(មណ្ឌលគិរី)៖ ភ្លៀងធ្លាក់ខ្លាំងជាប់គ្នាផ្ទួនៗ បណ្តាលឱ្យទឹកហូរ កាត់ផ្តាច់ផ្លូវជាតិលេខ៧៦ ស្ថិតក្នុងស្រុកអូររាំង ខេត្តមណ្ឌលគិរី។ ជាហេតុនាំឱ្យ អាជ្ញាធរចុះបិទផ្លូវ១ខ្សែនេះ ជាបណ្ដោះអាសន្ន ព្រោះខ្លាចបងប្អូន ធ្វើដំណើរឆ្លងកាត់ទាំងប្រថុយប្រថាន ជួបគ្រោះថ្នាក់ជាយថាហេតុ..!។ ជាក់ស្ដែងៈ តាំងពីយប់ទី០១ ដល់ព្រឹកទី០២ខែសីហានេះ កម្លាំងអាជ្ញាធរបានចុះជួយអន្តរាគមន៍ ធ្វើការបញ្ជៀសចរាចរណ៍..!។ ដល់អ្នកធ្វើដំណើរ ពីខេត្តផ្សេងៗទៅកាន់ខេត្តមណ្ឌលគិរី ព្រោះផ្លូវជាតិលេខ៧៦ ទឹកបានហូរកាត់ផ្តាច់ទាំងស្រុង កាលពីយប់ទី០១.០៨.២០២៣ ពោលគឺរថយន្តតូចធំឬម៉ូតូ មិនអាចឆ្លងបានឡើយ!។ ក្នុងនោះមន្ត្រីក៏បានប្រកាសថា បើបងប្អូនចង់ធ្វើដំណើរចេញពីខេត្តមណ្ឌលគិរី ត្រូវទៅតាមផ្លូវស្រុកកោះញែក សំដៅខេត្តរតនគិរី-ខេត្តស្ទឹងត្រែង និងខេត្តក្រចេះឆ្ពោះទៅភ្នំពេញ ឬពីភ្នំពេញ ចូលខេត្តមណ្ឌលគិរី តាមផ្លូវខាងលើ។ ប្រភពដដែលបញ្ជាក់ថា៖ កាលពីយប់ថ្ងៃទី១ ខែសីហា ភ្លៀងបានធ្លាក់ខ្លាំងធ្វើឱ្យទឹកហូរកាត់ផ្តាច់ផ្លូវលេខ៧៦ អស់ទាំងស្រុងស្ថិតក្នុងស្រុកអូររាំង។ នៅថ្ងៃទី២ ខែសីហាឆ្នាំ២០២៣ ផ្លូវនេះមិនអាចធ្វើដំណើរបានឡើយត្រូវអាជ្ញាធរឱ្យផ្អាកជាបណ្ដោះអាសន្ន រង់ចាំខាងសាធារណការនិងដឹកជញ្ជូនមកជួសជុលរួចរាល់ ទើបផ្ដល់ដំណឹងតាមក្រោយ៕