លោក ម៉ាង ស៊ីណេត អភិបាលខេត្តព្រះសីហនុ បានអះអាងថា កាលពីថ្ងៃទី០៦ ខែសីហា ថា គ្រឿងចក្រលើកដាក់កុងតឺន័រ នៅគែមផែ ប្រភេទ QC និងគ្រឿងចក្រលើកដាក់កុងតឺន័រនៅទីលាន ប្រភេទ RTG ត្រូវបានដឹកជញ្ជូនមកដល់ចំណតផែកុងតឺន័រថ្មី ។លោកបានអះអាងថា គ្រឿងចក្រ លើកដាក់ទំនិញធុនធ្ងន់ទាំងនេះ គឺមានគ្រឿងចក្រលើកដាក់កុងតឺន័រនៅគែមផែ ប្រភេទ QC ចំនួន២ គ្រឿង និងគ្រឿងចក្រ លើកដាក់កុងតឺន័រនៅទីលាន ប្រភេទ RTG ចំនួន៦គ្រឿង ។ លោកបន្តថា គ្រឿងចក្រទាំងនេះ ត្រូវបានដឹកជញ្ជូនពីរោងចក្រ Oita ប្រទេសជប៉ុន មកដល់ចំណតផែកុងតឺន័រថ្មី ប្រវែង២៥៣ម៉ែត្រ របស់កំពង់ផែស្វយ័ត ក្រុងព្រះសីហនុ ។ គ្រឿងចក្រថ្មីៗទាំងអស់នេះ ត្រូវបានផ្គត់ផ្គង់ដោយក្រុមហ៊ុនជប៉ុន MITSUI E&S Co., Ltd ។ការបំពាក់គ្រឿងចក្រថ្មីៗទាំងនេះ គឺដើម្បីបង្កើនសមត្ថភាពរបស់កំពង់ផែស្វយ័ត ក្រុងព្រះសីហនុ (ក.ស.ស) ក្នុងការឆ្លើយតបទៅនឹងកំណើននៃតម្រូវការ ក្នុងការលើកដាក់ផ្ទេរ-ផ្ទុកកុងតឺន័រ ក្នុងបរិបទការអភិវឌ្ឍន៍ និងភាពរីកចម្រើននៃសេដ្ឋកិច្ចកម្ពុជា៕