នាថ្ងៃពុធ ទី២៥ ខែតុលា ឆ្នាំ២០២៣ នៅវិទ្យាស្ថានតេជោសែន សាធារណការ និងដឹកជញ្ជូន លោក សយ សេរីសុវឌ្ឍនៈ នាយករងវិទ្យាស្ថាន តំណាងលោកនាយកស្តីទីវិទ្យាស្ថាន បានអញ្ជើញជាអធិបតី បើកកម្មវិធីបណ្តុះបណ្តាលចំនួន ២ ដើម្បីចែករំលែកចំណេះដឹង និងបង្កើនសមត្ថភាពបន្ថែមជូនដល់ប្អូនៗ និស្សិតវិទ្យាស្ថាន ទាក់ទងនឹងជំនាញការដឹកជញ្ជូនប្រកបដោយនិរន្តរភាព នៅក្នុងតំបន់អាស៊ាន និងបច្ចេកទេសក្នុងការសាងសង់ ថែទាំ និងជុសជុលផ្លូវថ្នល់ និងបច្ចេកវិទ្យាថ្មីៗ ពីប្រទេសជប៉ុន។ កម្មវិធីបណ្តុះបណ្តាលទាំងពីរ ដែលបានប្រារព្ធពិធីបើកនាព្រឹកនេះ រួមមាន៖ (១) ការកសាងសមត្ថភាព (Capacity-building) ស្តីពី “Sustainable Mobility Concepts and Strategies Across ASEAN” ជាកិច្ចសហការរៀបចំរវាង វិទ្យាស្ថាន និងគម្រោង The Sustainable Mobility in Metropolitan Regions (SMMR) អនុវត្តដោយទីភ្នាក់ងារកិច្ចសហប្រតិបត្តិការអាល្លឺម៉ង់ GIZ និង (២) វគ្គបណ្តុះបណ្តាលខ្លី ស្តីពី “បច្ចេកទេសក្នុងការកសាង ថែទាំ និងជុសជុលផ្លូវថ្នល់” ជាកិច្ចសហការរៀបចំរវាង វិទ្យាស្ថាន ក្រុមហ៊ុនជប៉ុន IKEE និងក្រុមហ៊ុនជប៉ុន TANAKA។ វគ្គបណ្តុះបណ្តាលទាំងពីរខាងលើ គ្រោងនឹងរៀបចំជាបន្តបន្ទាប់រហូតដល់ដំណាច់ឆ្នាំ ២០២៣នេះ។