កិច្ចប្រជុំពិនិត្យ វឌ្ឍនភាពការងារ និងលើកទិសដៅបន្តលើកិច្ចការផ្នែកដឹកជញ្ជូន នៃស.ស.យ.ក វិស័យសាធារណការ និងដឹកជញ្ជូន ភ្នំពេញ ៖ នៅថ្ងៃទី៤ ខែកក្កដា ឆ្នាំ២០២៤ លោក ឈួន វ៉ន់ ប្រធានផ្នែកដឹកជញ្ជូននៃ ស.ស.យ.ក វិស័យសាធារណការ និងដឹកជញ្ជូន បានដឹកនាំកិច្ចប្រជុំពិនិត្យ វឌ្ឍនភាពការងារ និងលើកទិសដៅបន្តលើកិច្ចការរបស់ផ្នែកដឹកជញ្ជូន កិច្ចប្រជុំនេះមានការចូលរួមពី លោក លោកស្រីអនុប្រធានផ្នែក សមាជិកអចិន្ត្រៃយ៍ និងសមាជិក សមាជិកាផ្នែកដឹកជញ្ជូននៃ ស.ស.យ.ក វិស័យសាធារណការ និងដឹកជញ្ជូន សរុបចំនួន ១៨នាក់។ លទ្ធផលនៃកិច្ចប្រជុំ បានរាយការណ៍អំពីសកម្មភាពការងារដែល ស.ស.យ.ក ផ្នែកដឹកជញ្ជូនសម្រេចបានរួមមាន ការងារអប់រំផ្សព្វផ្សាយ ការបណ្តុះបណ្តាលអំពីសុវត្ថិភាពចរាចរណ៍ផ្លូវគោក នៅតាមបណ្តារាជធានី ខេត្ត សាកលវិទ្យាល័យ ការធ្វើយុទ្ធនាការនៅថ្ងៃបុណ្យជាតិសំខាន់ៗ និងការផលិតខិត្តបណ្ណអប់រំពាក់ព័ន្ធនឹងសុវត្ថិភាពផ្លូវទឹក។ អង្គប្រជុំបានគាំទ្រឱ្យបន្តអនុវត្តសកម្មភាពដែលធ្លាប់មាន ត្រូវធ្វើបច្ចុប្បន្នភាពសមាជិកសមាជិកាផ្នែកដឹកជញ្ជូន លើកទឹកចិត្តឱ្យមានអ្នកចូលជាសមាជិក ស.ស.យ.ក បន្ថែម។ ការលើកទិសដៅអនុវត្តបន្ត រួមមាន ការរៀបចំយុទ្ធនាការជិះម៉ូតូពាក់មួកសុវត្ថិភាពនៅខេត្តមណ្ឌលគិរី និងនៅស្រុកស្អាងខេត្តកណ្តាល ការស្នើសុំកិច្ចសហការជាមួយក្រសួងអប់រំ យុវជន និងកីឡា ក្នុងការអប់រំផ្សព្វផ្សាយនៅតាមសាលារៀន និងផលិតខិតបណ្ណអប់រំពាក់ព័ន្ធនឹងសុវត្ថិភាពផ្លូវទឹក៕