កិច្ចប្រជុំពិភាក្សាការពារគម្រោងថវិកាកម្រិតបច្ចេកទេសលើគម្រោងផែនការចំណូល-ចំណាយថវិកាឆ្នាំ ២០២៤ របស់ក្រសួងសាធារណការ និងដឹកជញ្ជូន ក្នុងគោលដៅ ឆ្លុះបញ្ចាំងពីទិដ្ឋភាពនៃការគ្រប់គ្រងការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព ថ្ងៃសុក្រ ៣រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែសីហា ឆ្នាំ ២០២៣ ឯកឧត្ដម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុប្រធានប្រតិភូតំណាងក្រសួងសាធារណការ និងដឹកជញ្ជូន និងលោកជំទាវ ឈុន ដាលីន អគ្គនាយករងនៃអគ្គនាយកដ្ឋានថវិកា និងជាប្រធានប្រតិភូតំណាងក្រសួងសេដ្ឋកិច្ច និងហិរញ្ញវត្ថុ បានធ្វើជាសហប្រធានដឹកនាំកិច្ចប្រជុំអន្តរក្រសួងពិភាក្សាកម្រិតបច្ចេកទេសថវិកាសម្រាប់ឆ្នាំ២០២៤ ដោយមានការចូលរួមដោយផ្ទាល់នៅទីស្ដីការក្រសួងសេដ្ឋកិច្ច និងហិរញ្ញវត្ថុ។ កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងពិភាក្សាលើគម្រោងចំណូល-ចំណាយថវិកាសម្រាប់ឆ្នាំ២០២៤ របស់ក្រសួងសាធារណការ និងដឹកជញ្ជូន ដើម្បីឆ្លុះបញ្ចាំងពីទិដ្ឋភាពនៃការគ្រប់គ្រងការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព។ ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានលើកឡើងថា៖ ដើម្បីចូលរួមជាមួយរាជរដ្ឋាភិបាលក្នុងការប្រើប្រាស់ថវិកាជាតិឱ្យកាន់តែមានប្រសិទ្ធភាព ឆ្លើយតបនឹងកំណើន និងការងើបឡើងវិញសេដ្ឋកិច្ច ក្រុមការងារបានគិតគូរយ៉ាងហ្មត់ចត់ និងច្បាស់លាស់អំពីការជ្រើសរើសសកម្មភាពអាទិភាពដាក់បញ្ចូលក្នុងទិសដៅការងារអនុវត្តសម្រាប់ឆ្នាំ២០២៤ ដោយបានរៀបចំផែនការយុទ្ធសាស្ត្រថវិកាប្រចាំឆ្នាំ(BSP) គម្រោងផែនការថវិកា(BP) និងកិច្ចការពាក់ព័ន្ធនឹងថវិកា ស្របតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ សារាចរណែនាំ និងចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា ដើម្បីធ្វើជាមូលដ្ឋានដាក់បញ្ចូលក្នុងកិច្ចប្រជុំពិភាក្សាកម្រិតបច្ចេកទេសថវិកាសម្រាប់ឆ្នាំ២០២៤នេះ និងសម្រាប់កិច្ចប្រជុំកម្រិតថ្នាក់ដឹកនាំ នាពេលបន្ទាប់ខាងមុខ។ ជារួម ប្រធានប្រតិភូតំណាងក្រុមការងារបច្ចេកទេសថវិកានៃក្រសួងទាំងពីរ បានពិភាក្សាគ្នាប្រកបដោយស្មារតីយោគយល់ ទទួលខុសត្រូវខ្ពស់ និងប្រកបដោយផ្លែផ្កាលើការងារគ្រោងប្រមូលចំណូល និងការស្នើសុំគម្រោងចំណាយថវិកាឆ្នាំ២០២៤ ទៅតាមជំពូក កម្មវិធី អនុកម្មវិធី គណនី អនុគណនី ដោយបានឯកភាពរួមគ្នាដាក់ស្នើជូនថ្នាក់ដឹកនាំនៃក្រសួងទាំងពីរ ដើម្បីជាមូលដ្ឋានក្នុងការពិនិត្យ និងសម្រេចនៅក្នុងកិច្ចប្រជុំកម្រិតថ្នាក់ដឹកនាំបន្តទៀត៕