[VAYO FM] - ដំណើរការជាង៧ខែ!ផ្លូវល្បឿនលឿនភ្នំពេញ-ព្រះសីហនុ រកចំណូលបានជិត២០លានដុល្លារ
2023-05-24
ទៅកាន់ទំព័រចុះផ្សាយក្នុង VAYO FM
រយៈពេលប្រមាណជាង៧ខែ រាប់ចាប់ពីថ្ងៃទី០១ ខែតុលា ឆ្នាំ២០២២ ដល់ថ្ងៃទី២៣ ខែមេសា ឆ្នាំ២០២៣ ផ្លូវល្បឿនលឿនភ្នំពេញ-ព្រះសីហនុមានយានយន្តធ្វើចរាចរប្រមាណ២លាន៦សែនគ្រឿង និងរកចំណូលសរុបជិត២០លានដុល្លារអាមេរិក។ នេះបើតាមការបញ្ជាក់របស់លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ថ្លែងប្រាប់វិទ្យុវាយោ នៅថ្ងៃទី២៤ ខែឧសភា ឆ្នាំ២០២៣នេះ។
ដោយឡែកសម្រាប់រយៈពេល៤ខែដើម ឆ្នាំ២០២៣នេះ ផ្លូវល្បឿនលឿនមានយានយន្តធ្វើចរាចរប្រមាណ១,៤៥០,០០០គ្រឿង និងរកចំណូលបានសរុបប្រមាណ១២លានដុល្លារអាមេរិក។ នេះបើតាមការបញ្ជាក់បន្ថែមរបស់អ្នកនាំពាក្យក្រសួងសាធារណការ និងដឹកជញ្ជូន។
ជាការកត់សម្គាល់ កំណើនយានយន្តដែលធ្វើចរាចរលើផ្លូវល្បឿនលឿនចាប់ផ្ដើមមានកំណើនជាបន្តបន្ទាប់ ជាពិសេសនៅអំឡុងពេលមានបុណ្យជាតិធំៗ និងនៅថ្ងៃចុងសប្ដាហ៍ ដែលប្រជាពលរដ្ឋសម្រុកធ្វើដំណើរទៅលេងកម្សាន្តនៅក្នុងខេត្តព្រះសីហនុ ឬខេត្តដែលពួកគេអាចធ្វើដំណើរដោយប្រើប្រាស់ផ្លូវល្បឿនលឿនបាន។ ជាក់ស្ដែងត្រឹមរយៈពេលមួយសប្ដាហ៍កន្លងទៅថ្មីៗនេះ ពោលចាប់ពីថ្ងៃទី១៥ ដល់ថ្ងៃទី២១ ខែឧសភា មានយានយន្តបានធ្វើដំណើរលើផ្លូវល្បឿនលឿនសរុបចំនួន៩៦,៧៦៨គ្រឿង។
ទន្ទឹមនឹងការកើនឡើងនៃចំនួនយានយន្តធ្វើចរាចរ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានអំពាវនាវដល់ប្រជាពលរដ្ឋដែលធ្វើដំណើរតាមផ្លូវល្បឿនលឿនទាំងអស់ឱ្យអនុវត្តតាមលក្ខខណ្ឌក្នុងការប្រើប្រាស់ផ្លូវនេះ និងស្នើឱ្យចូលរួមគោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន កុំឱ្យបើកបរលើសល្បឿនកំណត់ និងកុំបើកបរបញ្ច្រាសទិសចរាចរណ៍។
សូមជម្រាបថា ផ្លូវល្បឿនលឿនពីភ្នំពេញ-ព្រះសីហនុមានប្រវែងសរុប១៨៧,០៥គីឡូម៉ែត្រ ត្រូវបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ក្នុងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC)ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ដោយចំណាយការវិនិយោគប្រមាណ២ពាន់លានដុល្លារអាមេរិក និងហិរញ្ញប្បទានឥតសំណងពីរដ្ឋាភិបាលចិនប្រមាណ១៥០លានដុល្លារ។ ផ្លូវល្បឿនលឿនដំបូងបង្អស់នៅកម្ពុជានេះត្រូវបានដាក់ឱ្យដំណើរការដោយឥតគិតថ្លៃពេញមួយខែកាលពីខែកក្កដា ឆ្នាំ២០២២ និងប្រកាសដាក់ឱ្យដំណើរការជាផ្លូវការនៅថ្ងៃទី០១ ខែតុលា ឆ្នាំ២០២២៕
