[Koh Santepheap Daily] - បើកបរមិនសមរម្យ និងល្មើសច្បាប់ត្រូវពិន័យអោយសមកំហុស
ភ្នំពេញ៖ កាលពីព្រឹកថ្ងៃទី២ ខែមករា ឆ្នាំ២០២៤ បុរសជនជាតិស្វីស ដែលបានបើកបរម៉ូតូធំនៅលើផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានកម្លាំងសមត្ថកិច្ចចរាចរណ៍ប្រចាំការលើផ្លូវល្បឿនលឿននាំខ្លួនមកធ្វើការអប់រំណែនាំផាកពិន័យ និងចុះកិច្ចសន្យា បន្ទាប់ពីបុរសនោះបានបើកបរម៉ូតូដោយភាពឆ្គាំឆ្គង (លើកជើងដាក់លើដៃចង្កូត) ដែលអាចបណ្តាលឱ្យមានគ្រោះថ្នាក់ដល់ខ្លួនឯងផ្ទាល់ និងបង្កគ្រោះថ្នាក់ដល់អ្នកដទៃផងដែរ ។
ក្រសួងសាធារណការ និងដឹកជញ្ជូនក៏បានប្រកាសក្រើនរម្លឹកជាថ្មី អំពីលក្ខខណ្ឌនៃការប្រើប្រាស់ផ្លូវល្បឿនលឿន និងការចេញចូលគន្លងទាំង ៣ប្រភេទ នៅលើផ្លូវល្បឿនលឿនឱ្យបានត្រឹមត្រូវ ដើម្បីគោលការណ៍សុវត្ថិភាព ការជួយកាត់បន្ថយការកកស្ទះ និងមិនចំណាយពេលរង់ចាំយូរ ។
ក្រសួងសាធារណការ និងដឹកជញ្ជូនក៏សង្ឃឹមយ៉ាងមុតមាំថា បងប្អូនអ្នកបើកបរគ្រប់រូប នៅលើគ្រប់ប្រភេទផ្លូវថ្នល់នឹងចូលរួមគោរពច្បាប់ស្តីពីចរាចរណ៍ផ្លូវគោកទាំងអស់គ្នា ដើម្បីកម្ពុជាមានអត្រាគ្រោះថ្នាក់ និងអត្រាបាត់បង់ជីវិត ដោយគ្រោះថ្នាក់ចរាចរណ៍កាន់តែតិចទៅៗ ស្របតាមផែនការជាតិទសវត្សរ៍សកម្មភាព សុវត្ថិភាព ចរាចរណ៍ ផ្លូវគោក ២០២១-២០៣០ ដែលបានដាក់ចេញ និងផ្សព្វផ្សាយជាផ្លូវការ កាលពីថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០២៣ កន្លងទៅ ។
ទន្ទឹមនឹងវិធានការលើអ្នកបើកបរម៉ូតូខាងលើនេះ ប៉ូលិសចរាចរណ៍ គួរតែអនុវត្តវិធានការអប់រំណែនាំផាកពិន័យ និងធ្វើកិច្ចសន្យា លើអ្នកបើកបរមួយចំនួនទៀត ពិសេសលើផ្លូវដែលមានទ្រូងពុះចែកផ្លូវដូចជា ផ្លូវវិមានឈ្នះឈ្នះ ផ្លូវហាណូយ-ភ្នំពេញ ផ្លូវជាតិលេខ៦ ផ្លូវជាតិលេខ៥ ជាដើម គឺអ្នកបើកបរឡានមួយចំនួន ពិសេសឡានដឹកទំនិញធំៗ រួមទាំងឡានកុងតឺន័រផង គឺនៅបើកយឺតៗ លើគន្លងខាងឆ្វេងដៃអែបនឹងទ្រូងផ្លូវ ។ នេះ គឺជាការយល់ខុស និងល្មើសច្បាប់ ដែលត្រូវតែផាកពិន័យអប់រំ និងធ្វើកិច្ចសន្យា ។
មែនទែនទៅ បើអ្នកបានឆ្លងកាត់ការរៀនបើកបរ និងប្រឡងយកបណ្ណបើកបរតាមសមត្ថភាព គឺច្បាស់ជាដឹងថា នៅគន្លងខាងឆ្វេងដៃសម្រាប់តែការបើកបរវ៉ាជែង និងអ្នកបើកបរក្នុងល្បឿនលឿន ។ សម្រាប់អ្នកបើកបរយឺតៗ ត្រូវបើកបរ នៅគន្លងផ្លូវខាងស្តាំដៃ ។
អ្នកបើកបរឡានមួយចំនួននៅបើកយឺតនៅគន្លងខាងឆ្វេងដៃ ហើយគេសុំផ្លូវ បើកស៊ីញ៉ូផង ស៊ីផ្លេផង ក៏នៅតែមិនជៀសមកគន្លងខាងស្តាំ ដោយទុកឱ្យអ្នកវ៉ាជែង ត្រូវបង្ខំចិត្ត វ៉ាខាងស្តាំដៃរបស់ខ្លួនទៅវិញ ។ នេះគឺជាឥរិយាបថ មិនសមរម្យ ហើយក៏មិនត្រូវតាមច្បាប់ចរាចរណ៍ឡើយ ។
យ៉ាងណាក៏ដោយ ការផាកពិន័យ អប់រំ ណែនាំ និងធ្វើកិច្ចសន្យាលើអ្នកបើកបរ ដែលមានឥរិយាបថមិនសមរម្យនេះត្រូវបានអ្នកខ្លះលើកឡើងថា អាចនឹងមិនរាងចាលទេ បើត្រឹមតែធ្វើកិច្ចសន្យាដែលនេះគ្រាន់តែជាគោលការណ៍រដ្ឋបាល។ ដូច្នេះគេចង់ឱ្យកែច្បាប់ចរាចរណ៍ ហើយបង្កើនទោសក្នុងការផាកពិន័យឱ្យច្រើន រួមទាំងការដាក់ពិន័យ ដោយធ្វើការងារសង្គម ដូចជា បោសសម្អាតផ្លូវ លាងបង្គន់សារធារណ និងកាប់ឆ្កាព្រៃជាដើម។
ចំណែកអ្នកបើកបរមិនថា អ្នកបើកបរម៉ូតូ រ៉ឺម៉កម៉ូតូ តុកតុក ឬក៏ឡានទេ គឺត្រូវតែយល់ដឹងពីច្បាប់ចរាចរណ៍ ស្លាកសញ្ញាឱ្យបានត្រឹមត្រូវ ហើយគោរពច្បាប់ចរាចរណ៍នៅពេលធ្វើដំណើរតាមផ្លូវ ព្រមទាំងមានសីលធម៌ក្នុងការបើកបរ ដោយយោគយល់ និងអធ្យាស្រ័យគ្នា ។ លើសលោះបន្តិចបន្តួច គេវ៉ា គេជែងយើងដោយស៊ីផ្លេ សុំផ្លូវជាដើម កុំខឹងគេ អែបកៀនខាង ហើយបើកផ្លូវឱ្យគេទៅមុនទៅ ។
ជារួមអ្នកបើកបរទាំងអស់ត្រូវយល់ច្បាស់ពីការប្រើប្រាស់ផ្លូវអោយត្រឹមត្រូវតាមច្បាប់ ។ បើសិនជាយើងគ្រប់ គ្នាកែចរិតគ្រប់គ្នានោះការបើកបរតាមផ្លូវនឹងកាន់តែរលូន ហើយកាត់បន្ថយបានគ្រោះថ្នាក់ចរាចរណ៍ និងការស្លា.ប់តាមដងផ្លូវ ។ កម្ពុជាត្រូវតែជាប្រទេសដែលប្រជាជនទាំងអស់យល់ និងគោរពច្បាប់ បើសិនជាយើងចង់អោយប្រទេសកាន់តែជឿនលឿន ៕
