កំពង់ធំ៖ លោក ជូ កុល្លា ប្រធានមន្ទីរសាធារណការ និងដឹកជញ្ជូន ខេត្តកំពង់ធំនាថ្ងៃទី០៥ ខែតុលាឆ្នាំ២០២៣នេះបានប្រកាសផ្អាកចរាចរណ៍ រថយន្តដឹកទំនិញធុនធ្ងន់គ្រប់ប្រភេទ ជាបណ្តោះអាសន្ន នៅតាមកំណាត់ផ្លូវមួយចំនួន ក្នុងភូមិសាស្ត្រ ខេត្តកំពង់ធំ។ លោកប្រធានមន្ទីរបន្តថា ដោយស្ថានភាពជំនន់ទឹកភ្លៀង បាននឹងកំពុងជន់ឡើងយ៉ាងខ្លាំង ជាហេតុបណ្ដាលឲ្យលិចលង់ នៅតាមកំណាត់ផ្លូវមួយចំនួន ក្នុងភូមិសាស្ត្រខេត្តកំពង់ធំ ដែលស្ថានភាពបែបនេះ ធ្វើឲ្យផ្លូវ–ស្ពាន មិនអាចទ្រនឹងទម្ងន់របស់រថយន្តធុនធ្ងន់បានទេ។ លោកប្រធានមន្ទីរបានបញ្ជាក់ថា ដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតរចនាសម្ព័ន្ធផ្លូវ ថ្នល់ ស្ពាន មន្ទីរសាធារណការនិងដឹកជញ្ជូនខេត្តកំពង់ធំ សូមធ្វើការបិទចរាចរណ៍រថយន្តដឹកទំនិញធុនធ្ងន់គ្រប់ប្រភេទជាបណ្ដោះអាសន្នចំពោះផ្លូវជាតិ មួយចំនួនដូចជា​ទី១ គឺផ្លូវលេខ ៥០C ស្ថិតក្នុងភូមិពោធិតាអ៊ុន សង្កាត់ស្រយ៉ូវ ក្រុងស្ទឹងសែន លេខ០៧ + ០០០ ដល់គីឡូម៉ែត្រលេខ០៨ +០០០) (ចាប់ពីគីឡូម៉ែត្រផ្លូវខេត្តលេខ២៦៤៨៥ ស្ថិត ក្នុងភូមិព្រៃគុយ ឃុំព្រៃគុយ ស្រុកកំពង់ស្វាយ(ចាប់ពីគីឡូម៉ែត្រលេខ០២ + ០០០ ដល់គីឡូម៉ែត្រលេខ០៥ +០០០)។ លោកបានបន្តថា ទី២ ផ្លូវខេត្តលេខ ២៦៤G ស្ថិតក្នុងភូមិក្រសាំង ឃុំពពក ស្រុកស្ទោង (ចាប់ពីគីឡូម៉ែត្រលេខ០៧ ២០០ ដល់គីឡូម៉ែត្រលេខ ០៧ + ៥៥០) ជាបណ្តោះអាសន្នចាប់ពីថ្ងៃជូនដំណឹងនេះ រហូតដល់មានសេចក្តីជូនដំណឹង សារជាថ្មី។ យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ខេត្តកំពង់ធំបានឲ្យដឹងថា គ្រោះទឹកជំនន់នាពេលនេះបានប៉ះពាល់ ២៩ ឃុំសង្កាត់ និងប្រជាជនជាង ៦ ពាន់គ្រួសារ ស្មើនឹង២.៧០៥ ខ្នងផ្ទះ ៕