កណ្តាល ៖ លោកជំទាវ ហ៊ុន កុសនី អភិបាលរងខេត្តកណ្ដាល បានមានប្រសាសន៍ថា ផ្លូវបេតុងដែលត្រូវបើកការដ្ឋានជួសជុលនេះ គឺជាសមិទ្ធផលថ្មីបន្ថែមទៀតដែលកើតចេញក្រោមម្លប់ដ៏ត្រជាក់នៃសុខសន្តិភាព និងក្រោមការដឹកនាំដ៏ ឈ្លាសវៃនិងប៉ិនប្រសប់ ប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាអគ្គមហារដ្ឋបុរស បានដាក់ចេញនូវគោលនយោបាយយុទ្ធសាស្ត្រ ដើម្បីលើកកម្ពស់ជីវភាពរស់នៅជូនប្រជាពលរដ្ឋ មានផ្លូវ មានស្ពាន មានក្តីសង្ឃឹម និងមានការអភិវឌ្ឍលើគ្រប់វិស័យ។ ការថ្លែងខាងលើធ្វើឡើងក្នុងពេលដែលលោកជំទាវ អញ្ជើញបើកការដ្ឋានជួសជុល ផ្លូវបេតុង១ខ្សែប្រវែងប្រវែង ១០០០ម៉ែត្រ ទទឹង៥ម៉ែត្រ កម្រាស់ ០.១៥ម៉ែត្រ នៅភូមិរទាំង និងភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល នៅថ្ងៃទី០៧ ខែកក្កដា ឆ្នាំ២០២៣នេះ។ លោកជំទាវ ហ៊ុន កុសនី បានបនុ្តថា ដូច្នេះពីពេលនេះតទៅមុខយើងទាំងអស់គ្នា ប្តេជ្ញាចិត្តនិងជំហររឹងមាំឥតងាករេ ទោះក្នុងកាលៈទេសៈនិងទោះក្នុងតម្លៃណាក៏ដោយ យើងត្រូវការពារសន្តិភាព ដើម្បីឱ្យកម្ពុជាក្លាយជាប្រជាជាតិមានភាពសម្បូរសប្បាយ មានភាពរឹងមាំនៃខឿនការពារជាតិ និងសន្តិសុខជាតិ និងដើម្បីឱ្យកម្ពុជាមានភាពធននៃខឿនសេដ្ឋកិច្ច និងពោរពេញដោយឱកាសនៃការរីកចម្រើន។ លោកជំទាវបញ្ជាក់ដែរថា ការជួសជុលផ្លូវបេតុងអាមេប្រវែង ១០០០ម៉ែត្រ ទទឹង៥ម៉ែត្រ កម្រាស់ ០.១៥ម៉ែត្រ នៅភូមិរទាំង និងភូមិរទាំងត្បូង ឃុំភូមិធំ ស្រុកកៀនស្វាយ ខេត្តកណ្តាល នាពេលនេះ គឺជាសមិទ្ធផលដ៏ធំធេងថ្មីបន្ថែមទៀត បន្ទាប់ពីសមិទ្ធផលនានាជាច្រើនទៀត របស់ស្រុកអង្គស្នួល ក្នុងវិស័យសេដ្ឋកិច្ច-សង្គម ប្រកបដោយ សោភ័ណ្ឌភាព ផាសុខភាព សមធម៌ និងបរិយាប័ន្ន។ ហើយផ្លូវបេតុងនេះ នឹងផ្ដល់នូវភាពងាយស្រួលដល់ប្រជាពលរដ្ឋ ក្នុងការធ្វើដំណើរនិងការដឹកជញ្ជូនទំនិញទៅកាន់ទីផ្សារ ព្រមទាំងបានចូលរួមចំណែកយ៉ាងធំធេងក្នុងការសម្រួលការ លំបាក និងជួយប្រជាពលរដ្ឋឱ្យមានជីវភាពកាន់តែប្រសើរឡើងជាលំដាប់។