ភ្នំពេញ៖ ក្រុងបាត់ដំបង បានទទួលគម្រោងរបស់ ក្រសួងសាធារណការ និងដឹកជញ្ជូន លើគម្រោងស្ដារប្រឡាយមេកំពង់សីមា ប្រវែង ៥,០០០​ ម៉ែត្រ និងស្ថាបនាលូប្រអប់ កម្ពស់ ២ ម៉ែត្រ ទទឹង ២ ម៉ែត្រ ចំនួន ១៥ កន្លែង សម្រាប់ធ្វើការរំដោះទឹកលិច ក្រុងបាត់ដំបង ប៉ែកខាងលិចស្ទឹង ដែលប្រឡាយមេ១ខ្សែ នេះ ឆ្លងកាត់សង្កាត់ចំនួន៦គឺ សង្កាត់ទួលតាឯក សង្កាត់ចំការសំរោង សង្កាត់ស្លាកែត សង្កាត់អូរម៉ាល់ សង្កាត់វត្តគរ និងសង្កាត់អូរចារ។ ក្នុងដំណាក់កាល នៃការអនុវត្តគម្រោងស្ដារប្រឡាយមេរំដោះទឹកលិចនេះ ក៏បានជួប ប្រឈមនឹងបញ្ហាមួយចំនួនពាក់ព័ន្ធទៅនឹង​បញ្ហា​សំណង់របស់ប្រជាពលរដ្ឋ ដែលកំពុងរំលោភលើដីចំណីប្រឡាយ ដោយប្រជាពលរដ្ឋមួយចំនួន បានធ្វើសំណង់ផ្ទះ ពីលើប្រឡាយ និងមួយចំនួន ចាក់ដីបំពេញបិទប្រឡាយតែម្ដង ដែលក្រុមការងារ ទាមទារឱ្យមានការរុះរើ ចំពោះសំណង់ដែលមិនមានរបៀបរៀបរយ សំណង់លើខ្នង​ប្រឡាយ និងសំណូមពរឱ្យប្រជាពលរដ្ឋ ធ្វើស្ពាន ឬដាក់លូ ទៅតាមទំហំ និងលំហូរ តាមបច្ចេកទេស របស់ក្រុមការងារ។ ពាក់ព័ន្ធបញ្ហានេះ លោក រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងលោក​សុខ លូ អភិបាល នៃគណៈអភិបាល​ខេត្តបាត់ដំបង ព្រមទាំងក្រុមការងារ កាលពីដើមសប្តាហ៍នេះ ​បានជួបពិភាក្សាគ្នា ពិនិត្យលើកិច្ចសហការ និងវឌ្ឍនភាព ការងារពន្លឿន​ដោះស្រាយផលប៉ះពាល់​គម្រោងជីកស្ដារប្រឡាយកំពង់សីមា។ លោករដ្ឋលេខាធិការ បានស្នើដល់រដ្ឋបាលខេត្តបាត់ដំបង សូមជួយធ្វើយ៉ាងណា សម្របសម្រួលការងារផលប៉ះពាល់ ក្នុងការជីកស្តារប្រឡាយនេះ ឱ្យដំណើរការរលូន និងតាមផែនការ ដែលបានគ្រោងទុក។ តបតាមសំណូមពររបស់លោករដ្ឋលេខាធិការ លោក សុខ លូ អភិបាលខេត្តបាត់ដំបង ក៏បានមានប្រសាសន៍ណែនាំ ដល់រដ្ឋបាលក្រុងបាត់ដំបង និងចៅសង្កាត់ដែលពាក់ព័ន្ធ ទាំងអស់ ត្រូវធ្វើការដោះស្រាយជាបន្ទាន់ ចំពោះប្រជាពលរដ្ឋណា ដែលបានសាងសង់ សំណង់​លើខ្នងប្រឡាយ ឬរំលោភលើចំណីប្រឡាយទាំងនោះ និងត្រូវធ្វើការរុះរើ ជាបន្ទាន់ ដើម្បីពន្លឿនដល់ការស្ដារប្រឡាយ​កំពង់សីមា ឱ្យមានភាពរលូន៕