ក្រុមការងារបច្ចេកទេស P4I & Austroads នៃប្រទេសអូស្រ្ដាលី បិទបញ្ចប់បេសកកម្មនៃការពិនិត្យ និងពិភាក្សាលើកទី៥ លើសេចក្តីព្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ទីស្ដីការក្រសួង៖ នាថ្ងៃសុក្រ ទី២ ខែកុម្ភៈ ឆ្នាំ២០២៤ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំថ្ងៃបញ្ចប់នៃការពិនិត្យ និងពិភាក្សាលើកទី៥ លើសេចក្តីព្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ជាមួយក្រុមការងារបច្ចេកទេស P4I & Austroads នៃប្រទេសអូស្រ្ដាលី ដឹកនាំដោយលោកស្រី Faith Considine តំណាងស្ថានទូតអូស្ត្រាលី ប្រចាំនៅកម្ពុជា ដោយមានការចូលរួមពីថ្នាក់ដឹកនាំក្រសួងទទួលបន្ទុក ថ្នាក់ដឹកនាំអគ្គនាយកដ្ឋានសាធារណការ អគ្គនាយកដ្ឋានបច្ចេកទេស ក្រុមការងារស្ថាប័ន Partnerships for Infrastructure (P4I) ក្រុមការងារបច្ចេកទេស Austroads ព្រមទាំងមន្រ្តីបច្ចេកទេសមកពីអង្គភាព ជំនាញក្រោមឱវាទក្រសួងជាច្រើនរូបផងដែរ។ លោកជំទាវរដ្ឋលេខាធិការប្រចាំការ បានសម្តែងនូវការកោតសរសើរ និងថ្លែងអំណរគុណចំពោះក្រុមការងារបច្ចេកទេស P4I & Austroads នៃប្រទេសអូស្រ្ដាលី ដែលបានធ្វើដំណើរបេសកកម្មនៅកម្ពុជា ចាប់ពីថ្ងៃទី២៧ មករា ដល់ថ្ងៃទី២ កុម្ភៈ ឆ្នាំ២០២៤ នេះ ដើម្បីជួយរៀបចំ ផ្តល់ធាតុចូល ពិភាក្សាលម្អិត និងកែសម្រួលបទដ្ឋានបច្ចេកទេសតាមផ្នែកនីមួយៗ ទាក់ទងនឹងផ្លូវថ្នល់ដែលមានដូចជា ការឌីហ្សាញកម្រាលផ្លូវ ស្ពាន ប្រព័ន្ធរំដោះទឹក ផ្លូវប្រសព្វ ផ្លាកសញ្ញាចរាចរណ៍ គំនូសសញ្ញាចរាចរណ៍ យែនឌ័រ ការកាត់បន្ថយហានិភ័យគ្រោះមហន្តរាយ និងការប្រែប្រួលអាកាសធាតុ សំដៅធ្វើឱ្យសេចក្តីព្រាងបទដ្ឋានបច្ចេកទេសនេះកាន់តែមានមានលក្ខណៈគ្រប់ជ្រុងជ្រោយ។ បន្ថែមពីនេះទៀត លោកជំទាវរដ្ឋលេខាធិការប្រចាំការ ក៏បានស្នើសុំឱ្យភាគីអូស្ត្រាលីបន្តពង្រីកជួយវិស័យផ្សេងៗទៀត ពិសេសលើវិស័យដឹកជញ្ជូន និងវិស័យផ្លូវដែកនៅកម្ពុជា៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube