“ពង្រឹងភាពជាអ្នកដឹកនាំរបស់ស្ត្រី ក្នុងជួររាជរដ្ឋាភិបាល ទាំងពេលបច្ចុប្បន្ន និងទៅថ្ងៃអនាគត” ត្រូវបានកំណត់ជាគោលដៅ សម្រាប់វគ្គបណ្តុះបណ្តាលស្តីពី ភាពជាអ្នកដឹកនាំ និងសមភាពយេនឌ័រ ទីស្តីការក្រសួង៖ នាព្រឹកថ្ងៃអង្គារ ទី១៩ ខែមីនា ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ តំណាង ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី “ភាពជាអ្នកដឹកនាំ និងសមភាពយេនឌ័រ” ជូនដល់ថ្នាក់ដឹកនាំ និងមន្ត្រីរាជការជានារី ។ ពិធីបើកវគ្គបណ្តុះបណ្តាលនេះ មានការចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួង លោក លោកស្រី ជាថ្នាក់ដឹកនាំវិទ្យាស្ថានតេជោសែន សាធារណការ និងដឹកជញ្ជូន ប្រធានគម្រោង P4I តំណាងមូលនិធិអាស៊ី តំណាងមហាវិទ្យាល័យមែលប៊ន និងមន្ត្រីពាក់ព័ន្ធផ្សេងទៀត សរុបប្រមាណជិត ៥០រូប។ វគ្គបណ្តុះបណ្តាលត្រូវបានរៀបចំដោយ វិទ្យាស្ថានតេជោសែន សាធារណការ និងដឹកជញ្ជូន សហការជាមួយ ស្ថានទូតអូស្ត្រាលីប្រចាំព្រះរាជាណាចក្រកម្ពុជា និងមូលនិធិអាស៊ី តាមរយៈកម្មវិធី Partnerships for Infrastructure (P4I) ហើយត្រូវបានរៀបចំឡើងជាពិសេសសម្រាប់ ថ្នាក់ដឹកនាំជានារី និងមន្ត្រីរាជការជានារី នៅតាមអង្គភាពនានាក្រោមឱវាទក្រសួងសាធារណការ និងដឹកជញ្ជូន។ ថ្លែងទៅកាន់អង្គពិធី លោកជំទាវរដ្ឋលខាធិការប្រចាំការ បានលើកឡើងថា គោលបំណងនៃពិធីបើកវគ្គបណ្តុះបណ្តាលនេះ គឺដើម្បីបញ្ជ្រាបការយល់ដឹងអំពីសមភាពយេនឌ័រ និងពង្រឹងភាពជាអ្នកដឹកនាំរបស់ស្ត្រី ក្នុងជួររាជរដ្ឋាភិបាល ទាំងពេលបច្ចុប្បន្ន និងទៅថ្ងៃអនាគត។ មួយផ្នែកទៀត គឺសំដៅបង្កើនជំនាញ ការយល់ដឹង និងការលើកកម្ពស់ភាពជាអ្នកដឹកនាំ និងការចូលរួមរបស់ស្ត្រី ព្រមទាំងពង្រឹងសមត្ថភាពដឹកនាំរបស់ស្ត្រី ដែលបច្ចុប្បន្នកំពុងបម្រើការជាមន្ត្រីរាជការក្នុងក្រសួងសាធារណការ និងដឹកជញ្ជូន តាមរយៈបទឧទ្ទេសនាម ដោយវាគ្មិនមកពីមូលនិធិអាស៊ី។ លោកជំទាវរដ្ឋលខាធិការប្រចាំការ បានបន្ថែមថា ក្រសួងសាធារណការ និងដឹកជញ្ជូន តាមរយៈការបើកវគ្គបណ្តុះបណ្តាលនេះ គឺបានបង្ហាញឱ្យឃើញច្បាស់អំពីការប្តេជ្ញាចិត្តរបស់ខ្លួន ក្នុងការពង្រឹងសមភាពយេនឌ័រ និងការគាំពារសង្គម តាមរយៈការបង្កើនសមាមាត្រស្ត្រីក្នុងតួនាទីជាអ្នកដឹកនាំ ទាំងថ្នាក់ជាតិ និងថ្នាក់ក្រោមជាតិ, ការបង្កនូវបរិយាកាសអំណោយផល សំដៅលើកកម្ពស់ភាពជាអ្នកដឹកនាំរបស់ស្ត្រីក្នុងវិស័យសាធារណៈ, ការពង្រឹងខ្សែបណ្តាញអ្នកដឹកនាំជាស្ត្រី និងការលើកកម្ពស់ការយល់ដឹងអំពីសមភាពយេនឌ័រ ដើម្បីគាំទ្រ និងបង្កើនការចូលរួមរបស់ស្ត្រីក្នុងកិច្ចការដឹកនាំ និងអភិបាលកិច្ច ដែលទាំងអស់នេះគឺស្ថិតក្នុងមុំមួយ ក្នុងចំណោមមុំសំខាន់ៗផ្សេងទៀត នៃយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលបានដាក់ចេញ។ ក្នុងនាម ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន លោកជំទាវរដ្ឋលេខាធិការប្រចាំការ បានសម្តែងនូវអំណរគុណចំពោះវត្តមានអ្នកចូលរួមទាំងអស់ សម្រាប់ការចំណាយពេលវេលាក្នុងព្រឹត្តិការណ៍មួយនេះ។ ជាពិសេស លោកជំទាវ បានថ្លែងអំណរគុណទៅកាន់ ស្ថានទូតអូស្ត្រាលីប្រចាំនៅកម្ពុជា និងមូលនិធិអាស៊ី តាមរយៈកម្មវិធី Partnerships for Infrastructure (P4I) ដែលបានសហការជាមួយ វិទ្យាស្ថានតេជោសែន សាធារណការ និងដឹកជញ្ជូន ក្នុងការរៀបចំការបណ្តុះបណ្តាលពិសេសនេះឡើង។ លោកជំទាវរដ្ឋលេខាធិការប្រចាំការ បានបង្ហាញជំនឿចិត្តយ៉ាងមុតមាំថា តាមរយៈកម្មវិធីបណ្តុះបណ្តាលពិសេសនេះ ថ្នាក់ដឹកនាំនារី និងមន្ត្រីរាជការទាំងអស់ នឹងទទួលបានការយល់ដឹងកាន់តែស៊ីជម្រៅ និងមានឱកាសក្នុងការផ្លាស់ប្តូរ ចែករំលែកចំណេះដឹង បទពិសោធន៍របស់ខ្លួន ជុំវិញប្រធានបទខាងលើនេះ យ៉ាងសកម្មជាក់ជាមិនខាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube