[Phnom Penh Post] - ជប៉ុនផ្ដល់កម្ចីជាង ១៨០ លានដុល្លារដល់កម្ពុជា សម្រាប់តភ្ជាប់ផ្លូវថ្នល់ និងផ្គត់ផ្គង់ទឹក
2023-06-21
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ ជប៉ុនបានផ្តល់ប្រាក់កម្ចីចំនួនជាង ១៨០ លានដុល្លារអាមេរិកដល់កម្ពុជា សម្រាប់គម្រោងកែលម្អការតភ្ជាប់ផ្លូវជនបទ និងគម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាបដំណាក់កាលទី៣។
លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក Ueno Atsushi ឯកអគ្គរាជទូតជប៉ុនប្រចាំកម្ពុជា បានចុះហត្ថលេខារួមគ្នាលើកិច្ចព្រមព្រៀងផ្តល់កម្ចី នៅថ្ងៃទី ២០ ខែមិថុនា ឆ្នាំ ២០២៣ នៅរាជធានីភ្នំពេញ។
លោក Ueno Atsushi ថ្លែងក្នុងពិធីចុះហត្ថលេខានេះថា សម្រាប់គម្រោងកែលម្អការតភ្ជាប់ផ្លូវជនបទមានទឹកប្រាក់ចំនួន ១៧២ លានដុល្លារអាមេរិក។ គម្រោងនេះនឹងកែលម្អផ្លូវនៅមូលដ្ឋាន រួមមានស្ពាន និងប្រព័ន្ធលូសម្រាប់ផ្លូវជនបទតាមបណ្តោយផ្លូវជាតិលេខ ៥ ដែលតភ្ជាប់ពីភ្នំពេញទៅកាន់តំបន់ព្រំដែនជាប់ប្រទេសថៃ។
លោកថ្លែងថា៖ «គម្រោងនេះមានគោលបំណងពង្រឹងការតភ្ជាប់ផ្លូវនៅជនបទ ធ្វើឱ្យប្រសើរឡើងនូវលទ្ធភាពទទួលបានសកម្មភាពសេដ្ឋកិច្ចសង្គមរបស់ប្រជាជន ដោះស្រាយការប្រែប្រួលអាកាសធាតុ និងរួមចំណែកដល់ការអភិវឌ្ឍសេដ្ឋកិច្ចសង្គមនៅជនបទប្រកបដោយស្ថិរភាព»។
លោក Ueno Atsushi ថ្លែងថា សម្រាប់គម្រោងពង្រីកសមត្ថភាពផ្គត់ផ្គង់ទឹកនៅខេត្តសៀមរាប ដំណាក់កាលទី ៣ មានទឹកប្រាក់ ១៥ លានដុល្លារអាមេរិក។ គម្រោងនេះនឹងពង្រីកប្រព័ន្ធផ្គត់ផ្គង់ទឹកក្នុងខេត្តសៀមរាប ដើម្បីបង្កើនសមត្ថភាពផលិតទឹកស្អាត ៦ ម៉ឺនម៉ែត្រគុបក្នុង ១ ថ្ងៃ។ គម្រោងនេះនឹងធ្វើឡើងតាមរយៈការសាងសង់សំណង់គ្រប់គ្រងទឹកនៅបឹងទន្លេសាប សាងសង់រោងចក្រប្រព្រឹត្តិកម្មទឹក និងដំឡើងបំពង់បញ្ជូន និងចែកចាយទឹកប្រវែង ២១៧ គីឡូម៉ែត្រ។ ធនធានមនុស្សក៏នឹងត្រូវបានអភិវឌ្ឍផងដែរ ដើម្បីឱ្យប្រតិបត្តិការ និងការថែទាំប្រព័ន្ធផ្គត់ផ្គង់ទឹកអាចត្រូវបានអនុវត្តដោយរដ្ឋាករទឹកស្វយ័តសៀមរាប។
លោក Ueno Atsushi បញ្ជាក់ថា៖ «ខ្ញុំជឿជាក់ថា គម្រោងទាំងនេះនឹងធ្វើឱ្យជីវភាពរស់នៅរបស់ប្រជាជនកម្ពុជាកាន់តែប្រសើរឡើង និងជួយដល់កំណើនសេដ្ឋកិច្ចរបស់កម្ពុជា។ ខ្ញុំសង្ឃឹមយ៉ាងមុតមាំថា គម្រោងនេះក៏នឹងពង្រឹងបន្ថែមទៀតនូវទំនាក់ទំនងមិត្តភាពរវាងប្រទេសជប៉ុន និងព្រះរាជាណាចក្រកម្ពុជា»។
ឆ្នាំនេះ គឺជាខួបលើកទី៧០ នៃការបង្កើតទំនាក់ទំនងការទូតរវាងប្រទេសជប៉ុន និងកម្ពុជា ហើយថ្មីៗនេះទំនាក់ទំនងទ្វេភាគីរវាងប្រទេសទាំង ២ ត្រូវបានដំឡើងកម្រិតទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។
លោកថ្លែងថា៖ «ជាមួយនឹងទំនាក់ទំនងទ្វេភាគីដែលមានស្រាប់របស់យើង ជប៉ុន និងកម្ពុជាបានសហការគ្នាដោយជោគជ័យលើវិស័យជាច្រើន។ ក្នុងឆ្នាំដ៏គួរឱ្យចងចាំនេះ និងឆ្នាំបន្តបន្ទាប់ទៀត ខ្ញុំនឹងពង្រឹងបន្ថែមទៀតនូវទំនាក់ទំនងទ្វេភាគីក្រោមកិច្ចសហប្រតិបត្តិការជិតស្និទ្ធជាមួយឯកឧត្តម ប្រាក់ សុខុន»។
យោងតាមសេចក្តីប្រកាសព័ត៌មានក្រសួងការបរទេសកម្ពុជា កាលពីថ្ងៃទី ១៨ ខែមិថុនា ឱ្យដឹងថា៖ «ការផ្តល់ជំនួយខាងលើ បញ្ជាក់ពីការប្តេជ្ញាចិត្តឥតងាករេរបស់ជប៉ុនក្នុងការគាំទ្រដល់កិច្ចខិតខំប្រឹងប្រែងជាបន្តបន្ទាប់របស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសង្គមសេដ្ឋកិច្ច»។
សេចក្តីប្រកាសព័ត៌មាននេះថា ការគាំទ្រនេះ ក៏នឹងរួមចំណែកផងដែរ ដល់ការពង្រឹងទំនាក់ទំនងយូរអង្វែង និងកិច្ចសហប្រតិបត្តិការ ដ៏ជិតស្និទ្ធរវាងប្រទេសទាំង ២ ដែលនាពេលថ្មីៗនេះបានដំឡើងទំនាក់ទំនងទ្វេភាគី ទៅជាកម្រិត «ភាពជាដៃគូយុទ្ធសាស្ត្រគ្រប់ជ្រុងជ្រោយ» ខណៈពេលដែលប្រទេសទាំង ២ កំពុងប្រារព្ធខួបលើកទី៧០ ឆ្នាំ នៃទំនាក់ទំនងការទូត៕
