ខេត្តកែបៈ អភិបាលរងខេត្តកែប លោកវ៉ៅ សុខាបានបញ្ជាក់ថា គម្រោងសាងសង់ “កំពង់ផែទេសចរណ៍កោះទន្សាយ” ជាជំហានទី ២ បើគិតមកដល់ពេលនេះ សម្រេចការសាងសង់បានប្រមាណជាង ៧០ ភាគរយហើយ។ តាមផែនការកំពង់ផែនេះ គ្រោងនឹងបញ្ចប់នៅចុងខែកុម្ភៈ ឆ្នាំ ២០២៤ ខាងមុខនេះ។ការបញ្ជាក់បែបនេះ ក្នុងឱកាស លោក វ៉ៅ សុខា អភិបាលរងខេត្តកែបបានដឹកនាំមន្ត្រីជំនាញ ចុះត្រួតពិនិត្យវឌ្ឍនភាពគម្រោងសាងសង់កំពង់ផែទេសចរណ៍ និងហេដ្ឋារចនាសម្ព័ន្ធមួយចំនួនលើកោះទន្សាយ ស្ថិតក្នុងក្រុងកែប ខេត្តកែប កាលពីរសៀលថ្ងៃទី ២៥ ខែមករា ឆ្នាំ ២០២៤កន្លងមកនេះ។ អភិបាលរងខេត្តកែបរូបនេះបានឲ្យដឹងថា គម្រោងសាងសង់កំពង់ផែទេសចរណ៍កោះទន្សាយ ជំហានទី២ រួមនឹងហេដ្ឋារចនាសម្ព័ន្ធមួយចំនួនដូចជា ការសាងសង់ផ្លូវបេតុងមួយខ្សែប្រវែង ៨៥០ ម៉ែត្រ ទីតាំងអាងស្តុកទឹកចំណុះ៥០ម៉ែត្រគូប ចំនួន១ អណ្ដូងស្នប់ចំនួន២ និងការបំពាក់ម៉ាស៊ីនភ្លើង១០០kvaចំនួន៣គ្រឿង គឺជាកម្ចីឥណទានរបស់ធនាគារអភិវឌ្ឍន៍អាស៊ី (ADB) ដើម្បីបម្រើដល់ប្រជាសហគមន៍លើកោះទន្សាយ។ គម្រោងហេដ្ឋារចនាសម្ព័ន្ធ កំពង់ផែទេសចរណ៍កោះទន្សាយ ជំហានទី២នេះ មានគម្រោងសាងសង់ផ្លូវចាក់កៅស៊ូ ប្របមាត់សមុទ្រប្រវែងជាង១២គីឡូម៉ែត្រ (១២,៧៥០ម៉ែត្រ) តភ្ជាប់ចាប់ពីចំណុចកំពង់ផែទេសចរណ៍កោះទន្សាយ (ក្រុងកែប) ទៅភ្ជាប់នឹងផ្លូវលេខ១៣៣២ ត្រង់ចំណុចខ្លោងទ្វារវត្តអង្កោល ភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប។ផ្លូវប្របមាត់សមុទ្រនេះ ត្រូវបានសម្ពោធបើកការដ្ឋានសាងសង់ជាផ្លូវការ កាលពីថ្ងៃទី១ ខែមីនា ឆ្នាំ ២០២២ ក្រោមកម្ចីឥណទានធនាគារអភិវឌ្ឍន៍អាស៊ី (ADB) លើគម្រោងទឹកប្រាក់ចំនួនជាង១០,៥លានដុល្លារអាមេរិក។ បន្ថែមនេះ ក្រៅពីគម្រោងហេដ្ឋារចនាសម្ព័ន្ធ កំពង់ផែទេសចរណ៍កោះទន្សាយ ផ្លូវប្របមាត់សមុទ្រ ចាប់ពីចំណុចកំពង់ផែកោះទន្សាយទេសចរណ៍នៅក្នុងក្រុងកែប ទៅឆ្នេរអង្កោល ដែលមានប្រវែងប្រមាណ១២គីឡូម៉ែត្រ និងបំបែកតភ្ជាប់ទៅផ្លូវជាតិលេខ ១៣-៣២ (១២៧៥០ ម៉ែត្រ) គឺនៅមានទីលានចាក់សំរាម និងអាងប្រព្រឹត្តិកម្មទឹកកខ្វក់ផង ជាកម្ចីឥណទានរបស់ធនាគារអភិវឌ្ឍន៍អាស៊ី ADB៕