កិច្ចប្រជុំឆ្លងបញ្ចប់លើការរៀបចំសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងអង្គការសហប្រជាជាតិ ឆ្នាំ១៩៥៨ ស្តីពីការទទួលយកបទបញ្ញត្តិបច្ចេកទេសរួម ភ្នំពេញ៖ នាព្រឹកថ្ងៃពុធ ទី២៦ ខែមិថុនា ឆ្នាំ២០២៤ ឯកឧត្តម ប៉ាល់ ចន្ទតារា រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រី ក្រសួងសាធារណការ និងដឹកជញ្ជូន បានដឹកនាំក្រុមការងារបច្ចេកទេស នៃអគ្គនាយកដ្ឋានដឹកជញ្ជូនផ្លូវគោក ចូលរួមក្នុងកិច្ចប្រជុំឆ្លងបញ្ចប់លើការរៀបចំសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងអង្គការសហប្រជាជាតិ ឆ្នាំ១៩៥៨ ស្តីពីការទទួលយកបទបញ្ញត្តិបច្ចេកទេសរួម ដែលបានស្នើឡើងដោយក្រសួងសាធារណការ និងដឹកជញ្ជូន លើ ១៦មាត្រា ព្រមទាំងឧបសម្ព័ន្ធ និងបទប្បញ្ញត្តិបន្ថែម ស្តីពីបញ្ញត្តិរដ្ឋបាល និងនីតិវិធី។ កិច្ចប្រជុំនេះ ត្រូវបានរៀបចំឡើងនៅទីស្តីការគណៈរដ្ឋមន្ត្រី ក្រោមអធិបតីភាព ឯកឧត្តម ឆឺយ រឿន រដ្ឋលេខាធិការ ទីស្តីការគណៈរដ្ឋមន្ត្រី និងមានការចូលរួមពីសំណាក់ ឯកឧត្តម លោកជំទាវ តំណាងអង្គភាពប្រឆាំងអំពើពុករលួយ សមាជិក ECOSOC ក្រុមប្រឹក្សាអ្នកច្បាប់ ក្រុមប្រឹក្សាភាសាខ្មែរ និងក្រសួង-ស្ថាប័នពាក់ព័ន្ធផងដែរ។ សេចក្តីព្រាងច្បាប់នេះ មានសារប្រយោជន៍ក្នុងបង្កើតបរិយាកាសអំណោយផលក្នុងការទាក់ទាញវិនិយោគិនឱ្យមកវិនិយោគលើការរៀបចំ និងកសាងឧស្សាហកម្ម(រោងចក្រ) ផលិត និងដំឡើងយានយន្ត បរិក្ខារ និងគ្រឿងបន្លាស់ និងដើម្បីចូលរួមកាត់បន្ថយគ្រោះថ្នាក់ចរាចរណ៍ ធានាសុវត្ថិភាពយានយន្តក្នុងកម្រិតខ្ពស់ ការពារបរិស្ថាន ជំរុញការប្រើប្រាស់ថាមពលស្អាត សន្សំសំចៃថាមពល និងទប់ស្កាត់ការនាំចូលយានយន្តចោរកម្មជាដើម។ ម៉្យាងទៀតសេចក្តីព្រាងច្បាប់នេះផ្តល់ផលប្រយោជន៍ឧស្សាហកម្ម និងអ្នកប្រើប្រាស់ ដោយប្រើប្រាស់ឯកភាវូបនីយកម្មលើយថាប្រភេទ សម្រាប់ដំណើរការផលិតយានយន្តថ្មី កាត់បន្ថយចំណាយថ្លៃដើម តាមរយៈប្រសិទ្ធភាព(សន្សំសំចៃ) លើការអភិវឌ្ឍ ការផលិត ដំណើរការផ្តល់លិខិតបញ្ជាក់អនុលោមភាព ព្រមទាំងអាចនាំចេញផលិតរបស់ខ្លួនទៅក្នុងទីផ្សារអន្តរជាតិដោយមិនមានរនាំងបច្ចេកទេស និងអ្នកប្រើប្រាស់នៃប្រទេសជាសមាជិកនឹងទទួលបានយានយន្តប្រកបដោយគុណភាព សុវត្ថិភាពខ្ពស់ តម្លៃសមរម្យ សន្សំសំចៃថាមពល និងកាត់បន្ថយផលប៉ះពាល់ចំពោះបរិស្ថាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube