វិទ្យាស្ថានតេជោសែន សាធារណការ និងដឹកជញ្ជូន នៅព្រឹកថ្ងៃទី១២ ខែកញ្ញា ឆ្នាំ២០២៣ បានរៀបចំពិធីបើកសិក្ខាសាលា ពិនិត្យ លើសេច ក្ដីព្រាងកម្មវិធីបណ្ដុះបណ្ដាល និងកម្មវិធីបណ្ដុះ បណ្ដាលសាកល្បង នៃគម្រោង “កសាងសម្ថភាពស្ដីពីវីធីសាស្រ្តថែទាំផ្លូវ-ថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាព នៅបណ្ដាប្រទេសកម្ពុជា-ឡាវ-ណាម ក្រោមអធិបតីភាព ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន។ ពិធីនេះ បានប្រព្រឹត្តទៅនៅសណ្ឋាគារ រ៉ាហ្វលឡឺរ៉ូយ៉ាល់ (Raffles Hotel Le Royal) រាជធានីភ្នំពេញ ព្រមទាំងមានសិក្ខាកាមប្រមាណ ៦៥ នាក់ចូលរួមក្នុងសិក្ខាសាលានេះ និងតាមប្រព័ន្ធអនឡាញ។ ថ្លែងស្វាគមន៍ចំពោះអង្គពិធី ឯកឧត្តម ហឿន សំនៀង បានមានប្រសាសន៍ថា ចាប់តាំងពីការប្រែក្លាយ និងតម្លើងមកជាវិទ្យាស្ថានតេជោសែន សាធារ ណការ និងដឹកជញ្ជូន អស់រយៈ ពេលជាងបីឆ្នាំកន្លងមកនេះ ថ្នាក់ដឹកនាំ និងក្រុមការងាររបស់វិទ្យាស្ថានបានខិតខំប្រឹងប្រែងបំពេញការងារយ៉ាងសកម្ម ទាំងការងារស្នូល និងការស្វែងរកកិច្ចសហការ គាំទ្រពីដៃគូជាតិ និងអន្តរជាតិ ក្នុងគោលដៅឆ្ពោះទៅរកចក្ខុវិស័យរួម របស់វិទ្យាស្ថានផ្ទាល់ ក៏ដូចជារបស់ក្រសួងសាធារណការ និងដឹកជញ្ជូន ដែលគោលដៅនោះគឺ “ការកសាង និងពង្រឹងធនធានមនុស្សក្នុងវិស័យសាធារណការ និងដឹកជញ្ជូន”។ តួយ៉ាង កម្មវិធីសិក្ខាសាលាពិនិត្យ និងពិភាក្សាលើសេចក្តីព្រាងកម្មវិធីបណ្តុះ បណ្តាល និងការបណ្តុះបណ្តាលសាកល្បង នៃគម្រោងកសាងសមត្ថភាព ស្តីពីវិធីសាស្រ្តថែទាំផ្លូវ-ថ្នល់ ដើម្បីលើកកម្ពស់ហេដ្ឋារចនាសម្ព័ន្ធប្រកបដោយចីរភាព នៅបណ្តាប្រទេសកម្ពុជា ឡាវ និងវៀតណាម” នាឱកាសនេះ គឺជាសក្ខីភាពនៃសមិទ្ធិផលថ្មីមួយទៀត របស់វិទ្យាស្ថានតេជោសែន សាធារណការ និងដឹកជញ្ជូន ដែលនឹងឈានឆ្ពោះទៅការរៀបចំវគ្គបណ្តុះបណ្តាលបច្ចេកទេសស្តីពីវិធីសាស្រ្តថែទាំផ្លូវ-ថ្នល់ មិនសម្រាប់តែប្រទេសកម្ពុជាប៉ុណ្ណោះទេ ប៉ុន្តែសម្រាប់ប្រទេសវៀតណាម និងឡាវ ផងដែរ។ សិក្ខាសាលាពិនិត្យ និងពិភាក្សាលើសេចក្តីព្រាងកម្មវិធីបណ្តុះបណ្តាល និងការបណ្តុះ បណ្តាលសាកល្បង នាថ្ងៃនេះ គឺជាការចាំបាច់ណាស់ ដែលត្រូវការ ការចូលរួមចំណែកពីភាគីពាក់ព័ន្ធ ជួយពិនិត្យផ្ទៀង ផ្ទាត់ ផ្តល់ធាតុចូល និងយោបល់បន្ថែម ទៅលើលទ្ធផលនៃការរៀបចំកម្មវិធីបណ្តុះ បណ្តាល ឬហៅថា សេចក្តីព្រាងកម្មវិធីបណ្តុះបណ្តាល ក្នុងន័យជួយកែលម្អឱ្យការរៀបចំវគ្គបណ្តុះបណ្ដាលជូនដល់សិក្ខាកាមគោលដៅ នៃគម្រោងនេះ កាន់តែល្អប្រសើរឡើង និងមានលក្ខណៈគ្រប់ជ្រុងជ្រោយ។ លើស ពីនេះទៅទៀត ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានមានប្រសាសន៍ បញ្ជាក់ថា កិច្ចពិភាក្សាមួយនេះ ក៏បានផ្តល់ឱកាសដល់ប្រទេសទាំងបី ដើម្បីសិក្សាពីគ្នាទៅវិញទៅមក ដែលជាផ្នែកសំខាន់មួយទៀត ដែលនឹងនាំមកនូវផលប្រយោជន៍រួមទាំងថ្នាក់ជាតិ និងអន្តរជាតិ។ ក្នុងន័យនេះ វិទ្យាស្ថានតេជោសែន សាធារណការ និងដឹកជញ្ជូន នៃព្រះរាជាណាចក្រកម្ពុជា សូមស្នើសុំកិច្ចសហការ ពីគ្រប់ភាគីពាក់ព័ន្ធ ក្នុងការបន្តចូលរួមសហការ ក៏ដូចជាផ្តល់មតិយោបល់កែលម្អ ជំរុញឱ្យយើងអាចសម្រេចបាននូវវគ្គបណ្តុះបណ្តាលបច្ចេកទេសស្តីពីវិធីសាស្រ្តថែទាំផ្លូវ-ថ្នល់ ដ៏សំខាន់ សម្រាប់ប្រទេសកម្ពុជា ឡាវ និងវៀតណាម ក្នុងពេលឆាប់ៗខាងមុខ។ មុននឹង បញ្ចប់ តាងនាមក្រុមការងារ នៃវិទ្យាស្ថានតេជោសែន សាធារណការ និងដឹកជញ្ជូន ឯកឧត្តមសូមសំដែងការដឹងគុណ និងថ្លែងអំណរគុណដល់មូលនិធិក្នុងក្របខណ្ឌកិច្ចសហប្រតិបត្តិការមេគង្គ-កូរ៉េ (MKCF) និងវិទ្យាស្ថានមេគង្គ (Mekong Institute) ដែលបានផ្តល់ឱកាសក្នុងការពិនិត្យ និងការវាយតម្លៃប្រកបដោយសុក្រឹត្យភាព និងបានជ្រើសរើសគម្រោងស្នើសុំរបស់វិទ្យាស្ថានតេជោសែន សាធារណការ និងដឹកជញ្ជូន នេះឡើង។ នៅក្នុងឱកាសនេះដែរ ឯកឧត្តម សង្ឃឹមយ៉ាងមុតមាំថា តាមរយៈកិច្ចសហប្រតិបត្តិការនេះ ប្រព័ន្ធថែទាំផ្លូវថ្នល់ នៅប្រទេសកម្ពុជា ប្រទេសវៀតណាម និងប្រទេសឡាវ នឹងធានាបាននូវគុណភាព នឹងបម្រើដល់ការប្រើប្រាស់ផ្លូវថ្នល់ ប្រកបដោយចីរភាព៕