនីហរ័ណ អាហរ័ណកូរ៉េ សម្រាប់គម្រោងអភិវឌ្ឍប្រព័ន្ធប្រព្រឹត្តកម្មទឹកកខ្វក់ នៅទីក្រុងតាខ្មៅ ខេត្តកណ្តាល។ នេះបើយោងតាមសេចក្តីប្រកាសព័ត៌មានរបស់ក្រសួងសាធារណការ និងដឹកជញ្ជូន ចុះកាលពីថ្ងៃទី២៦ធ្នូ ឆ្នាំ២០១៨ ។ បើតាមក្រសួងសាធារណការ ទឹកប្រាក់ជាង៦៣លានដុល្លារនេះ នឹងត្រូវប្រើប្រាស់លើការសាងសង់ស្ថានីយប្រព្រឹត្តកម្មទឹកកង្វក់ ដែលមានសមត្ថភាពចម្រោះ ៧,៦០០ម៉ែត្រគូប ក្នុងមួយថ្ងៃ។ ក្រៅពីនេះ ក្រសួងក៏អាចសាងសង់ស្ថានីយបូម១០ទីតាំង ដែលមានសមត្ថភាពបូម២៩.៩៥២ម៉ែត្រគូបក្នុងមួយថ្ងៃ រួមទាំងសាងសង់បណ្តាញលូ ស្តារស្ទឹងជាង១៦គីឡូម៉ែត្រ និងស្តារស្ថានីយបូមទឹក ដែលមានស្រាប់ផង។ ជាមួយគ្នា ក្រសួងសាធារណការ បានចុះហត្ថលេខាលើកិច្ចសន្យាសេវាទីប្រឹក្សានៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅនេះ ជាមួយក្រុមហ៊ុនទីប្រឹក្សាបច្ចេកទេស Dohwa Engineering Co., Ltd។ កិច្ចសន្យានេះ ជាប្រភេទការងារសិក្សាប្លង់លម្អិត និងត្រួតពិនិត្យការសាងសង់គម្រោង ក្នុងរយៈពេល៤៨ខែ ជាមួយនឹងតម្លៃ ៤ ៧៣០ ៧៥០ដុល្លារ៕