៥ កន្លែងទៅកម្សាន្តនៅខេត្តមណ្ឌលគិរី ក្នុងឱកាសបុណ្យភ្ជុំបិណ្ឌ ខាងមុខនេះ មណ្ឌលគិរី៖ បងប្អូនដែលធ្លាប់ទៅលេងខេត្តមណ្ឌលគិរី ច្បាស់ជាដឹងហើយថា រដូវវស្សាជាពេលវេលាដ៏សក្តិសមបំផុតក្នុងការទៅលេងនៅភូមិភាគឦសាន្តនៃប្រទេសកម្ពុជាយើង ព្រោះមានអាកាសធាតុត្រជាក់ល្អ និងទេសភាពធម្មជាតិដ៏ស្រស់បំព្រង។ ថ្ងៃនេះយើងសូមណែនាំកន្លែងកម្សាន្ដចំនួន ៥ ដែលបងប្អូនមិនគួររំលងពេលទៅលេងនៅខេត្តមណ្ឌលគិរី។ ១. ភ្នំដោះក្រមុំ ភ្នំដោះក្រមុំ ស្ថិតនៅក្បែរនឹងកណ្តាលក្រុងផ្ទាល់ ភ្នំដោះក្រមុំជាកន្លែងសក្តិសមបំផុតសម្រាប់មើលថ្ងៃលិច និងទេសភាពក្រុងសែនមនោរម្យ ពីចម្ងាយ។ ភ្នំដោះក្រមុំ គឺជាបូជនីយដ្ឋានទេសចរណ៍មួយនៅក្នុងខេត្តមណ្ឌលគិរី ដែលជនជាតិភាគតិច និងខ្មែរធ្វើការគោរពបូជាតាមជំនឿទំនៀមទម្លាប់របស់ពួកគេ។ ប្រភពរូបភាពពី៖ AMS Central ២. ភូមិពូតាំង ភូមិពូតាំង មានចម្ងាយប្រហែល១០គីឡូម៉ែត្រ ពីរង្វង់មូលគោព្រៃ នៃក្រុងសែនមនោរម្យ។ នៅទីនេះ ភ្ញៀវទេសចរអាចស្វែងយល់ជីវភាពរស់នៅជនជាតិភូមិពូតាំង ភ្លក់រសជាតិស្រាឪទិន បោះតង់ និងសាកអាហាររបស់បងប្អូនជនជាតិផងដែរ។ ប្រភពរូបភាពពី៖ 360Buzz ៣. ទឹកជ្រោះប៊ូស្រា នៅពេលនិយាយពីខេត្តមណ្ឌលគិរី គេតែងនឹកឃើញទឹកជ្រោះប៊ូស្រាជាមិនខាន ក៏ព្រោះតែទីនេះជាគោលដៅទេសចរណ៍សំខាន់ និងមានទេសភាពស្រស់ស្អាតក្នុងការទៅកម្សាន្ត។ ទឹកជ្រោះប៊ូស្រា ស្ថិតក្នុងភូមិពូទិស ឃុំប៊ូស្រា ស្រុកពេជ្រាដា ខេត្តមណ្ឌលគីរី ដែលស្ថិតនៅមិនឆ្ងាយប៉ុន្មានពីក្រុងសែនមនោរម្យ ត្រឹម៣៨គីឡូម៉ែត្រ។ នៅទីនោះ ភ្ញៀវទេសចរអាចសម្រាកទទួលទានអាហារថ្ងៃត្រង់ និងលេងទឹកធ្លាក់ផងដែរ។ ប្រភពរូបភាពពី៖ Kunnak Kim ៤. ភ្នំណាំលៀ ភ្នំណាំលៀ ស្ថិតនៅភូមិប៊ូស្រា ស្រុកពេជ្រាដា ខេត្តមណ្ឌលគិរី ស្ថិតនៅចម្ងាយប៉ុន្មានជាង២០គីឡូម៉ែត្រពីទឹកជ្រោះប៊ូស្រា។ ភ្នំណាំលៀ ជាភ្នំថ្មលាក់ខ្លួននៅកណ្តាលព្រៃ ដែលមានសម្រស់ធម្មជាតិដ៏ស្រស់ស្អាត វាលស្មៅខៀវស្រងាត់ព័ទ្ធជុំវិញ ពិសេសផ្ទៃដុំថ្មលាតសន្ទឹងដ៏សែនធំ ដែលបងប្អូនអាចដើរកម្សាន្តលើនោះបាន។ ប្រភពរូបភាពពី៖ មន្ទីរព័ត៌មានខេត្តមណ្ឌលគិរី ៥. អណ្តូងស្នេហ៍ អណ្តូងស្នេហ៍ មានទីតាំងស្ថិតនៅក្នុងឃុំដាក់ដាំ ដែលមានចំងាយប្រមាណ២២ គីឡូម៉ែត្រពីរង្វង់មូលគោព្រៃ ដោយផ្លូវទៅកាន់កន្លែងកម្សាន្តនេះមានភាពងាយស្រួលដោយវាជាប់ហ្នឹងផ្លូវធំស្រាប់។ ទីនេះជាទួលខ្ពស់ដែលបងប្អូនអាចឡើងទៅគយគន់ទេសភាពព្រៃភ្នំ និងផ្លូវកាច់កោងចេញជារាងអក្សរ S ផងដែរ។ ប្រភពរូបភាពពី៖ ទស្សនាកម្ពុជា-Visit Cambodia