អ្នកក្នុងវិស័យដឹកជញ្ជូន៖ កំពង់ផែអន្តរជាតិកោះកុង នឹងដើរតួនាទីសំខាន់សម្រាប់ដឹកទំនិញទៅទីផ្សារអន្តរជាតិ អ្នកនៅក្នុងវិស័យដឹកជញ្ជូន លើកឡើងថា កំពង់ផែកោះកុងអន្តរជាតិខេត្តកោះកុង ដែលទើបនឹងសម្ពោធដាក់ឱ្យប្រើប្រាស់ជាសាកល្បងនឹងក្លាយជាផ្លូវដឹកជញ្ជូនទំនិញតាមសមុទ្រជាលក្ខណៈពាអន្តរជាតិដំបូងគេ ជាពិសេស ការដឹកជញ្ជូនកសិផលរបស់កម្ពុជាទៅកាន់ទីផ្សារអន្តរជាតិ។ កំពង់ផែសមុទ្រអន្តរជាតិខេត្តកោះកុង ត្រូវបានវិនិយោគ ដោយក្រុមហ៊ុន កោះកុងផត មេនេចម៉ិន ឯ.ក (Koh Kong Port Management Co Ltd) បានសម្ពោធដាក់ឱ្យដំណើរការសាកល្បងកាលពីថ្ងៃទី២៥ ខែកញ្ញា ឆ្នាំ២០២៣។ វត្តមានកំពង់ផែសមុទ្រលំដាប់អន្តរជាតិ នឹងមានតួនាទីយ៉ាងសំខាន់សម្រាប់ការដឹកជញ្ជូនទំនិញតាមផ្លូវទឹកក្នុងបរិមាណច្រើន ពិសេស ការដឹកជញ្ជូនទំនិញកសិផលពីកម្ពុជាទៅថៃ និងទៅប្រទេសចិនដែលជាទីផ្សារធំសម្រាប់កម្ពុជា។ ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា ប្រាប់វិទ្យុបាយ័នថា កំពង់ផែអន្តរជាតិកោះកុងនេះ នឹងក្លាយជាហេដ្ឋារចនាសម្ព័ន្ធដឹកជញ្ជូនទំនិញដ៏សំខាន់សម្រាប់តភ្ជាប់រវាកម្ពុជា-ថៃ ពិសេស ការដឹកជញ្ជូនកសិផលរបស់កម្ពុជាទៅកាន់ទីផ្សារប្រទេសថៃ ក៏ដូចជា ទៅកាន់ទីផ្សារប្រទេសចិន។ លោក ជា ចាន់ដារ៉ា មានប្រសាសន៍ថា៖«ផ្តល់ភាពងាយស្រួលរវាងប្រទេសទាំងពីរនៃការដឹកជញ្ជូនពីប្រទេសថៃមកកម្ពុជា។សម្រាប់ប្រទេសកម្ពុជាយើងអាចនាំចេញទៅវិញពាក់ព័ន្ធនឹងវិស័យកសិកម្ម។យើងអាចនិយាយបានថា ការដឹកជញ្ជូនតាមកំពង់ផែបានផ្តល់ប្រយោជន៍ឱ្យភាគីទាំងសង់សាងហ្នឹងឯង។ ហើយមួយទៀតនោះ ប្រសិនបើ មានទំនិញណាមួយពាក់ព័ន្ធ ដែលត្រូវការកប៉ាល់ធំៗ ជាទូទៅទំនិញនៅប្រទេសកម្ពុជា មិនមានន័យថា តាមផ្លូវទឹកមានលក្ខណៈជាទូកុងតឺណ័រទាំងស្រុងទេគឺ មានទំនិញមួយចំនួនមកជាលក្ខណៈម៉ៅជាកប៉ាល់មួយដាច់តែម្តង់ កប៉ាល់ធំៗតែម្តង់។ អីចឹងខ្ញុំគិតថា វាអាចនិយាយបានថា ឧទាហរណ៍ ការកសាងហេដ្ឋរចនាសម្ព័ន្ធនៅខេត្តកោះកុង ត្រូវការគ្រឿងសំណង គ្រឿអ្វីផ្សេងៗ វាអាចចូលទាំងកប៉ាល់ប្រទេសចិនអីទៀតផង»។ លោក ជា ចាន់ដារ៉ា បន្តទៀតថា ការបង្កើនឱ្យមានកំពង់ផែអន្តរជាតិនេះ កាន់តែច្រើននឹងរួមចំណែកជួយទាក់ទាញវិនិយោគិនឱ្យចូលមកបណ្តាក់ទុនផ្ទាល់ ដើម្បីបង្កើនសេដ្ឋកិច្ចជាតិ ថែមទៀតផង។ លោកបន្តថា៖«និយាយឱ្យចំ បង្កើតឱ្យបានច្រើនមកនូវហេដ្ឋរចនាសម្ព័ន្ធយើងពាក់ព័ន្ធនឹងផ្លូវទឹកឱ្យបានច្រើន ការដឹកជញ្ជូនយើង លំហូរបានសេដ្ឋកិច្ចល្អ»។ កំពង់ផែកោះកុង មានទីតាំងស្ថិតនៅភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង។ កំពង់ផែកោះកុងនឹងផ្តល់នូវជម្រើសតម្លៃសមរម្យ និងសុវត្ថិភាពសម្រាប់ការដឹកជញ្ជូនទំនិញទៅកាន់ទីផ្សារអន្តរជាតិ។ លោកស្រី អ៊ី នារីនេត អភិបាលរងខេត្តកោះកុង ថ្លែងក្នុងកម្មវិធីសម្ពោធថា កំពង់ផែននេះ នឹងចាប់ផ្តើមដឹកទំនិញសម្រាប់នាំចេញទៅទីផ្សារអន្តរជាតិពីពេលនេះតទៅ៕