ក្នុង​ជំនួប​ជាមួយមន្រ្តី​ទូតជប៉ុន រដ្ឋលេខាធិការ​ប្រចាំការ​ក្រសួង​សាធារណការ​និងដឹកជញ្ជូន​បាន​​លើកឡើង​ពី​គម្រោង​ត្រៀម​សម្ពោធ​បើក​ឲ្យ​ប្រើប្រាស់កំណាត់ផ្លូវជាតិលេខ ៥ នាពេល​ឆាប់ៗ​​ខាងមុខ​នេះ។ កាលពី​ថ្ងៃទី ២៥ ខែកញ្ញា ឆ្នាំ ២០២៣ លោកជំទាវ កុយ សុដានី រដ្ឋលេខាធិការប្រចាំការក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយលោក TANINAI Ichitomo រដ្ឋមន្រ្តីទូត (ទីប្រឹក្សាទូត) និងជាអនុប្រធាន​​​បេសកកម្មការទូតនៃស្ថានទូតជប៉ុនប្រចាំនៅព្រះរាជាណាចក្រកម្ពុជា។ ក្នុង​ជំនួបបានពិភាក្សាអំពីគម្រោងផែនការសកម្មភាពការងារ កិច្ចសហប្រតិបត្តិការរួមគ្នារវាងក្រសួងសាធារណការ និង​ដឹក​ជញ្ជូន និងស្ថានទូតជប៉ុនជុំវិញគម្រោងការងារសំខាន់ៗដែលក្រសួងកំពុងអនុវត្តកន្លងមករហូតដល់ពេលបច្ចុប្បន្នដូច​ជា៖ ការកសាងផ្លូវជនបទ និងការសាងសង់ផ្លូវជាតិលេខ ៥ និងការតភ្ជាប់អាស៊ាន ការអភិវឌ្ឍ កាបូមស្តារគន្លងនាវា និងការអភិវឌ្ឍកំពង់ផែក្រុងព្រះសីហនុ ការអនុវត្តគម្រោងជំនួយបច្ចេកទេសធ្វើឱ្យប្រសើរឡើងប្រព័ន្ធភស្តុភារកម្មកម្ពុជា ជំហាន​​ទី១ និងទី២ ការសាងសង់ស្ថានីយចម្រោះទឹកកខ្វក់ខាងត្បូងរាជធានីភ្នំពេញ ដែលគ្រោងបញ្ចប់ក្នុងឆ្នាំ២០២៣ និងគម្រោងជំនួយបច្ចេកទេសថ្មីៗដូចជាគម្រោងធ្វើឱ្យប្រសើរឡើងប្រព័ន្ធភស្តុភារកម្មកម្ពុជាជំហានទី៣ ការសិក្សាផែនទីនាវាចរណ៍សមុទ្រ ដែលគ្រោងនឹងអនុវត្ត​នៅ​ចុងឆ្នាំ២០២៣។ ក្នុង​ឱកាស​នោះ​លោក​ជំទាវ កុយ សុដានី បានជម្រាបជូនអំពីគម្រោងផែនការសកម្មភាពការងារ ១០០ ថ្ងៃ របស់ក្រសួង រួមមានការត្រៀមសម្ពោធបើក​ឲ្យ​ប្រើប្រាស់កំណាត់ផ្លូវជាតិលេខ ៥ ការ​ទស្សនកិច្ចផ្លូវល្បឿនលឿនភ្នំពេញ-បាវិត និង​ច្រកទ្វារព្រំដែនបាវិត។ ទាក់ទងសំណើរបស់ក្រុមហ៊ុនតំបន់សេដ្ឋកិច្ចពិសេសខេត្តកោះកុងជប៉ុនយ៉ាស៊ិគិ ពីការជួសជុលឡើងវិញកំណាត់ផ្លូវប្រវែង ១០០ ម៉ែត្រក្នុងតំបន់ទ្រនាប់ (Buffer Zone) នៃច្រកទ្វារអន្តរជាតិចាំយាម (កម្ពុជា)-ហាត់លឹក(ថៃ) សំដៅ​ជួយ​សម្រួលការដឹកជញ្ជូនទំនិញនាំចេញពីតំបន់សេដ្ឋកិច្ចពិសេសខេត្តកោះកុង​ទៅកាន់កំពង់ផែប្រទេសថៃ លោកជំទាវរដ្ឋលេខាធិការប្រចាំការបាន​សន្យានឹង​លើកយកទៅពិភាក្សាផ្ទៃក្នុងជាមួយរដ្ឋបាលខេត្ត​និងស្ថាប័នពាក់ព័ន្ធ។ ប្រទេសជប៉ុន (JICA) តែងតែសហការនិងផ្ដល់ជូនកម្ពុជានូវជំនួយទាំងសម្ភារ និងបច្ចេកទេសផ្សេងៗលើផ្នែកជាច្រើនក្នុងវិស័យសាធារណការ និងដឹកជញ្ជូន រួមមាន៖ គម្រោងធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា គម្រោងធ្វើឱ្យប្រសើរឡើងនូវសុវត្ថិភាពចរាចណ៍លើដងផ្លូវជាតិសំខាន់ៗក្នុងព្រះរាជាណាចក្រកម្ពុជា និងគម្រោងលើកកម្រិតគុណភាពផ្លូវជាតិលេខ៥ (ព្រែកក្តាម-បន្ទាយមានជ័យ) ជាដើម។ ការធ្វើឲ្យប្រសើរឡើងវិញនៃផ្លូវជាតិលេខ៥ គឺជាគម្រោងស្ដារហេដ្ឋារចនាសម្ព័ន្ធដ៏ធំមួយនៅក្នុងប្រទេសកម្ពុជា ដោយសារផ្លូវមួយខ្សែនេះ មានប្រវែងវែងតភ្ជាប់ពីរាជធានីភ្នំពេញ រហូតទៅដល់ច្រកព្រំដែនកម្ពុជា-ថៃ ភាគពាយព្យ ឆ្លងកាត់ខេត្តចំនួន ៥ រួមមាន៖ កណ្ដាល, កំពង់ឆ្នាំង, ពោធិ៍សាត់, បាត់ដំបង, និងបន្ទាយមានជ័យ។ ផ្លូវជាតិលេខ៥ គឺជាផ្លូវអាស៊ាន​ហាយវ៉េ​លេខ១ ហើយក៏ជាផ្លូវសសៃឈាមសេដ្ឋកិច្ចដ៏សំខាន់របស់កម្ពុជា។ បើតាមក្រសួងសាធារណការ និងដឹកជញ្ជូនបា គម្រោងធ្វើឲ្យប្រសើរឡើងវិញផ្លូវជាតិលេខ ៥ បែងចែកចេញជា ៣ កំណាត់​​ផ្សេងៗគ្នាគឺផ្នែកខាងជើង, តំបន់កណ្ដាល, និងផ្នែកខាងត្បូង ចាប់ពីព្រែកក្តាមខេត្តកណ្ដាល​រហូតទៅដល់ប៉ោយប៉ែត ខេត្តបន្ទាយមានជ័យ មានប្រវែងសរុប ៣៦៦ គីឡូម៉ែត្រ ដែលបានបើកការដ្ឋានសាងសង់កាលពីឆ្នាំ ២០១៨ ក្រោមកម្ចីឥណទានសម្បទានពីរាជរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA) ដែល​ចំណាយប្រមាណ ៥០០ លានដុល្លារ៕