ដើម្បីការពារតួផ្លូវកុំឱ្យរងការខូចខាតធ្ងន់ធ្ងរ មន្ទីរសាធារណការ និងដឹកជញ្ជូន ខេត្តកែប បានប្រកាសប្រាប់លោក-លោកស្រីជាប្រធានក្រុមហ៊ុន ម្ចាស់យានយន្តដឹកជញ្ជូនធុនធ្ងន់គ្រប់ប្រភេទ ដែលធ្វើអាជីវកម្មដឹកជញ្ជូនឆ្លងកាត់ផ្លូវជាតិលេខ ៣៣អា ចាប់ពីចំណុចរង្វង់មូលសេះស កាត់តាមឆ្នេរលេងទឹក រហូតដល់ផ្សារដំណាក់ចង្អើរថា ផ្លូវជាតិលេខ៣៣អា ត្រូវបានផ្អាកចរាចរណ៍បណ្តោះអាសន្នចំពោះរថយន្តធុនធ្ងន់គ្រប់ប្រភេទ ចាប់ថ្ងៃទី៣០ ខែកក្កដានេះរហូតដល់អាកាសធាតុមានសភាពល្អប្រសើរឡើងវិញ។ ដោយឡែក សម្រាប់រថយន្តគ្រួសារ ត្រូវធ្វើចរាចរណ៍ដោយគោរពទៅតាមផ្លាកសញ្ញាចរាចរណ៍បង្ហាញទិសដៅ។ នេះបើតាមសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តកែប ចុះនៅថ្ងៃទី៣០ ខែកក្កដា ឆ្នាំ២០២៣។ មន្ទីរសាធារណការ និងដឹកជញ្ជូនខេត្តកែប បានបញ្ជាក់ថា រយៈពេលប៉ុន្មានថ្ងៃកន្លងមកនេះ នៅក្នុងភូមិសាស្រ្តខេត្តកែប បានទទួលរងឥទ្ធិពលភ្លៀងធ្លាក់ខ្លាំង ជោគជាំជាបន្តបន្ទាប់ធ្វើឱ្យផ្លូវជាតិ និងផ្លូវខេត្តមួយចំនួនត្រូវរងនូវជំនន់ទឹកភ្លៀងហូរកាត់ និងជនលិចដោយកន្លែង។ ដោយឡែកនៅតាមបណ្តោយផ្លូវជាតិលេខ ៣៣អា ចាប់ពីរង្វង់មូលសេះស កាត់តាមឆ្នេរលេងទឹក រហូតដល់ផ្សារដំណាក់ចង្អើរ មានករណីជំនន់ទឹកភ្លៀងលិចលង់ហូរឆ្លងកាត់កំណាត់ផ្លូវជាតិនេះស្ទើរតែទាំងស្រុង៕