វត្តមានសម្តេចធិបតីនៅក្នុងវេទិកាខ្សែក្រវាត់និងផ្លូវជាឱកាសទាក់ទាញវិនិយោគិនចិន និងភ្ញៀវទេសចរចិនមកកម្ពុជា ភ្នំពេញ៖ អ្នកជំនាញ លើកឡើងថា វត្តមានរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងវេទិកា ខ្សែក្រវាត់ និងផ្លូវ លើកទី៣ នៅរដ្ឋធានីប៉េកាំង ប្រទេសចិន គឺជាឱកាសសម្រាប់កម្ពុជាក្នុងការទាក់ទាញវិនិយោគិនចិន និងភ្ញៀវទេសចរចិនមកប្រទេសកម្ពុជា។ ការទាក់ទាញការវិនិយោគ និងភ្ញៀវទេសចរចិន តាមរយៈសមិទ្ធផលធំៗជាច្រើនដែលសម្រេចបានក្រោមគម្រោងគំនិតផ្តួចផ្តើមខ្សែក្រវាត់ និងផ្លូវ។ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដឹកនាំគណៈប្រតិភូជាន់ខ្ពស់ជាច្រើនរូប ទៅចូលរួមវេទិកាខ្សែក្រវាត់ និងផ្លូវ លើកទី៣ នៅរដ្ឋប៉េកាំ ប្រទេសចិន ចាប់ពីថ្ងៃទី១៦ និងបញ្ចប់នៅថ្ងៃទី១៩ ខែតុលា ឆ្នាំ២០២៣។ គំនិតផ្តួចផ្តើមខ្សែក្រវាត់ និងផ្លូវ(BRI) និងកសាងខ្សែក្រវាត់សេដ្ឋកិច្ចផ្លូវសូត្រ និងផ្លូវសូត្រសមុទ្រសតវត្សរ៍ទី២១ ត្រូវបានផ្តួចផ្តើមឡើងដោយប្រទេសចិនក្នុងឆ្នាំ២០១៣ ដើម្បីកសាងបណ្តាញពាណិជ្ជកម្ម និងហេដ្ឋារចនាសម្ព័ន្ធដែលតភ្ជាប់អាស៊ីជាមួយអឺរ៉ុប និងអាហ្វ្រិក និងលើសពីផ្លូវពាណិជ្ជកម្មផ្លូវសូត្របុរាណ។ ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា លោកបណ្ឌិត គិន ភា បានលើកឡើងថា សម្រាប់ការចូលរួមរបស់សម្តេចធិបតីក្នុងវេទិកាខ្សែក្រវាត់ និងផ្លូវ លើកទី៣ គឺជាឱកាសមួយ ដើម្បីឱ្យសម្តេចធីបតីអាចទាក់ទាញវិនិយោគិនចិន ក៏ដូចជា ការស្រូបទាញនូវភ្ញៀវទេសចរចិនឱ្យមកទស្សនាប្រទេសកម្ពុជា។ លោកបណ្ឌិត មានប្រសាសន៍ដូច្នេះថា៖ដូចយើងដឹងហើយ រាជរដ្ឋាភិបាលថ្មី អាណតិ្តទី៧នេះ ក្រោមការដឹកនាំរបស់សម្តេចធិបតីនេះគឺគោលនយោបាយការទូតរបស់យើងផ្តោតខ្លាំងលើការទូតសេដ្ឋកិច្ច អីចឹងរាល់ពេលដែលសម្តេចធិបតី អញ្ជើញបំពេញបេសកម្មក្រៅប្រទេសលោកតែងតែលើកឡើងអំពីរបៀបវរសេដ្ឋកិច្ច ពាណិជ្ជកម្ម វិនិយោគ និងទេសចរណ៍ គឺមិនដែលខាននោះទេ។ អីចឹង យើងសង្ឃឹមថា តាមរយៈវេទិកានេះ នឹងធ្វើឱ្យវិនិយោគិនចិន សហគ្រាសធំៗរបស់ចិន នឹងអញ្ជើញត្រឡប់មកកាន់កម្ពុជា ជាមួយនឹងការបន្តគម្រោងវិនិយោគដែលមានស្រាប និងបង្កើតនូវគម្រោងវិនិយោគថ្មី ហើយភ្ញៀវទេសចរក៏សង្ឃឹមថា នឹងអញ្ជើញមកទស្សនានៅក្នុងប្រទេសកម្ពុជា»។ ក្នុងវេទិកា ខ្សែក្រវាត់ និងផ្លូវ រាជរដ្ឋាភិបាលកម្ពុជា និងរដ្ឋាភិបាលចិន បានចុះហត្ថលេខាលើចុះអនុស្សរណៈនៃការយោគយល់គ្នា និងកិច្ចព្រមព្រៀងលើឯកសារសំខាន់ៗ ចំនួន ១០ គិតត្រឹមរសៀលថ្ងៃទី ១៧ ខែតុលា ឆ្នាំ២០២៣។ រួមមាន អនុស្សរណៈនៃការយោគយល់គ្នា ស្តីពីការរួមគ្នាជំរុញគម្រោងគន្លឹះវង់ទី៣ សម្រាប់កិច្ចសហប្រតិបត្តិការសមត្ថភាពផលិត និងការវិនិយោគកម្ពុជា-ចិន។ អនុស្សរណៈនៃការយោគយល់គ្នា ស្តីពីការបង្កើតយន្តការការងារសម្រាប់ការអនុវត្ត គម្រោងផែនការកិច្ចសហប្រតិបត្តិការទ្វេភាគី ដើម្បីរួមគ្នាកសាងខ្សែក្រវាត់សេដ្ឋកិច្ចផ្លូវ សូត្រ និងផ្លូវសូត្រសមុទ្រសតវត្សរ៍ទី២១ និង អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការវិនិយោគលើការអភិវឌ្ឍបៃតង និងកាបូនទាប។ ព្រមទាំង កិច្ចព្រមព្រៀងឥណទានសម្បទានសម្រាប់ ហិរញ្ញប្បទានលើគម្រោងសាងសង់ខ្សែបញ្ជូនអគ្គិសនីជនបទ ដំណាក់កាលទី៨ និង អនុស្សរណៈនៃការយោគយល់ ស្តីពីការ បង្កើតយន្តការកិច្ចសហប្រតិបត្តិការផ្លូវរថភ្លើងកម្ពុជា-ចិន និង អនុស្សរណៈនៃការយោគយល់គ្នា និងកិច្ចព្រមព្រៀងលើឯកសារសំខាន់ៗជាច្រើនទៀត៕