ពោធិ៍សាត់ៈ នៅព្រឹកថ្ងៃទី ១១ តុលា ២០២៣ នេះ ដោយមានកិច្ច ចង្អុលការ និងយកចិត្តទុកដាក់គិតគូរ ពីសុវត្ថិភាពប្រជាពលរដ្ឋនោះ លោក ខូយ រីដា ប្រធានគណៈកម្មាធិការសាខាកាកបាទក្រហមកម្ពុជា ខេត្តពោធិ៍សាត់ បានចាត់ក្រុម ការងារដឹកនាំដោយលោក ទេព រ៉ុម នាយករងប្រតិបត្តិសាខា កាកបាទក្រហមកម្ពុជា ខេត្ត សហការជាមួយមន្ត្រីនគរបាល ដឹកនាំដោយលោកវរសេនីយ៍ទោ ឃន សុខា នាយរងការិយាល័យចរាចរណ៍ផ្លូវគោក តំណាងលោកឧត្តមសេនីយ៍ត្រី នូវ តាល់ ស្នងការរងផែនការងារសណ្តាប់ធ្នាប់ នៃស្នងការដ្ឋាននគរបាលខេត្ត និងយុវជនស្ម័គ្រចិត្ត កាកបាទ បានរៀបចំយុទ្ធនាការផ្សព្វផ្សាយ មុនបុណ្យភ្ជុំបិណ្ឌ ស្តីពី «ការចូលរួមលើក កម្ពស់សុវត្ថិភាពចរាចរណ៍ផ្លូវគោក និងបរិយាប័ន្ន នៅកម្ពុជា» នៅចំណុចភ្លើងស្តុប ផ្លូវចូលផ្សារ ភួ ពុយ ស្ថិតក្នុងភូមិរ៉ា សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ ។ ក្នុងឱកាសបើកយុទ្ធនាការផ្សព្វផ្សាយនេះ លោក ទេព រ៉ុម នាយករងប្រតិបត្តិសាខា បានសម្តែងនូវក្តីសោមនស្សរីករាយ និងពាំនាំនូវប្រសាសន៍របស់លោក ខូយ រីដា ប្រធានគណ:កម្មាធិការសាខា ជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងថ្លែងអំណរគុណ យ៉ាងជ្រាល ជ្រៅចំពោះ គណៈកម្មាធិការសុវត្ថិភាពចរាចណ៍ផ្លូវគោកខេត្ត មន្ត្រីសុវត្ថិភាពចរាចរណ៍ ក្មួយៗយុវជនកាកបាទក្រហមកម្ពុជា ដែលតែងតែយកចិត្តទុកដាក់ ក្នុងការចូលរួម អនុវត្តច្បាប់ស្តីពីចរាចរណ៍ផ្លូវគោក ក៏ដូចជា ចូលរួមក្នុងការអប់រំផ្សព្វផ្សាយ និងលើក ទឹកចិត្តដល់បងប្អូនប្រជាពលរដ្ឋយើង ឱ្យចូលរួមលើកកម្ពស់និងពង្រឹងការអនុវត្តច្បាប់ នៅក្នុងព្រះរាជាណាចក្រកម្ពុជាយើង ជាពិសេសក្នុងឱកាសពិធីបុណ្យកាន់បិណ្ឌ–ភ្ជុំបិណ្ឌ ឆ្នាំ២០២៣ នេះ។ លោកបានគូសបញ្ជាក់ថា ក្នុងឱកាសដែលប្រជាពលរដ្ឋធ្វើដំណើរតាមដងផ្លូវ កាន់តែ មមាញឹកនោះ, គ្រោះថ្នាក់ចរាចរណ៍ នៅជាបញ្ហាគួរឱ្យព្រួយបារម្ភ ចំពោះសោកនាដកម្ម នេះ ហើយមូលហេតុចម្បង ដែលបង្កឱ្យមានគ្រោះថ្នាក់ធ្ងន់ធ្ងរនោះ គឺមកពីមនុស្សម្នាក់ៗ ដែលមិនគោរពច្បាប់ចរាចរណ៍ ក្នុងនោះមានដូចជា ការបើកបរលើសល្បឿនកំណត់ ការមិនគោរពសិទ្ធិអាទិភាព មិនគោរពសញ្ញាចរាចរណ៍ មិនពាក់មួកសុវត្ថិភាពត្រឹមត្រូវ ការវ៉ាជែងក្នុងស្ថានភាពគ្រោះថ្នាក់ និងការបើកបរ ក្នុងពេលស្រវឹងជាដើម។ ក្នុងនាមក្រុមការងារ បានអំពាវនាវដល់បងប្អូនប្រជាពលរដ្ឋ អ្នកប្រើប្រាស់ផ្លូវទាំងអស់ មេត្តាយោគយល់ ចំពោះការប្រកាន់យកវិធានការច្បាប់ដ៏តឹងរឹង ចំពោះបទល្មើស ចរាចរណ៍ផ្លូវគោក ហើយដើម្បីចៀសវាង ពីការប្រឈមចំពោះផ្លូវច្បាប់ សូមបងប្អូន គោរពអនុវត្តច្បាប់ ស្តីពីចរាចរណ៍ផ្លូវគោក ឱ្យបានខ្ជាប់ខ្ជួន ដើម្បីការពារអាយុជីវិត ខ្លួនឯងផ្ទាល់ ដើម្បីភាពសុខដុមរម្យនាក្នុង ក្រុមគ្រួសារដើម្បីការពារទ្រព្យសម្បត្តិរបស់ បងប្អូន និងដើម្បីរួមគ្នាលើកកម្ពស់កិត្តិយសសេចក្តីថ្លៃថ្នូររបស់ប្រទេសជាតិយើង។ សាខាកាកបាទក្រហមកម្ពុជាខេត្តពោធិ៍សាត់ មានសេចក្តីសង្ឃឹមជឿជាក់លើអ្នកប្រើ ប្រាស់ផ្លូវគ្រប់រូប នឹងចូលរួមគោរពអនុវត្តច្បាប់ស្តីពីចរាចរណ៍ផ្លូវគោក ក៏ដូចជាអនុវត្ត តាមសេចក្តីអំពាវនាវនេះ ដើម្បីនាំមកនូវសុវត្ថិភាព និងសេចក្តីសុខ ក្នុងឱកាសថ្ងៃឈប់សម្រាកការងារ ខាងមុខនេះ និងបន្តជារៀងរហូតទៅ​ ហើយក្នុងនេះផងដែរ ក៏មានអ្នកចូលរួម ៣៦០ នាក់ បិទចំណាំងផ្លាតម៉ូតូ ១៧០ចែកខិតប័ណ្ណ ស្តីពីការប្រើ ប្រាស់ មួកសុវត្ថិភាព និងយល់ដឹងពីពិការភាពចំនួន ៧០០ សន្លឹក សំណួរ–ចម្លើយ ច្បាប់ចរាចរណ៍ផ្លូវគោកដល់អ្នកបើកបរម៉ូតូ ឆ្លើយសំណួរត្រូវ នឹងបានមួកសុវត្ថិភាព ១អស់ចំនួន ២០ មួកផងដែរ ៕