ជំនួបពិភាក្សាការងារស្ដីពីវឌ្ឍនភាពនៃគម្រោងលើកកម្រិតបណ្ដាញផ្លូវថ្នល់ជំហាន១ និងជំហាន២ ជាមួយតំណាងបេសកកម្មរបស់ធនាគារអភិវឌ្ឍន៍អាស៊ី(ADB) ទីស្ដីការក្រសួង៖ ថ្ងៃចន្ទ ២រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៥ ខែមិថុនា ឆ្នាំ ២០២៣ ឯកឧត្ដម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន បានទទួលជួប ពិភាក្សាការងារជាមួយតំណាងបេសកកម្មរបស់ធនាគារអភិវឌ្ឍន៍អាស៊ី(ADB)ស្ដីពីគម្រោងលើកកម្រិត បណ្ដាញផ្លូវថ្នល់ជំហាន១ និងជំហាន២ ដោយមានការចូលរួមពីថ្នាក់ដឹកនាំក្រសួង តំណាងក្រសួង សេដ្ឋកិច្ច និងហិរញ្ញវត្ថុ និងអង្គភាពពាក់ព័ន្ធនៃគម្រោង។ ជំនួបនេះធ្វើឡើងក្នុងគោលបំណង ដើម្បីពិនិត្យ និងពិភាក្សាអំពីវឌ្ឍនភាពការងារគម្រោងលើកកម្រិត បណ្ដាញផ្លូវថ្នល់ជំហាន១ និងជំហាន២ និងសំណើការងារថ្មីសំដៅធ្វើឱ្យការដឹកនាំ គ្រប់គ្រង ចាត់ចែង គម្រោងប្រកបដោយប្រសិទ្ធភាពការងារខ្ពស់។ សូមបញ្ជាក់ថា៖ គម្រោងលើកកម្រិតបណ្ដាញផ្លូវថ្នល់ជំហាន១ នឹងត្រូវបូកសរុបលទ្ធផលការងារជាមួយអង្គភាពអនុវត្តគម្រោងនៅថ្ងៃទី៣០ ខែមិថុនា ឆ្នាំ២០២៣ ខាងមុខ ហើយបន្ទាប់មកនឹងចាប់ផ្ដើមគម្រោងលើកកម្រិតបណ្ដាញផ្លូវថ្នល់ជំហាន២បន្ថែមទៀត។ ដោយឡែក ក្រុមការងារបេសកកម្មធនាគារអភិវឌ្ឍន៍អាស៊ី (ADB) នឹងត្រូវធ្វើឡើងចាប់ពីថ្ងៃទី០៥ ខែ មិថុនា ឆ្នំា២០២៣ ដល់ថ្ងៃទី១៤ ខែមិថុនា ឆ្នំា២០២៣ ដើម្បីចុះពិនិត្យទីតាំងអាគារច្រកព្រំដែនជ្រៃធំ និងអគារច្រកព្រំដែនបន្ទាយចក្រី ផ្លូវជាតិលេខ៦ពីទីរួមខេត្តសៀមរាប-បន្ទាយមានជ័យ ពិភាក្សាពី ដំណាក់កាលដំបូងនៃគម្រោងលើកកម្រិតបណ្ដាញផ្លូវថ្នល់ជំហាន២ និងចុះពិនិត្យផ្លូវជាតិលេខ១ ពីអ្នកលឿងទៅបាវិតផងដែរ៕