ថ្ងៃព្រហស្បតិ៍ ៤រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែសីហា ឆ្នាំ២០១៨ ឯកឧត្តម សួង ហេង រដ្ឋលេខាធិការ​ក្រសួងសាធារណការ និងដឹកជញ្ជូន បានអញ្ជើញជាអធិបតី​ ក្នុងកម្មវិធីបើកវគ្គ បណ្តុះបណ្តាល ស្តីពី ការគ្រប់គ្រងចំណូល មិនមែនសារពើពន្ធ ដោយប្រើប្រាស់ប្រព័ន្ធ Non-Tax ដែលបានប្រព្រឹត្ត ទៅនៅ ខេត្តសៀមរាប ដោយមានការចូលរួម ពីមន្ត្រីអង្គភាព ក្រោមឱវាទក្រសួង។ វគ្គបណ្តុះបណ្តាលនេះ ត្រូវបានរៀបចំឡើង ក្នុងគោលបំណងផ្សព្វផ្សាយ ឲ្យចំគោលដៅ និងរួមចំណែក ក្នុងការបង្កើនការយល់ដឹង ស្តីពីការគ្រប់គ្រងចំណូល មិនមែនសារពើពន្ធ ការបង់ចំណូល ការកត់ត្រាចំណូល ដែលប្រមូលបាន ការផ្ទេរចំណូលចូលថវិកាជាតិ ព្រមទាំងពង្រីកការ ផ្តល់សេវាសាធារណៈ ឲ្យមានប្រសិទ្ធភាព គណនេយ្យភាព និងជំរុញការរៀបចំ សាលកប័ត្របង់ចំណូល ឲ្យបានឆាប់រហ័ស និងទាន់ពេលវេលា។ ថ្លែងក្នុងសន្ទរកថាបើក ឯកឧត្តមរដ្ឋលេខាធិការ បានគូសបញ្ជាក់អំពីសារសំខាន់ នៃការប្រើប្រាស់ប្រព័ន្ធ Non-Tax ក្នុងការជួយសម្រួល ដល់នីតិវិធីនៃការគ្រប់គ្រង ចំណូលមិនមែនសារពើពន្ធ ឲ្យមានភាពច្បាស់លាស់ ស្របតាមគោលដៅ នៃគោលនយោបាយចំណូល រយៈពេលមធ្យម យុទ្ធសាស្ត្រកៀរគរចំណូល និងក្របខណ្ឌ នៃកម្មវិធីកែទម្រង់ការគ្រប់គ្រង ហិរញ្ញវត្ថុសាធារណៈ របស់ក្រសួងសាធារណការ និងដឹកជញ្ជូន។ ជាទីបញ្ចប់ ឯកឧត្តមរដ្ឋលេខាធិការ បានលើកទឹកចិត្ត ដល់មន្ត្រី ដែលជាសិក្ខាកាមទាំងអស់ ឲ្យយកចិត្តទុកដាក់ស្វែងយល់ និងពិភាក្សា ឱ្យកាន់តែស៊ីជម្រៅ បន្ថែមទៀត ទៅលើការប្រើប្រាស់ប្រព័ន្ធ Non-Tax នេះ ដើម្បីបង្កើនប្រសិទ្ធភាព នៃការគ្រប់គ្រងចំណូល មិនមែនសារពើពន្ធ។