ឯកឧត្តម ឈួន វិន ប្រធានក្រុមការងារគណបក្សចុះមូលដ្ឋានខេត្តមណ្ឌលគិរី អញ្ជើញជាអធិបតី ពិធីសំណេះសំណាលជាមួយអង្គបោះឆ្នោតក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤ ឆ្នាំ២០២៤ នៅក្រុងសែនមនោរម្យ ខេត្តមណ្ឌលគិរី មណ្ឌលគិរី៖ នារសៀលថ្ងៃអាទិត្យ ទី១៩ ខែឧសភា ឆ្នាំ២០២៤ ឯកឧត្តម ឈួន វិន ប្រធានក្រុមការងារគណបក្សចុះមូលដ្ឋានខេត្តមណ្ឌលគិរី បានបន្តអញ្ជើញជាអធិបតីក្នុងពិធីសំណេះសំណាលជាមួយអង្គបោះឆ្នោត ក្នុងយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក នៅក្រុងសែនមនោរម្យ ដោយមានការចូលរួមពី ឯកឧត្តម ដួង ហេង អនុប្រធានទី១ ក្រុមការងារគណបក្សចុះមូលដ្ឋានខេត្តមណ្ឌលគិរី លោកជំទាវ អ៊ុត សន អនុប្រធានគណៈកម្មាធិការគណបក្សខេត្តមណ្ឌលគិរី ព្រមទាំងឯកឧត្តម អនុប្រធានក្រុមការងារ សមាជិក សមាជិកា ក្រុមការងារគណបក្សចុះមូលដ្ឋាន ក្រុងសែនមនោរម្យ និងសង្កាត់ទាំង៤ សរុបប្រមាណ១០០រូប។ ថ្លែងក្នុងអង្គពិធី លោកជំទាវ អ៊ុត សន អនុប្រធានគណៈកម្មាធិការគណបក្សខេត្ត បានរាយការណ៍ពីលទ្ធផលការងារគណបក្ស និងអានសាររបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស ជូនដល់អង្គពិធី។ ជាមួយគ្នានេះដែរ ក៏មានរបាយការណ៍សង្ខេបពីសកម្មភាពរបស់ក្រុមការងារគណបក្សក្រុង និងការប្តេជ្ញាចិត្តក្នុងឱកាសយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុងស្រុក អាណត្តិទី៤ ឆ្នាំ២០២៤។ ឯកឧត្តម ឈួន វិន ប្រធានក្រុមការងារ បានគូសបញ្ជាក់ពីលទ្ធផលបោះឆ្នោតសកលនៅឆ្នាំ២០២២ និងឆ្នាំ២០២៣ គឺបោះឆ្នោតក្រុមប្រឹក្សាឃុំសង្កាត់ ឆ្នាំ២០២២ បោះឆ្នោតសភា ឆ្នាំ២០២៣ និង អសកលឆ្នាំ២០២៤ គឺជ្រើសតាំងសមាជិកព្រឹទ្ធសភា នៅខែកុម្ភៈ ឆ្នាំ២០២៤ កន្លងទៅនេះ ដោយតែងទទួលបានលទ្ធផលជោគជ័យជារៀងរហូត ដែលលទ្ធផលទាំងនេះពុំមែនកើតឡើងដោយចៃដន្យនោះទេ ក៏ប៉ុន្តែជាការឆ្លុះបង្ហាញនូវជំនឿជាក់ ទំនុកចិត្ត សាមគ្គីភាព ឯកភាពផ្ទៃក្នុង ការស្មោះស្ម័គ្រ និងគាំទ្ររបស់គណបក្សប្រជាជនកម្ពុជា ជាគណបក្សធានាបាននូវសន្តិភាព ស្ថិរភាព និងមាគ៌ាអភិវឌ្ឍន៍។ ជាទីបញ្ចប់ ឯកឧត្តមប្រធាន បានថ្លែងអំណរគុណ និងវាយតម្លៃខ្ពស់ដល់ក្រុមការងារទាំងអស់ដែលបានចុះពង្រឹងការងារគណបក្សសម្រេចបានសមិទ្ធផលយ៉ាងច្រើនក្នុងការអភិវឌ្ឍមូលដ្ឋាន និងសំណូមពរឱ្យអង្គបោះឆ្នោតទាំងអស់ត្រូវថែរក្សាសុខភាព និងអញ្ជើញទៅបោះឆ្នោតឱ្យបានគ្រប់ៗគ្នា លើគណបក្សមានរូបសញ្ញាទេវតាបាចផ្កា និងមានលេខរៀងទី១ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៤ ខាងមុខនេះ៕