គណៈប្រតិភូក្រសួងសាធារណការ ចុះត្រួតពិនិត្យ អនុគម្រោងសាងសង់ប្រព័ន្ធលូ និងស្ថានីយ៍ប្រព្រឹត្តកម្មទឹកកខ្វក់ ក្នុងខេត្តពោធិ៍សាត់ កំពង់ធំ និងកំពត ក្រសួង​សាធារណការ​ឱ្យ​ដឹងថា​ កាលពីថ្ងៃទី២-៣ ខែមករា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួងចុះត្រួតពិនិត្យ ការងារប្រគល់-ទទួល អនុគម្រោងសាងសង់ប្រព័ន្ធលូ និងស្ថានីយ៍ប្រព្រឹត្តកម្មទឹកកខ្វក់ ក្នុងខេត្តចំនួន៣ ដែលស្ថិតនៅក្រុងពោធិ៍សាត់ ខេត្តពោធិ៍សាត់ ក្រុងស្ទឹងសែន ខេត្តកំពង់ធំ និងក្រុងកំពត ខេត្តកំពត។ ពិធីនេះមានការអញ្ជើញចូលរួមពីឯកឧត្តមអនុរដ្ឋលេខាធិការទទួលបន្ទុក មន្ត្រីជំនាញពាក់ព័ន្ធ មន្ទីរសាធារណការ និងដឹកជញ្ជូនប្រចាំខេត្តទាំង៣ និងតំណាងក្រុមហ៊ុនទីប្រឹក្សាផងដែរ។ ក្រសួង​សាធារណការ​បញ្ជាក់ថា​​ គម្រោងដែលមាននៅខេត្តទាំង៣នេះ គឺស្ថិតក្នុងគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ជំហ៊ាន១(ខេត្តពោធិ៍សាត់) ជំហ៊ានទី២(ខេត្តកំពង់ធំ) និងគម្រោងអភិវឌ្ឍន៍ក្រុងរបៀង២(ខេត្តកំពត) ដោយប្រើប្រាស់ឥណទានពីធនាគារអភិវឌ្ឍន៍អាស៊ី (ADB)៕