មន្ត្រីជំនាញពាក់ព័ន្ធចុះពិនិត្យទីតាំងត្រៀមសាងសង់គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ ក្រុងតាខ្មៅ ខេត្តកណ្តាល ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បាន ដឹកនាំថ្នាក់ដឹកនាំគម្រោង និងក្រុមការងារចុះពិនិត្យការងារ និងទីតាំងដែលត្រៀមសាងសង់គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ ក្រុងតាខ្មៅ ខេត្តកណ្តាល ដោយមានការចួលរួម ពី ឯកឧត្តមអនុរដ្ឋលេខាធិការទទួលបន្ទុក ប្រធានមន្ទីរសាធារណការ និងដឹកជញ្ជូនខេត្តកណ្តាល ប្រធានគម្រោង ព្រមទាំងមន្ត្រីជាសមាជិកគម្រោង ទីប្រឹក្សាគម្រោង Dohwa-Seoyoung Joint Venture និងក្រុមការងារក្រុមហ៊ុនសាងសង់ KUMHO-TECHCROSS Joint Venture នាថ្ងៃ ទី២២ ខែតុលា ឆ្នាំ២០២៤ ។ ដំណើរបេសកកម្មនេះរៀបចំឡើងដើម្បីពិនិត្យការងារ និងទីតាំងដែលត្រៀមសាងសង់គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ ក្រុងតាខ្មៅ ខេត្តកណ្តាល ក្រោមហិរញ្ញប្បទានមូលនិធិសម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ចរបស់ធនាគារអាហរ័ណ-នីហរ័ណ នៃសាធារណរដ្ឋកូរ៉េ នាពេល ដ៏ខ្លីខាងមុខនេះ ព្រមទាំងចុះពិនិត្យមើលទីតាំងដែលបាន និងកំពុងសិក្សាសមិទ្ធិលទ្ធភាពសម្រាប់ត្រៀមអនុវត្តការងារជំហាន២បន្តទៀត។ សូមបញ្ជាក់ ថា គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ ក្រុងតាខ្មៅនេះ ស្ថិតនៅភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល ដែលត្រូវបានចុះហត្ថលេខាលើកិច្ចសន្យាសាងសង់កាលពីថ្ងៃទី២៩ ខែសីហា ឆ្នាំ២០២៤ ជាមួយក្រុមហ៊ុន KUMHO-TECHCROSS Joint Venture៕