[Rasmei Kampuchea Daily News] - កម្ពុជា និងថៃ ឯកភាពគ្នាបញ្ចប់ចំណុចសេសសល់នៃ កិច្ចព្រមព្រៀងដឹកជញ្ជូនតាមផ្លូវដែក ឆ្លងកាត់ព្រំដែនប្រទេសទាំងពីរ
ភ្នំពេញ: រដ្ឋមន្ដ្រីក្រសួងសាធារណការនិងដឹកជញ្ជូនកម្ពុជា និងរដ្ឋមន្ដ្រីក្រសួងដឹកជញ្ជូនថៃ បានឯកភាពគ្នា លើការបញ្ចប់នីតិវិធី និងបែបបទក្នុងការបើកដាក់ឱ្យដំណើរការផ្លូវរថភ្លើង សម្រាប់ធ្វើដំណើរឆ្លង កាត់តាមព្រំដែននៃប្រទេសទាំងពីរ ដើម្បីឈានទៅចុះហត្ថលេខា និងបើកសម្ពោធជាផ្លូវការនាពេល ខាងមុខ។
លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានមានប្រសាសន៍ថា ការឯកភាពគ្នានេះ គឺដើម្បីបញ្ចប់ចំណុចសេសសល់ក្នុងកិច្ចព្រមព្រៀងដែលភាគីទាំងពីរ បានលើកឡើងកាលពីពេលកន្លងមក ដើម្បីឈានទៅចុះហត្ថលេខាបញ្ចប់នីតិវិធី និងបែបបទ មួយចំនួន មុននឹងបើកដំណើរការផ្លូវរថភ្លើងឆ្លងកាត់ព្រំដែនរវាងកម្ពុជា និងថៃ។
ថ្លែងប្រាប់ក្រុមអ្នកសារព័ត៌មានក្រោយពីកិច្ចប្រជុំ ស្ដីពីការដឹកជញ្ជូនតាមផ្លូវដែករវាងកម្ពុជា និង ថៃ ជាមួយលោក អាខុម តើមភីតាយ៉ាផៃស៊ីត (Arkhom Termpittayapaisith) រដ្ឋមន្ត្រីក្រសួងដឹកជញ្ជូនថៃ នាព្រឹកថ្ងៃទី០៦ ខែកក្កដា ឆ្នាំ២០១៨ នៅទីស្ដីការក្រសួងសាធារណការ លោកទេសរដ្ឋមន្ដ្រី ស៊ុន ចាន់ថុល បានបញ្ជាក់ថា ក្រុមការងារ នៃក្រសួងទាំងពីរបានពិភាក្សាគ្នាអំពីដំណើរការរបស់រថភ្លើងការដឹកជញ្ជូន របស់រថភ្លើង និងទីកន្លែងចេញ ចូលរបស់រថភ្លើងក្នុងប្រទេសនីមួយៗ ដើម្បីដោះស្រាយបញ្ហារថភ្លើង រត់ទៅមករវាងប្រទេសទាំងពីរ។
លោករដ្ឋមន្ដ្រីបានបន្ដថា ភាគីទាំងពីរបានដោះស្រាយចំណុច ដែលនៅសេស សល់ធំៗចំនួន៣ចំណុច បានរួចរាល់ហើយទាក់ទងនឹងការរៀបចំចំណតស្ថានីយ៍ អន្ដរជាតិក្នុងការឆ្លងការព្រំដែនប្រទេសទាំងពីរតាមផ្លូវរថភ្លើង នីតិវិធី និងបែបបទក្នុងការរៀបចំ ស្ថានីយរថភ្លើង និងចំណុចមួយទៀតគឺការអនុញ្ញាតិផ្ដល់ដី និងទីកន្លែងសម្រាប់សាងសង់ស្ថានីយរថ ភ្លើងតាម ព្រំដែន រវាងប្រទេសទាំងពីរ។
លោកទេសរដ្ឋមន្ត្រីបានលើកឡើងទៀតថាក្រោយពីភាគីទាំងពីរកម្ពុជា ថៃចុះហត្ថលេខាលើកិច្ចព្រម ព្រៀងរួចរាល់ ប្រមុខរាជរដ្ឋាភិបាលនៃប្រទេសទាំងពីរ នឹងអញ្ជើញចូលរួមបើកបើកសម្ពោធជាផ្លូវ ការផ្លូវរថភ្លើង ដោយជិះរថភ្លើងធ្វើដំណើរឆ្លងកាត់ព្រំដែនប្រទេសទាំងពីរ។
លោក Arkhom Termpittayapaisith រដ្ឋមន្ត្រីក្រសួងដឹកជញ្ជូនថៃ បានឱ្យដឹងថា ការតភ្ជាប់ ផ្លូវរថភ្លើងរវាងថៃ និងកម្ពុជានេះ នឹងត្រូវបើកដាក់ឱ្យដំណើរការនាពេលឆាប់ៗខាងមុខនេះ ដើម្បីធ្វើ ដំណើរឆ្លងកាត់ព្រំដែនប្រទេសទាំងពីរ ដើម្បីឱ្យប្រជាជន អាជីវករ ពាណិជ្ជករនៃប្រទេស ទាំងពីរដឹក ជញ្ជូនទំនិញ ផលិតផលផ្សេងៗ ចេញ ចូល កាន់តែលឿនឆាប់រហ័ស និងផ្ដល់ភាពងាយស្រួល ថែម ទៀត។ ឯកឧត្ដមសង្ឃឹម និងជឿជាក់ថា ក្រោយពីការឯកភាពគ្នា បញ្ចប់ នីតិវិធី និងបែបបទរវាង ក្រសួងទាំងពីរក្នុងការបើកដំណើរផ្លូវដែកឆ្លងកាត់ព្រំដែននេះរួចហើយ គឺយ៉ាងយូរបំផុតត្រឹមតែបីខែ ខាងមុខទៀត នាយករដ្ឋមន្ដ្រីនៃប្រទេសទាំងពីរ នឹងធ្វើដំណើរឆ្លងកាត់ព្រំដែន បើកជាផ្លូវការផងដែរ។
ជាមួយគ្នានេះដែរប្រទេសថៃនឹងផ្ដល់ដែកប្រវែងជាង ៦០គីឡូម៉ែត្រមកកម្ពុជា ដើម្បីយកមកផ្លាស់ប្ដូរ ផ្លូវរថភ្លើងណាចាស់ៗ និងជួសជុលឡើងវិញ ដើម្បីធ្វើយ៉ាងណាឲ្យផ្លូវរថភ្លើង មានភាពរឹងមាំបន្ថែមទៀត៕
