កំពត៖ គម្រោងស្ដារ និងលើកកម្រិតគុណភាពផ្លូវជាតិលេខ៣១ សម្រេចបាន ៦០% និងគ្រោងបញ្ចប់ការងារតួផ្លូវចាក់ AC នៅខែមិថុនា ខាងមុខនេះហើយ។ នេះបើតាមការប្រកាសឱ្យដឹងពីក្រសួងសាធារណការ និងដឹកជញ្ជូន។គម្រោងស្តារ និងលើកកម្រិតគុណភាពផ្លូវជាតិលេខ៣១ មានប្រវែងសរុប ៥៣,៥៣គ.ម (ចាប់ពីបែកគុស ចំណុចប្រសព្វផ្លូវជាតិលេខ៣ រហូតទៅដល់ទីរួមស្រុកកំពង់ត្រាច ចំណុចតភ្ជាប់ផ្លូវជាតិលេខ៣៣) នឹងអាចបញ្ចប់នៅចុងខែមិថុនា ដែលអាចឱ្យពលរដ្ឋធ្វើដំណើរបានទៅមកដោយរលូន។ ចំពោះការងារផ្សេងៗទៀតដូចជា ការបំពាក់បរិក្ខារផ្លូវថ្នល់ បន្ថែមប្រព័ន្ធបង្ហូរទឹកសងខាងផ្លូវ និងការងារមួយចំនួនផ្សេងទៀត នឹងអាចនឹងបញ្ជប់នៅចុងឆ្នាំ ២០២៤នេះ ដោយបញ្ចប់មុនកិច្ចសន្យា ១ឆ្នាំ។ គូសរម្លឹកថា ផ្លូវជាតិលេខ៣១ ត្រូវបានអតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន ធ្វើជាអធិបតីភាពក្នុងពិធីបើកការដ្ឋានសាងសង់ និងស្តារលើកកម្រិតគុណភាពកាលពីថ្ងៃទី២៩ ខែធ្នូ ឆ្នាំ២០២២ ដែលផ្លូវជាតិមួយនេះមិនត្រឹមតែជាផ្លូវសម្រាប់ធ្វើដំណើរ បម្រើក្នុងវិស័យដឹកជញ្ជូន តែក៏ជាច្រករបៀងសម្រាប់ការតភ្ជាប់ទំនាក់ទំនងសេដ្ឋកិច្ចរវាងកម្ពុជា ប្រទេសវៀតណាម និងប្រទេសថៃផងដែរ៕