ខេត្តបាត់ដំបងៈផ្លូវវាងក្រុងដែលទើបសាងសង់ថ្មីធ្វើដោយក្រុមហ៊ុនចិន មានប្រវែងជាង៣០គម,មិនកាត់ទីប្រជុំ ជនក្រុងបាត់ដំបងឡើយ បានសាងសង់ជិតរួចរាល់ជាស្ថាបពរ និងបានដាក់ឲ្យប្រើប្រាស់នាពេលខាងមុខនេះ ដើម្បីបញ្ជៀសការកកស្ទះក្នុងក្រុងបាត់ដំបង។ បុគ្គលិកជំនាញផ្នែកសាងសង់ផ្លូវខាងលើបានឲ្យដឹងថា ផ្លូវវាងក្រុងនេះភ្ជាប់ពីគល់ស្ពានអូរតាគីផ្លូវជាតិលេខ៥កាត់តាមវាលស្រែមកភ្ជាប់ផ្លូវលេខ៥៧(អតីតផ្លូវលេខ១០)ត្រង់ភូមិបឹងរាំងសង្កាត់ឱម៉ាល់ឆ្ពោះទៅឃុំឈើទាលស្រុកបាណន់រួចតទៅវត្តកំណប់ភ្ជាប់ទៅផ្លូវជាតិលេខ៥ស្រុកសង្កែវិញមានប្រវែងជាង៣០គម ,ដែលផ្លូវនេះមិនកាត់ក្រុងបាត់ដំបងទេ បានសាងសង់ជិតរួចរាល់ហើយ។ បុគ្គលិកជំនាញរូបនេះបន្តថា ផ្លូវនេះមានទំហំធំទូលាយក្រាលដោយកៅស៊ូធ្វើតាមលំនាំស្តង់ដា មានគុណភាពប្រើប្រាស់បានយូរអង្វែងការសាងសង់មានរយៈពេលជាង១ឆ្នាំមកហើយដែលគម្រោងផ្លូវនេះលើកធ្វើថ្មីទាំងស្រុង មិនមានលំនាំផ្លូវចាស់ត្រូវជួសជុលធ្វើថ្មីដូចផ្លូវនានាទេមកដល់ពេលនេះជិតរួចរាល់ ១០០%ហើយនៅសល់តែតិចតួចនិងស្ពានធ្វើឆ្លងកាត់ស្ទឹងសង្កែ១​ទៀតទេ បើស្ពានសាងសង់រួចហើយផ្លូវនេះនិងហើយរួចរាល់ជាស្ថាបពរដែរដើម្បីដាក់ឲ្យប្រើ ប្រាស់បានហើយ។ គួរបញ្ជាក់ដែរថា យោងតាមរបាយការណ៍មន្ទីរសារធារណៈនិងដឹកជញ្ជូនខេត្ត បាត់ដំបងក្នុងឆ្នាំ២០១៦/១៧បានឲ្យដឹងថា ខេត្តបាត់ដំបងមានផ្លូវក្រាលកៅស៊ូជាង១ពាន់គមក្នុងខេត្ត គឺជាខេត្ត១ដែលទទួលបានផ្លូវក្រាលកៅស៊ូវែងជាងគេទូទាំងប្រទេសកម្ពុជា៕