ឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន អញ្ជើញចូលរួមកិច្ចប្រជុំក្រុមការងារចំពោះកិច្ច ជាមួយក្រុមហ៊ុន AIAI ពិភាក្សាលើតម្លៃប្រើប្រាស់ផ្លូវហាយវ៉េ តភ្ជាប់ពីផ្លូវជាតិលេខ៦ ចូលទៅកាន់អាកាសយានដ្ឋានអន្តរជាតិសៀមរាប-អង្គរ និងតម្លៃចំណតក្នុងអាកាសយានដ្ឋាន រាជធានីភ្នំពេញ៖ នាព្រឹកថ្ងៃព្រហស្បតិ៍ ទី១១ ខែមករា ឆ្នាំ២០២៤ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានក្រុមការងារចំពោះកិច្ច បានអញ្ជើញចូលរួមកិច្ចប្រជុំជាមួយ ក្រុមហ៊ុន Angkor International Airport Investment (Cambodia) Co., Ltd. (AIAI) ក្រោមការដឹកនាំរបស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងារចំពោះកិច្ចដោះស្រាយបញ្ហាតម្លៃប្រើប្រាស់ផ្លូវហាយវ៉េ តភ្ជាប់ពីផ្លូវជាតិលេខ៦ ចូលទៅកាន់អាកាសយានដ្ឋានអន្តរជាតិសៀមរាប-អង្គរ និងតម្លៃចំណតនៅក្នុងអាកាសយានដ្ឋានអន្តរជាតិសៀមរាប-អង្គរ។ កិច្ចប្រជុំឱកាសនេះ បានប្រព្រឹត្តទៅនៅទីស្តីការក្រុមប្រឹក្សាអភិវឌ្ឍន៍កម្ពុជា មានការអញ្ជើញចូលរួមផងដែរពី តំណាងក្រសួងសេដ្ឋកិច្ច និងហិរញ្ញវត្ថុ តំណាងរដ្ឋលេខាធិការដ្ឋានអាកាសចរណ៍ស៊ីវិល លោកអភិបាលរង នៃគណៈអភិបាលខេត្តសៀមរាប និងថ្នាក់ដឹកនាំ-មន្ត្រីពាក់ព័ន្ធ ដែលជាសមាជិកក្រុមការងារចំពោះកិច្ច ជាច្រើនរូបផ្សេងទៀត។ ជាលទ្ធផលបន្ទាប់ពីការពិភាក្សា និងចរចាគ្នា ភាគីរាជរដ្ឋាភិបាល និងក្រុមហ៊ុន បានឯកភាពលើចំណុចមួយចំនួន ដែលនឹងត្រូវគោរពរាយកាណ៍ជូន សម្តេចធិបតីនាយករដ្ឋមន្ត្រី បន្ទាប់មកនឹងមានការផ្សព្វផ្សាយជាសាធារណៈនាពេលក្រោយ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube