ផ្លូវល្បឿនលឿន ភ្នំពេញ-បាវិត ១៣៥គម គ្រោងវិនិយោគ ១.៣៧៦លាន ខណៈស្ពានឆ្លងទន្លេមេគង្គ ភ្ជាប់ពីក្រវាត់ក្រុងទី៣ ទៅផ្លូវល្បឿនលឿន គ្រោងចំណាយថវិកាជាតិ ២៣៤លាន ដើម្បីសម្រួលការឆ្លងស្ពានជូនប្រជាពលរដ្ឋដោយឥតគិតថ្លៃ គម្រោងទាំង២នេះ នឹងបើកការដ្ឋាន នាថ្ងៃ៧ មិថុនា ឆ្នាំ២០២៣ ខាងមុខនេះ ក្រសួងសាធារណការ និងដឹកជញ្ជូន នៅព្រឹកថ្ងៃទី១៨ ខែឧសភានេះ បានចុះហត្ថលេខាជាមួយតំណាងក្រុមហ៊ុនសាជីវកម្មថ្នល់ និងស្ពានចិន(CRBC) ដើម្បីចាប់ផ្តើមដំណើរការសិក្សា និងសាងសង់ផ្លូវល្បឿនលឿន ភ្នំពេញ-បាវិត ចំងាយ១៣៥គីឡូម៉ែត្រ ដោយគ្រោងនឹងបើកការដ្ឋានជាផ្លូវការនៅថ្ងៃទី០៧ ខែមិថុនា ឆ្នាំ២០២៣។ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានប្រាប់អ្នកកាសែតថា ការសាងសង់ផ្លូវល្បឿនលឿនភ្នំពេញ-បាវិត នេះ មានសារៈសំខាន់ណាស់សម្រាប់ប្រទេសកម្ពុជា។ តាមលោករដ្ឋមន្ត្រី ផ្លូវល្បឿនលឿនភ្នំពេញ-បាវិត ជួយសម្រួលដល់ប្រទេសកម្ពុជានៅក្នុងវិស័យដឹកជញ្ជូន និងការធ្វើពាណិជ្ជកម្ម។ មិនតែប៉ុណ្ណោះផ្លូវល្បឿនលឿនថ្មីនេះ ក៏ជួយតភ្ជាប់ការដឹកជញ្ជូនទំនិញពីថៃ ទៅកាន់វៀតណាមផងដែរ។