ភ្នំពេញ ៖ អភិបាលរាជធានីភ្នំពេញ លោក ឃួង ស្រេង នៅព្រឹកថ្ងៃទី២០ ខែកក្កដានេះ បានដឹកនាំមន្រ្តីក្រោមឱវាទមួយចំនួន ចុះទៅពិនិត្យស្ថានភាព ទឹកជំនន់ នៅតំបន់មួយចំនួន នៅក្នុងខណ្ឌពោធិ៍សែនជ័យ ខណៈដែលមានជំនន់ទឹកភ្លៀង កំពុងតែយាយីធ្វើឲ្យលំនៅដ្ឋាន របស់ប្រជាពលរដ្ឋមួយចំនួន និងហេដ្ឋរចនាសម្ព័ន្ធ ក្នុងមូលដ្ឋានមួយចំនួន ទទួលរងនូវការលិចលង់ ពិសេសប្រជាពលរដ្ឋ ដែលរស់នៅ តាមដងស្ទឹងព្រែកត្នោត ចំណុចភូមិដូនកុក និងភូមិខ្ចៅ សង្កាត់បឹងធំ ខណ្ឌពោធិ៍សែនជ័យ។ ស្របពេលដែលមានភ្លៀងធ្លាក់យ៉ាងខ្លាំងជាប់គ្នាប៉ុន្មានថ្ងៃមកនេះ បានធ្វើឱ្យតំបន់មួយចំនួន នៅប៉ែកខាងលិចរាជធានី ពិសេសប្រជាពលរដ្ឋដែលរស់នៅស្របតាមដងស្ទឹងព្រែកត្នោត ក្នុងខណ្ឌពោធិ៍សែនជ័យបានរងការលិចលង់ដោយជំនន់ទឹកភ្លៀងនេះ។ លោក ឃួង ស្រេង អភិបាលរាជធានីភ្នំពេញ និងលោកហែម ដារិទ្ធិ អភិបាលខណ្ឌពោធិ៍សែនជ័យ រួមជាមួយមន្ទីរសាធារណការ និងដឹកជញ្ជូនរាជធានីភ្នំពេញ និងអ្នកពាក់ព័ន្ធមួយចំនួនទៀត បានជិះទូក ចុះទៅពិនិត្យជាក់ស្តែង ពីផលប៉ះពាល់តាមមូលដ្ឋានប្រជាពលរដ្ឋដែលរងការលិចលង់ ដើម្បីពិនិត្យមើលពីស្ថានភាពទឹក ក៏ដូចជាតម្រូវការចាំបាច់ របស់បងប្អូនប្រជាពលរដ្ឋថា តើពួកគាត់ចង់បានអ្វី ខ្វះខាតអ្វី តើអាជ្ញាធរអាចជួយអ្វីដល់ពួកគាត់បានភ្លាមៗតែម្តង។ នាឱកាសនោះដែរ លោក អភិបាលរាជធានីភ្នំពេញ បានណែនាំឲ្យមន្រ្តីមូលដ្ឋាន ពិសេស មន្ទីរសុខាភិបាលរាជធានីភ្នំពេញ និងអ្នកពាក់ព័ន្ធទាំងអស់ត្រូវយកចិត្តទុកដាក់ ចុះមកផ្ទាល់ដល់មូលដ្ឋាន ដែលរងការលិចលង់ ដើម្បីជួយអន្តរាគមន៍ ក៏ដូចជាការបង្ការទប់ស្កាត់ ជំងឺដង្កាត់ផ្សេងៗ ដែលអាចបៀតបៀន ទៅលើប្រជាពលរដ្ឋ ដែលកំពុងទទួលរងការលិចលង់ទាំងអស់នេះ។ លោក ឃួង ស្រេង ក៏បានអំពាវនាវ ដល់ប្រជាពលរដ្ឋ ត្រូវមានការប្រុងប្រយ័ត្នខ្ពស់ នៅក្នុងឱកាសដែលរាជធានីភ្នំពេញ រងនូវការជន់លិចលង់ ដោយគ្រោះទឹកជំនន់ លិចផ្ទះសម្បែងប្រជាពលរដ្ឋមួយចំនួន ក្នុងខណ្ឌពោធិ៍សែនជ័យ ជាពិសេស បងប្អូនប្រជាពលរដ្ឋ ដែលកំពុងរស់នៅក្នុងតំបន់ទឹកជំនន់ ត្រូវមានការប្រុងប្រយ័ត្ន ចំពោះកូនចៅតូចៗ កុំឲ្យទៅលេងនៅតាមដងអូរ ស្ទឹង ប្រឡាយ ព្រែក ដែលមានទឹក កំពុងហូរខ្លាំង ខ្លាចមានអ្វីកើតឡើងជាយថាហេតុ។ ក្រៅពីនេះនៅពេលមានអ្វីកើតឡើងចាំបាច់ត្រូវទាក់ទងមកអាជ្ញាធរមូលដ្ឋានផ្ទាល់ ដែលបានត្រៀមកម្លាំងជាស្រេច សម្រាប់ជួយបងប្អូនប្រជាពលរដ្ឋ នៅតាមសង្កាត់ ខណ្ឌ ដោយផ្ទាល់៕