កិច្ចប្រជុំ ស្តីពីការប្រមូលព័ត៌មានទាក់ទងនឹងតម្រូវការបណ្តុះបណ្តាលធនធានមនុស្សសម្រាប់ឆ្នាំ ២០២៥-២០២៩ របស់កម្មវិធីអាហារូបករណ៍ JDS ជាមួយប្រតិភូមជ្ឈមណ្ឌលសហប្រតិបត្តិការអន្តរជាតិនៃប្រទេសជប៉ុន (JICE) ទីស្តីការក្រសួង ៖ នាថ្ងៃសុក្រ ទី១១ ខែតុលា ឆ្នាំ២០២៤ ឯកឧត្ដម កែន រដ្ឋា អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន បានអញ្ជើញប្រជុំពិភាក្សាជាមួយប្រតិភូមជ្ឈមណ្ឌលសហប្រតិបត្តិការអន្តរជាតិនៃប្រទេសជប៉ុន (JICE) ដឹកនាំដោយ លោកស្រី HITOTSUBASHI Reiko នាយកផ្នែកកម្មវិធីនិស្សិតអន្តរជាតិ ដោយមានការអញ្ជើញចូលរួមពី លោកអគ្គនាយករង ប្រធាន អនុប្រធាននាយកដ្ឋាន និងមន្ត្រី នៃអគ្គនាយកដ្ឋានពាក់ព័ន្ធក្រោមឱវាទក្រសួងផងដែរ។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីសិក្សាពីការងារអាទិភាព និងពិនិត្យមើលលើតម្រូវការរបណ្តុះបណ្តាលធនធានមនុស្សរបស់ក្រសួងសាធារណការ និងដឹកជញ្ជូន ក្នុងកម្រិតអនុបណ្ឌិត និងបណ្ឌិត ដើម្បីជាធាតុចូលដល់មជ្ឈមណ្ឌលសហប្រតិបត្តិការអន្តរជាតិនៃប្រទេសជប៉ុន (JICE) ក្នុងការរៀបចំកម្មវិធីផ្តល់អាហារូបករណ៍ JDS សម្រាប់ឆ្នាំ ២០២៥-២០២៩ ដល់ក្រសួង-ស្ថាប័នរដ្ឋបាលថ្នាក់ជាតិក្នុងព្រះរាជាណាចក្រកម្ពុជា។ គួរបញ្ជាក់ថា កម្មវិធីអាហារូបករណ៍ជប៉ុន JDS ជាកម្មវិធីក្រោមជំនួយរបស់រដ្ឋាភិបាលជប៉ុនសម្រាប់ការអភិវឌ្ឍធនធានមនុស្សនៅកម្ពុជា (JDS) ដែលបាន និងកំពុងផ្តល់ការបណ្តុះបណ្តាលនិស្សិត (ជាមន្ត្រីរាជការ) តាមរយៈអាហារូបករណ៍ថ្នាក់បរិញ្ញាបត្រជាន់ខ្ពស់ (Master Degree) រយៈពេល ២ឆ្នាំ និង ថ្នាក់បណ្ឌិត (Ph.D Degree) រយៈពេល ៣ឆ្នាំ សិក្សានៅប្រទេសជប៉ុន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube