ក្រចេះ: នៅថ្ងៃទី០៨ខែ វិច្ឆិកាឆ្នាំ២០២៣នេះមន្រ្តីក្រសួងអភិវឌ្ឍន៍ជនបទបានចុះពិនិត្យមើលផ្លូវលំចំនួន៧ខ្សែ ក្នុងខេត្តក្រចេះដែលរងផលប៉ះពាល់ដោយសាទឹកជំនន់ទន្លេមេគង្គឆ្នាំ២០២៣។ លោក ឌៀប កាណូរ៉ា អនុរដ្ឋលេខាធិការក្រសួងអភិវឌ្ឍន៍ជនបទ បានដឹក នាំក្រុមការងារបច្ចេកទេស នាយកដ្ឋានផ្លូវលំ និងអមដំណើរដោយថ្នាក់ដឹកនាំមន្ទីរអភិវឌ្ឍន៍ជនបទខេត្តក្រចេះចុះពិនិត្យស្ថានភាពផ្លូវចំនួន៧ខ្សែ ក្នុងខេត្តក្រចេះ ដែលរងគ្រោះដោយទឹកជំនន់ក្នុងឆ្នាំ២០២៣នេះ។ ខ្សែទី១៖ ផ្លូវលំនៅពីភូមិក្រូចទៅគីឡូ២៧ ស្ថិតក្នុងឃុំដំរីផុង ស្រុកឆ្លូង ខេត្តក្រចេះ។ ខ្សែទី២ផ្លូវពីភូមិកាប៉ូទៅភូមិម្រើម ស្ថិតក្នុងឃុំដារ ស្រុកចិត្របុរី ខេត្តក្រចេះ។ ខ្សែទី៣ ផ្លូវពីភូមិថ្មរាបឆ្ពោះទៅភូមិបុកទឹក ស្ថិតក្នុងឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។ ខ្សែទី៤ផ្លូវពីភូមិខ្សាត់ទៅភូមិស្ទឹងទ្រ ស្ថិតក្នុងឃុំតាម៉ៅ ស្រុកព្រែកប្រសព្វ ខេត្តក្រចេះ។ ខ្សែទី៥ផ្លូវពីភូមិព្រែកក្តីទៅភូមិក្រសាំង ស្ថិតក្នុងឃុំស្នួល ស្រុកស្នួល ខេត្តក្រចេះ។ ខ្សែទី៦ផ្លូវពីភូមិស្រែទ្រៀកទៅភូមិក្រឡាញ់ ស្ថិតក្នុងឃុំដំរីផុង ស្រុកឆ្លូង ខេត្តក្រចេះ។ ខ្សែទី៧ ផ្លូវពីភូមិប្រហួតទៅភូមិស្រែទ្រៀក ស្ថិតក្នុងឃុំដំរីផុង ស្រុកឆ្លូង ខេត្តក្រចេះ។ លោក លឹម ជាហាវ ប្រធានមន្ទីរអភិវឌ្ឍន៍ជនបទខេត្តក្រចេះបានឲ្យដឹងថា ក្នុងចំណោមផ្លូវដែលរងផលប៉ះពាល់ ទាំង៧ខ្សែនោះ មានពីរខ្សែជាផ្លូវកៅស៊ូ. ហើយពីរខ្សែទៀតកំពុងថែទាំ និងបីខ្សែក្រសួងកំពុងចុះត្រួតពិនិត្យនិងវាយតម្លៃដើម្បីធ្វើសំណើសុំថវិកាពីក្រសួងសេដ្ឋ កិច្ចហិរញ្ញវត្ថុដើម្បីធ្វើការជួសជុលនៅក្នុងឆ្នាំ២០២៤ ខាងមុខនេះ។ លោកបាន បន្ថែមទៀតថា ផ្លូវទាំងអស់នោះយើងនៅអាចធ្វើចរាចរណ៍បាន មិនទាន់ដល់ថ្នាក់ស្ទះចរាចរណ៍នោះឡើយ រីឯផ្លូវលំនៅស្រុកឆ្លងដែលមានការដាច់ផ្លូវចន្លោះពី30ទៅ40ម៉ែត្រនោះ មុននឹងក្រសួងសេដ្ឋកិច្ចហិរញ្ញវត្ថុទម្លាក់ថវិកាឲ្យធ្វើបានល្អដូចដើម មន្ទីរអភិវឌ្ឍន៍បាននិងកំពុងសម្របសម្រួលដើម្បីឲ្យអាចធ្វើចរាចរណ៍ជាបណ្ដោះអាសន្នសិន ៕