កិច្ចប្រជុំលើកទី២ នៃក្រុមប្រឹក្សាជាតិភស្ដុភារកម្ម (ក.ជ.ភ) ដើម្បីពិនិត្យវឌ្ឍនភាព នៃផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ ក្រុមប្រឹក្សាអភិវឌ្ឍន៍កម្ពុជា៖ នារសៀលថ្ងៃអង្គារ ទី៦ ខែសីហា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹងជញ្ជូន និងជាប្រធានគណៈកម្មាធិការជាតិភស្តុភារកម្ម បានអញ្ជើញចូលរួម កិច្ចប្រជុំលើកទី២ នៃក្រុមប្រឹក្សាជាតិភស្ដុភារកម្ម (ក.ជ.ភ.) ក្រោមអធិបតីភាព ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមប្រឹក្សាជាតិភស្ដុភារកម្ម។ កិច្ចប្រជុំនាឱកាសនេះត្រូវបានរៀបចំឡើងក្នុងគោលបំណងដើម្បីពិនិត្យវឌ្ឍនភាពការងារ នៃការអនុវត្ត “ផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣” ការសិក្សាគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ និងគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះស៊ីហនុ (SHV-LC)។ គម្រោងនេះ នឹងជួយបង្កើនភាពប្រទាក់ក្រឡាគ្នា រវាងវិស័យដឹកជញ្ជូន និងឡូជីស្ទីកព្រមទាំងជួយធ្វើឱ្យរំហូរទំនិញ អ្នកដំណើរ និងសេវាកាន់តែមានភាពរលូនជាងមុន កាត់បន្ថយពេលវេលាក្នុងការធ្វើដំណើរ និងបង្កើនប្រសិទ្ធភាពនៃសេវាដឹកជញ្ជូន និងឡូជីស្ទីក។ ផែនការមេនេះនឹងរួមចំណែកយ៉ាងសំខាន់នៅក្នុងការជំរុញឱ្យប្រទេសកម្ពុជា ប្រែក្លាយទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០ ស្របតាមចក្ខុវិស័យរបស់រាជរដ្ឋាភិបាល៕