កិច្ចប្រជុំពិភាក្សាស្តីពីការស្នើសុំ ODA សម្រាប់គម្រោង “ការពង្រឹងសុវត្ថិភាពចរាចរណ៍ និងការកែលម្អបរិក្ខារសុវត្ថិភាពនៅតំបន់សាលារៀនក្នុងប្រទេសកម្ពុជា” ជាមួយគណៈប្រតិភូ នៃសាកលវិទ្យាល័យជាតិដឹកជញ្ជូនកូរ៉េ (Korea National University of Transportation) ទីស្កីការក្រសួង៖ នារសៀលថ្ងៃទី១៩ ខែមករា ឆ្នាំ២០២៤ លោកជំទាវ មឹន មាណវី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញទទួលជួបពិភាក្សា ស្តីពីការស្នើសុំ ODA សម្រាប់គម្រោង “ការពង្រឹងសុវត្ថិភាពចរាចរណ៍ និងការកែលម្អបរិក្ខារសុវត្ថិភាពនៅតំបន់សាលារៀនក្នុងប្រទេសកម្ពុជា” ជាមួយគណៈប្រតិភូ នៃសាកលវិទ្យាល័យជាតិដឹកជញ្ជូនកូរ៉េ ។ កិច្ចប្រជុំនេះមានការអញ្ជើញចូលរួមពី ឯកឧត្តម អនុរដ្ឋលេខាធិការ លោក Kim Hyun សាស្រ្តាចារ្យ នៃសាកលវិទ្យាល័យជាតិដឹកជញ្ជូនកូរ៉េ និងសហការី ក្រុមហ៊ុន Daon Daol Cambodia ព្រមទាំងតំណាងអង្គភាពពាក់ព័ន្ធនៃក្រសួងសាធារណការ និងដឹកជញ្ជូន និងមន្ត្រីរាជការ សរុបចំនួន ១៦រូប។ កិច្ចប្រជុំនេះរៀបចំឡើងក្នុងគោលបំណងពិភាក្សាអំពីកិច្ចសហប្រតិបត្តិរវាងប្រទេសទាំងពីរ កម្ពុជា-កូរ៉េ ជាពិសេសរាយការណ៍អំពីដំណើរនៃការស្នើសុំ ODA ធ្វើយ៉ាងណាដើម្បីទទួលបានការអនុម័តពីរដ្ឋាភិបាលកូរ៉េ សម្រាប់គម្រោង “សុវត្ថិភាពនៅតំបន់សាលារៀន-Safe School Zone” ។ គួរបញ្ជាក់ផងដែរថា គម្រោងនេះ មានគោលដៅចំនួនបី គឺ៖ ១. ការបំពាក់បរិក្ខារសុវត្ថិភាពតាមតំបន់សាលារៀន ២. ការបណ្តុះបណ្តាលអប់រំផ្សព្វផ្សាយ និង៣. ការបង្កើតក្រុមអ្នកស្ម័គ្រចិត្ត។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube