[ENN] - ក្រសួងសាធារណៈការ៖ គម្រោងហេដ្ឋារចនាសម្ព័ន្ធធំៗនៅតែបន្តធ្វើក្រោមការដឹកនាំរបស់រាជរដ្ឋាភិបាលថ្មី
2023-08-11
ទៅកាន់ទំព័រចុះផ្សាយក្នុង ENN
ភ្នំពេញ : ក្រោមការដឹកនាំរបស់រាជរដ្ឋាភិបាលអាណត្តថ្មី ត្រូវបានគេរំពឹងថានឹងកាន់តែមានភាពល្អប្រសើរជាងមុន ដោយសារតែថ្នាក់ដឹកនាំសុទ្ធសឹងតែជាមនុស្សពេញកម្លាំង ព្រមទាំងមានចំណេះដឹងជ្រៅជ្រះក្នុងការបន្តវេនដឹកនាំប្រទេស។
ដោយឡែក សម្រាប់វិស័យដឹកជញ្ជូនដែលបានដាក់ចេញនូវគម្រោងធំៗជាច្រើនកាលពីពេលកន្លងទៅ ក៏នឹងត្រូវបន្តធ្វើបើទោះជាស្ថិតក្រោមថ្នាក់ដឹកនាំអាណត្តថ្មីក៏ដោយ។
ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ បានអះអាងក្នុងឱកាសពិនិត្យស្ថានភាពផ្លូវវាងកំណាត់ផ្លូវជាតិលេខ ៧៦ កាលពីពេលថ្មីៗនេះថា គម្រោងព្រែកជីកហ្វូណនតេជោ និងផ្លូវល្បឿនលឿន ភ្នំពេញ-សៀមរាប ផ្លូវល្បឿនលឿនសៀមរាប-ប៉ោយប៉ែត នឹងនៅតែបន្តសម្រាប់រាជរដ្ឋាភិបាលអាណត្តិថ្មី ព្រោះគម្រោងដ៏មានសារៈសំខាន់នេះបម្រើឱ្យផលប្រយោជន៍ជាតិទាំងមូលមិនបម្រើឱ្យបុគ្គលនោះទេ។
ឯកឧត្តម ស៊ុន ចាន់ថុល បានបន្តគូសបញ្ជាក់ទៀតថា គម្រោងទាំងនេះនៅតែដំណើរការទៅមុខដដែល ទោះបីជាមានការផ្លាស់ប្តូររាជរដ្ឋាភិបាលថ្មីក៏ដោយ ហើយគម្រោងនេះក៏បានអនុម័តរួចរាល់ផងដែរ ដោយរាជរដ្ឋាភិបាលអាណត្តិទី ៦ កាលពីឧសភា ឆ្នាំ ២០២៣ កន្លងមក។
ម្យ៉ាងទៀត គម្រោងទាំងនេះគឺមានសារៈសំខាន់ណាស់សម្រាប់ប្រទេសជាតិទាំងមូល ដូច្នេះឯកឧត្តម ជឿជាក់ថា រាជរដ្ឋាភិបាលអាណត្តិទី៧ នឹងជំរុញការងារនេះឱ្យបានទៅមុខទៀត។ មិនត្រឹមតែប៉ុណ្ណោះ គម្រោងធំៗផ្សេងទៀតក៏នឹងនៅតែដំណើរការទៅមុខទៀត ដោយសារវាមិនមែនជាគម្រោងបុគ្គល តែជាគម្រោងរបស់រាជរដ្ឋាភិបាលកម្ពុជា។
គួរបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-សៀមរាប និងសៀមរាប-ប៉ោយប៉ែត ដែលមានប្រវែង ៤០០ គីឡូម៉ែត្រវិញ បានឈានដល់ការចុះកិច្ចព្រមព្រៀងក្របខ័ណ្ឌរវាងក្រសួងសាធារណការ និងដឹកជញ្ជូនជាមួយក្រុមហ៊ុនសាងសង់កាលពីខែមិថុនាកន្លងទៅ ដោយគ្រោងចំណាយថវិកាប្រមាណ ៤ ពាន់លានដុល្លារ។
រីឯគម្រោងព្រែកជីកហ្វូណនវិញ ក៏ត្រូវបានរាជរដ្ឋាភិបាលសម្រេចបង្កើតគណៈកម្មការអន្តរក្រសួង កាលពីថ្ងៃទី ៧ ខែមិថុនា ឆ្នាំ ២០២៣ ក្នុងការពិនិត្យ ផ្តល់យោបល់អំពីនីតិវិធីក្របខ័ណ្ឌគតិយុត្ត និងវាយតម្លៃប្រសិទ្ធភាពសេដ្ឋកិច្ចដើម្បីពន្លឿនការអភិវឌ្ឍវិស័យដឹកជញ្ជូនតាមផ្លូវទឹក និងផ្លូវសមុទ្ររបស់កម្ពុជាឱ្យកាន់តែមានប្រសិទ្ធភាពផងដែរ៕
