ភ្នំពេញ ៖ សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បទបញ្ជាឱ្យក្រសួងសាធារណការនិងដឹកជញ្ជូន អគ្គស្នងការនគរបាលជាតិន អាជ្ញាធររាជធានី ខេត្ត និងស្នងការដ្ឋាននគរបាលរាជធានី ខេត្ត ធ្វើការត្រួតពិនិត្យនិងធ្វើការណែនាំ ដល់អ្នកបើកបរដែលបំពាក់ស៊ីផ្លេរថយន្តកែច្នៃខុសបច្ចេកទេស ដើម្បិទប់ស្កាត់ភាពអាណាធិបតេយ្យនៅតាមផ្លូវសាធារណៈ ។ការដាក់ចេញនូវបទបញ្ជានេះ គឺធ្វើឡើងបន្ទាប់ពីមើលឃើញថា ក្នុងប៉ុន្មានថ្ងៃមកនេះ មានក្មេង និងយុវជនបាននាំគ្នារាំតាមចង្វាក់ស៊ីផ្លេរថយន្តនៅតាមដងផ្លូវ ដែលជាសកម្មភាពធ្វើឱ្យប៉ះពាល់ដល់សណ្ដាប់ធ្នាប់តាមដងផ្លូវ និងអាចបង្កហានិភ័យគ្រោះថ្នាក់សម្រាប់អ្នកធ្វើដំណើរតាមផ្លូវ ជាដើម ។ សម្ដេចធិបតី ក៏បានអំពាវនាវដល់ក្រុមហ៊ុនដឹកជញ្ជូន ព្រមទាំងប្អូនៗ និងក្មួយៗដែលជាអ្នកបើកបររថយន្តធំៗ ត្រូវដាក់ស៊ីផ្លេឱ្យបានត្រឹមត្រូវតាមលក្ខណៈបច្ចេកទេសដែលក្រសួងសាធារណការ និងដឹកជញ្ជូន បានណែនាំ និងជៀសវាងការប្រើប្រាស់ស៊ីផ្លេដែលនាំឱ្យមានការលើកទឹកចិត្តដល់ប្រជាពលរដ្ឋ ជាពិសេសក្មួយៗ ធ្វើសកម្មភាពរាំលេងតាមដងផ្លូវ។ សម្ដេចក៏បានអំពាវនាវផងដែរដល់ប្រជាពលរដ្ឋ ជាពិសេសក្មួយៗ សូមបញ្ឈប់សកម្មភាពរាំលេងតាមដងផ្លូវតាមចង្វាក់ស៊ីផ្លេភ្លេងរបស់រថយន្តធំៗ ជៀសវាងគ្រោះថ្នាក់ និងបង្កភាពអនាធិបតេយ្យតាមដងផ្លូវ។ ហើយក៏សូមអាណាព្យាបាលចូលរួមសហការ និងធ្វើការណែនាំដល់ក្មួយៗឱ្យបញ្ឈប់សកម្មភាពរាំលេងតាមដងផ្លូវ៕