(ភ្នំពេញ)៖ បន្ទាប់ពីផ្លូវល្បឿនលឿនទី២ បានបើកការដ្ឋានសាងសង់ ហើយផ្លូវល្បឿនលឿនទី៣ ត្រូវបានប្រកាសថា​​​នឹងបើកការដ្ឋាននៅក្រោយនោះ ផ្លូវល្បឿនលឿនទី៤ ត្រូវបានបង្ហើបថា អាចនឹងបាញ់មុខព្រួញ​​​ទៅកាន់តំបន់​​​ភូមិ​​​ភាគឦសាន។ នេះគឺជាការបញ្ជាក់របស់ រដ្ឋមន្ត្រីក្រសួងសាធារណការនិងដឹកជញ្ជូន ឯកឧត្តម ស៊ុន ចាន់ថុល នៅក្នុងពិធីចុះហត្ថលេខាលើកិច្ចព្រមព្រៀងក្របខ័ណ្ឌ គម្រោងសាងសង់ផ្លូវល្បឿនលឿនភ្នំពេញ-សៀមរាប-ប៉ោយប៉ែត កាលពីរសៀលថ្ងៃទី០៧ ខែមិថុនា ឆ្នាំ២០២៣។ ការបង្ហើបពីលទ្ធភាពនៃគម្រោង​​​​ផ្លូវ​​​​​ល្បឿនលឿនទី ៤ របស់ ឯកឧត្តម ស៊ុន ចាន់ថុល គឺទៅកាន់ភូមិភាគឦសាននៃប្រទេសកម្ពុជា ដែលរួមមាន ខេត្តក្រចេះ មណ្ឌលគីរី រតនគិរី ស្ទឹងត្រែងនិងខេត្ត ព្រះវិហារ។ ជុំវិញការលើកឡើងពីគម្រោងស្ថាបនាផ្លូវល្បឿនលឿនទី ៤ ធ្វើឡើងក្រោយពីគម្រោងផ្លូវល្បឿនលឿនទី ៣ ភ្នំពេញ-ប៉ោយប៉ែត-សៀមរាប គ្រោងបើកការដ្ឋានសាងសង់នៅបំណាច់ឆ្នាំ២០២៤ បន្ទាប់ពីផ្លូវល្បឿនលឿនទី២ ភ្នំពេញ-បាវិត ទើបតែត្រូវបានសម្តេចតេជោ ហ៊ុន សែន បើកការដ្ឋានសាងសង់នាព្រឹកថ្ងៃទី៧ ខែមិថុនា ឆ្នាំ២០២៣។ សូមជម្រាបថា ផ្លូវល្បឿនលឿនទី១ នៅកម្ពុជា ភ្នំពេញ-ព្រះសីហនុ ត្រូវបានដាក់ឱ្យដំណើការកាលពីចុងឆ្នាំ២០២២ ក្នុងទំហំទឹកប្រាក់វិនិយោគជាង២ពាន់លានដុល្លារ។ ផ្លូវល្បឿនលឿនទី២ ភ្នំពេញ-បាវិត គ្រោងចំណាយថវិកាវិនិយោគសរុបប្រមាណ ១,៣៥ពាន់លានដុល្លារ។ ផ្លូវល្បឿនលឿនទី៣ ភ្នំពេញ-សៀមរាប-ប៉ោយប៉ែត គ្រោងនឹងចំណាយទឹកប្រាក់ ៤០០០លានដុល្លារ៕