បាត់ដំបង ៖ ដើម្បីឆ្លើយតបតាមសំណូមពរ និងតម្រូវការជាក់ស្តែងជូនប្រជាពលរដ្ឋកាន់តែលឿន និងជឿទុកចិត្តនោះ អាជ្ញាធរស្រុកបាណន់ បានចាប់ផ្តើមស្ថាបនាផ្លូវបេតុងអាមេមួយខ្សែចូលទៅកាន់តំបន់រដ្ឋបាលស្រុក ដោយប្រេីបា្រស់មូលនិធិផ្ទាល់របស់រដ្ឋបាលស្រុកបាណន់ ស្ថិតនៅចំណុចភូមិអន្លក់កោង ឃុំឈេីទាល ស្រុកបាណន់ ខេត្ដបាត់ដំបង ដែលពិធីបួងសួងក្រុងពាលីសុំសេចក្តីសុខចម្រើន និងបើកការដ្ឋានសាងសង់នេះធ្វើឡើងតាមបែបព្រហ្មញ្ញសាសនា ដោយមានការចូលរួមពីលោក ស្រេង សុខា អភិបាលស្រុក និងប្រធានក្រុមប្រឹក្សាស្រុក មន្ត្រីរាជការតាមបណ្ដាការិយាល័យជុំវិញស្រុក ព្រមទាំងកងកម្លាំងប្រដាប់អាវុធទាំងបីប្រភេទនៃស្រុកបាណន់ ខេត្តបាត់ដំបង ។ លោក ស្រេង សុខា បានឱ្យដឹងថា ផ្លូវបេតុងដែលកំពុងចាប់ផ្ដេីមស្ថាបនានាពេលនេះ មានការបំពាក់បង្គោលនិងភ្លើងសូឡា អមសងខាងផ្លូវ មានស្ពាន និងក្លោងទ្វារសាលាស្រុកបាណន់ ហើយផ្លូវបេតុងមួយខ្សែនេះ ត្រូវបានចាត់ទុកថាជាសមិទ្ធផលថ្មីមួយទៀតរបស់ស្រុក នាឆ្នាំ២០២៣នេះ ក្នុងចំណោមសមិទ្ធផលសំខាន់ៗជាច្រើនទៀតដែលរដ្ឋបាលស្រុក បាននិងកំពុងខិតខំធ្វើការកសាងស្ថាបនាឡើង ដេីម្បីឆ្លេីយតបទៅនឹងតម្រូវការរបស់ប្រជាពលរដ្ឋ ដែលបានមកទទួលយកសេវារដ្ឋបាលសាធារណៈផ្សេងៗទៀត ពីរដ្ឋបាលស្រុកបាណន់ កាន់តែមានភាពងាយស្រួល និងលឿន អាចជឿទុកចិត្តបាន ប្រកបដោយប្រសិទ្ធភាព តម្លាភាព ហើយក្នុងនោះសម្រាប់ភ្ញៀវទេសចរជាតិ និងអន្តរជាតិ ព្រមទាំងបានចូលរួមក្នុងការលេីកកម្ពស់សោភ័ណភាពនៃទឹកដីស្រុកបាណន់ ក៏ដូចជាការចូលរួមចំណែកលេីកកម្ពស់ដល់វិស័យទេសចរណ៍ក្នុងស្រុក ឱ្យកាន់តែមានការអភិវឌ្ឍន៍រីកចម្រើនស្រស់បំព្រង ដោយសារតែវិស័យទេសចរណ៍ បានដើរតួនាទីយ៉ាងសំខាន់ក្នុងការរួមចំណែកលើកកម្ពស់ដល់វិស័យការងារនិងការលើកកម្ពស់សេដ្ឋកិច្ចសង្គមបានយ៉ាងល្អថែមទៀតផង ខណៈដែលស្រុកបាណន់ មានប្រាសាទបាណន់ និងការជិះឡូរីលេងនៅតំបន់ជើងភ្នំបាណន់ គឺជារមណីយដ្ឋានវប្បធម៌ និងកែច្នៃបែបធម្មជាតិដ៏សំខាន់របស់ស្រុកបាណន់ ដែលកំពុងមានការទាក់ទាញនូវកំណើនភ្ញៀវទេសចរឱ្យមកលេងកម្សាន្តមានការកើនឡើងជាបន្តបន្ទាប់ ។ លោក អភិបាលស្រុកបាណន់ បានបន្តទៀតថា តាមរយៈការកសាងផ្លូវបេតុងនេះដែរ ប្រជាពលរដ្ឋជាអ្នកទទួលផលបាននិងកំពុងតែមានការសប្បាយរីករាយ និងមានការរំពឹងទុកថា បន្ទាប់ពីផ្លូវនេះស្ថាបនារួចភ្ញៀវទេសចរណ៍និងមានការកើនឡើងជាក់ជាមិនខានឡើយ ។ លោក ស្រេង សុខា បានអំពាវនាវដល់ប្រជាពលរដ្ឋនៅក្នុងស្រុកបាណន់ ក៏ដូចប្រជាពលរដ្ឋទូទៅ ជាពិសេសអាណាព្យាបាលគ្រប់រូប សូមចូលរួមអប់រំណែនាំដល់កូនចៅរបស់ខ្លួនឱ្យបានជាប់ជាប្រចាំក្នុងការធ្វើដំណើរត្រូវគោរពច្បាប់ចរាចរណ៍ ជិះម៉ូតូត្រូវពាក់មួកសុវត្ថិភាព ពេលបើកបរយានយន្តគ្រប់ប្រភេទ ទោះទៅទីជិត ឬឆ្ងាយត្រូវពាក់ខ្សែក្រវ៉ាត់ឱ្យបានត្រឹមត្រូវ ហេីយក្នុងពេលបេីកបរមិនត្រូវពិសាគ្រឿងស្រវឹងនោះដែរ ដើម្បីកាត់បន្ថយនូវអត្រាគ្រោះថ្នាក់ដល់ខ្លួនឯងផងនិងដល់អ្នកដទៃនៅតាមដងផ្លូវផងដែរ ។ តាមរយៈសមិទ្ធផល ដែលបានកើតឡើង និងកំពុងកសាងឡេីងនាពេលនេះ ត្រូវបានលោកអភិបាលស្រុកបាណន់ ស្រេង សុខា បានសំដែងអំណរគុណផងដែរដល់សប្បុរសជន ទាំងក្នុងនិងក្រៅប្រទេស និងអាជីវករក្នុងស្រុក ដែលតែងតែបានចូលរួមជួយឧបត្ថម្ភគាំទ្រ ទាំងថវិកានិងសម្ភារៈ ក្នុងការស្ថាបនា ដូចជាការពង្រីកក្លោងទ្វារចូលសាលាស្រុក និងស្ពានបេតុង ក្នុងន័យនៃការចូលរួមប្រកបដោយវប្បធម៌ចែករំលែក ដើម្បីធ្វើឱ្យស្រុកបាណន់ កាន់តែមានការរីកចម្រើនជាបន្តបន្ទាប់ថែមទៀត ៕