ផ្លូវប្របមាត់ប្រឡាយមួយខ្សែ​ដែល​បាក់ស្រុតអស់មួយផ្នែកធំ ដោយសារតែកម្លាំងទឹកហូរ​ធ្លាក់មកពីផ្នែកខាងស្ទឹងស្រុកបវេល ពេលនេះត្រូវបានមន្ត្រីនៃមន្ទីរជំនាញជួសជុលឡើងវិញ។ ពលរដ្ឋ​ឈ្មោះ រឿម ប៊ុនធឿត រស់នៅក្បែរចំណុចកើតហេតុ ដែលស្ថិតនៅចំណុច​ស្ពានភូមិអូរស្លាប៉ាង ឃុំតាគ្រាម ស្រុកបាណន់ ខេត្តបាត់ដំបង បានបង្ហាញក្តី​ត្រេកអរចំពោះអាជ្ញាធរមូលដ្ឋានព្រមទាំងមន្ត្រីនៃមន្ទីរជំនាញ ដែលបានយកចិត្តទុកដាក់​ជួសជុលបានទាន់ពេលវេលា។ កាលពីថ្ងៃទី១៦ ខែកញ្ញា ឆ្នាំ២០២៣ ក្រោយពីមានភ្លៀងធ្លាក់ផ្ទួនៗ​ទឹកហូរធ្លាក់ពីស្ទឹងបវេល​ចូលអូរដូនពៅ ហើយកម្លាំងទឹកហូរមានសន្ទុះខ្លាំង​ធ្វើឲ្យបាក់ស្រុតផ្លូវប្របមាត់ប្រឡាយ។ ប្រជាពលរដ្ឋក្នុងភូមិមានក្តីបារម្មណ៍ ដោយសារ​ផ្លូវប្របមាត់ប្រឡាយនេះ​មាន​ភាព​ចាំបាច់​​​ ហើយ​បើសិនជាទឹកមិនថមថយ​ទឹកភ្លៀងនៅតែបន្តធ្លាក់ អាច​នឹង​ប៉ះពាល់ដល់ផល​ដំណាំ​ថែមទៀត។