កណ្ដាល ៖ ផ្លូវក្រាលដីល្បាយថ្មភ្នំចំនួន ១ខ្សែ ប្រវែងជាង ១,៣ ពាន់ម៉ែត្រ, និងផ្លូវក្រាលបេតុងចំនួន ២ខ្សែ ប្រវែងសរុបជាង ១ ពាន់ម៉ែត្រ នៅឃុំព្រែកអញ្ចាញ ស្រុកមុខកំពូល ខេត្តកណ្តាល ស្ថិតក្នុងក្របខណ្ឌក្រសួងអភិវឌ្ឍន៍ជនបទ បានអនុវត្តន៍ស្របតាមបទដ្ឋានបច្ចេក ទេសត្រឹមត្រូវ ដោយផ្លូវនេះបានកំពុងសម្រួលការដំណើរប្រជាពលរដ្ឋ។ ឯកឧត្តម ឈឹម សៅគី រដ្ឋលេខាធិការប្រចាំការ និងជាអនុប្រធានគណៈកម្មាធិការលទ្ធកម្ម (គ.ល) នៃក្រសួងអភិវឌ្ឍន៍ជន បទ នៅថ្ងៃទី ២៩ ខែ មករា ឆ្នាំ ២០២៤ នេះ បានដឹកនាំប្រតិភូចុះពិនិត្យ វាយតម្លៃ លើការងារស្ថាបនាផ្លូវក្រាលដីល្បាយថ្មភ្នំចំនួន ១ ខ្សែ ប្រវែង ១ ៣៤០ ម៉ែត្រ ទទឹង ៨ ម៉ែត្រ កម្រាស់ ០,២ ម៉ែត្រ, ស្ថាបនាលូមូលមុខមួយចំនួន ៧ កន្លែង និងផ្លាកឈ្មោះផ្លូវចំនួន ២ កន្លែង ស្ថិតនៅភូមិឈើទាល, និងផ្លូវក្រាលបេតុងចំនួន ២ ខ្សែ ផ្សេងទៀត ប្រវែងសរុប ១ ០០៥ ម៉ែត្រ កម្រាស់ ០,២ ម៉ែត្រ ស្ថិតនៅ ភូមិកោះរកា ឃុំព្រែកអញ្ចាញ ស្រុកមុខកំពូល ខេត្តកណ្តាល ក្រោមការអនុវត្តគម្រោង នាយកដ្ឋានវិស្វកម្ម នៃក្រសួងការពារជាតិ។ ទាក់ទងគម្រោងផ្លូវខាងលើនេះ, ឯកឧត្តម បានឯកភាព និងវាយតម្លៃខ្ពស់ ចំពោះការខិតខំប្រឹងប្រែង អនុវត្តទៅតាមផែនការ ស្របតាមបទដ្ឋានបច្ចេកទេសបានត្រឹមត្រូវ, ព្រោះផ្លូវមានសារៈសំខាន់ណាស់ និងជាសរសៃរឈាមនៃសេដ្ឋកិច្ច មិនថានៅជនបទ ទីប្រជុំជន ឬនៅទីក្រុងឡើយ។ ជុំវិញបញ្ហាហេដ្ឋរចនាសម្ព័ន្ធនេះដែរ នៅក្នុងអាណត្តិទី ៧ នៃរដ្ឋសភា, រាជរដ្ឋាភិបាលកម្ពុជា នឹងបន្តការ គាំទ្រដល់ការជួសជុល ថែទាំផ្លូវ ស្ពាន និងផ្លូវជនបទ ព្រមទាំងការស្តារស្រះនិងជីកស្រះ អណ្តូងទឹក ដើម្បីទប់ទល់និងភាពរាំស្ងួត និងទឹកជំនន់ជាដើម។ សម្រាប់គម្រោងផ្លូវទាំងពីរខាងលើនេះ, ឯកឧត្តម ឈឹម សៅគី សំណូមពរដល់អ្នកទទួលការធ្វើការត្រួតពិនិត្យ និងថែទាំលើ ផ្លូវ និងសំណង់សិល្បការ្យខាងលើឱ្យបានល្អ ដើម្បីឱ្យមានគុណភាព និងសោភ័ណភាព ក្នុងរយៈពេល ១២ ខែបន្តទៀត ទៅតាមកិច្ច សន្យា និងត្រូវសហការណែនាំ និងបំផុសប្រជាពលរដ្ឋ អាជ្ញាធរមូលដ្ឋានឱ្យចូលរួមថែទាំផ្លូវ និងសំណង់សិល្បការ្យខាងលើ ដោយមាន ការយាមកាមយ៉ាងហ្មត់ចត់ និងកុំឱ្យមានរថយន្តដឹកទំនិញលើសចំណុះធ្វើចរាចរលើផ្លូវ ធ្វើយ៉ាងរក្សាគុណភាពផ្លូវនេះឱ្យបានគង់វង្ស យូរអង្វែង និងចាត់ទុកថាផ្លូវនេះជារបស់ពួកគាត់គ្រប់ៗគ្នា៕