ព្រះសីហនុ ថ្ងៃទី០៧ ខែវិច្ឆិកា ឆ្នាំ២០២៣ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានលើកទឹកចិត្ដ និងជំរុញឱ្យបងប្អូនប្រជាពលរដ្ឋ អាចទៅដាក់ពាក្យធ្វើកាតប្រើប្រាស់ឧបករណ៍ ETC ប្រព័ន្ធអេឡិចត្រូនិក ដើម្បីងាយស្រួលក្នុងការធ្វើដំណើរតាមផ្លូវល្បឿនលឿនដោយមិនចាំបាច់រង់ចាំពេលមកដល់កន្លែងច្រកគិតលុយ ដោយមិនខាតពេលវេលា ខណៈក្រុមហ៊ុនបានពន្យារការបង់ថ្លៃតាមប្រព័ន្ធអេឡិចត្រូនិកនេះ បន្ដរយៈពេល១ឆ្នាំទៀត និងការបង់ជាសាច់ប្រាក់ផ្ទាល់គឺក្រុមហ៊ុនពន្យាររយៈពេល៦ខែបន្ដទៀតផងដែរ។ ការគូសបញ្ជាក់របស់សម្ដេចធិបតីនាយករដ្ឋមន្រ្ដីបែបនេះ ក្នុងឱកាសអញ្ជើញចុះជួបសំណេះសំណាលជាមួយបងប្អូនកម្មករ និយោជិតចំនួន ១៥ ១៩៤ នាក់ នៅតាមបណ្តារោងចក្រ សហគ្រាស ដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ក្នុងខេត្តព្រះសីហនុ នាព្រឹកថ្ងៃទី០៧ ខែវិច្ឆិកា ឆ្នាំ២០២៣។ សម្ដេចធិបតី ហ៊ុន ម៉ាណែត បានថ្លែងថា ជាមួយនឹងការអបអរខួប១ឆ្នាំនៃការបើកឱ្យដំណើរការផ្លូវល្បឿនលឿនភ្នំពេញ-ក្រុងព្រះសីហនុ ក្រុមហ៊ុនបានឯកភាពជាមួយរាជរដ្ឋាភិបាល ពេលដែលបើកលើផ្លូវល្បឿនលឿន ក្រុមហ៊ុនគិតលុយ ៨០% ហើយមួយឆ្នាំត្រូវដំឡើងព្រោះគាត់ត្រូវការវិនិយោគ។ ប៉ុន្តែឥឡូវរាជរដ្ឋាភិបាលបានចរចា ក្រុមហ៊ុនក៏មានការយោគយល់ និងបានពន្យារសម្រាប់ការបង់ថ្លៃតាមប្រព័ន្ធ ETC មិនមានការដំឡើងថ្លៃទេសម្រាប់ក្នុងរយៈពេល១ឆ្នាំ ដោយឡែកការជិះលើផ្លូវដោយរង់ចាំបង់ជាសាច់ប្រាក់ផ្ទាល់គឺមានការពន្យារពេលចំនួន ៦ខែទៀតផងដែរ។ សម្តេចធិបតី ហ៊ុន ម៉ាណែត បានថ្លែងបញ្ជាក់ថា៖ «សុំបងប្អូនទៅដាក់ពាក្យ សុំបំពាក់ឧបករណ៍ ETC តាមប្រព័ន្ធអេឡិចត្រូនិចនេះ ស្រួលផងវាមិនចាំបាច់រង់ចាំ ខ្ញុំពេលខ្លះជិះក្បូនមក មកក្បូនហ្នឹង ពេលឡានមកដល់ទ្វារវាបើកស្រាប់ ព្រោះយើងបញ្ជូលកាតក្នុងហ្នឹង ងាយស្រួលអត់ចាំ អត់បាច់ចាំ ហើយបើអ្នកបង់សាច់ប្រាក់ត្រូវតកន្ទុយគ្នាខាតពេល»។ សម្ដេចធិបតីនាយករដ្ឋមន្រ្ដីបានអះអាងថា ការកសាងផ្លូវល្បឿនលឿនពីភ្នំពេញ-ក្រុងព្រះសីហនុនេះ ប្រើថវិកា BOT វិនិយោគដោយក្រុមហ៊ុនចិន និងរាជរដ្ឋាភិបាលកម្ពុជា ដែលចំណាយថវិកាសរុប ជាង ២ពាន់លានដុល្លារ។ ក្នុងថវិកាជាង២ពាន់លានដុល្លារនេះ បើរាជរដ្ឋាភិបាលខ្ចីលុយយកទៅធ្វើផ្លូវ ល្បឿនលឿន ត្រូវបង់ការប្រាក់ ប៉ុន្ដែយើងមិនខ្ចីលុយទេ យើងមានគម្រោងច្រើន ហើយសំខាន់សម្រាប់ សេដ្ឋកិច្ចជាតិ សម្រាប់ប្រជាពលរដ្ឋប្រើប្រាស់ ខណៈវិស័យឯកជនមិនធ្វើ យើងនឹងធ្វើជូន ដូចជា គម្រោងសាងសង់មន្ទីរពេទ្យ និងគម្រោងកសាងផ្លូវធំៗមួយចំនួន សម្រាប់ប្រើប្រាស់។ សម្ដេចធិបតីប្រមុខរាជរដ្ឋាភិបាលបានសង្កត់ធ្ងន់ថា ការសាងសង់ផ្លូវល្បឿនលឿននេះ រាជរដ្ឋាភិបាលទុកឱ្យក្រុមហ៊ុនឯកជនគាត់ធ្វើ ហើយរដ្ឋនឹងជួយដោះស្រាយលក្ខខណ្ឌមួយចំនួនដូចជាបញ្ហាដីធ្លីជាដើម ហើយក្រុមហ៊ុនត្រូវយកកម្រៃមួយចំនួន ហើយនៅគ្រប់ប្រទេសទាំងអស់គេធ្វើដូចនេះ ដែលការវិនិយោគរបស់ក្រុមហ៊ុន គឺយកលុយមកធ្វើការថែទាំផ្លូវ និងដោះស្រាយបញ្ហាផ្សេងៗទៀត។ ក្នុងឱកាសនោះដែរសម្តេចធិបតី ហ៊ុន ម៉ាណែត ក៏បានថ្លែងអរគុណដល់ឯកឧត្ដមឧបនាយករដ្ឋមន្ត្រី ស៊ុន ចាន់ថុល និងឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុរួមទាំងក្រុមការងារដែលបានចរចាសម្រាប់ការវិនិយោគលើផ្លូវល្បឿនលឿនមួយនេះ ដែលផ្លូវមួយនេះគឺបានចំណាយថវិកាសាងសង់ជាង២ពាន់លានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន ៥០ឆ្នាំ។ សម្តេចធិបតីនាយករដ្ឋមន្រ្ដីបានបញ្ជាក់បន្ថែមផងដែរថា ការធ្វើដូចនេះគឺមាននៅគ្រប់ប្រទេសទាំងអស់ ជាក់ស្តែងនៅពេលដែលសម្តេចធ្វើដំណើរទៅសហរដ្ឋអាមេរិក រាល់ពេលដែលធ្វើដំណើរពីរដ្ឋមួយទៅកាន់រដ្ឋមួយទៀត គ្រាន់តែត្រូវបង់ថ្លៃផ្លូវនេះមានច្រើនកន្លែង ព្រោះពីរដ្ឋមួយទៅកាន់រដ្ឋមួយទៀត មានក្រុមហ៊ុនសាងសង់ផ្លូវល្បឿនលឿននេះ ៣ ទៅ៤ក្រុមហ៊ុន សម្រាប់សាងសង់ ដែលនេះគឺជាការចូលរួមរបស់វិស័យឯកជន៕