សិក្ខាកាមប្រមាណ១០០រូប ចូលរួមសិក្ខាសាលាផ្សព្វផ្សាយឯកសារផែនការសកម្មភាពឆ្លើយតបនឹងការប្រែប្រួលអាកាសធាតុក្នុងវិស័យដឹកជញ្ជូន(CCAP 2020-2023) និងចែករំលែកចំណេះដឹងផ្នែកបរិស្ថានបៃតង(Green Environmental) ក្នុងវិស័យសាធារណការ និងដឹកជញ្ជូន សៀមរាប៖ ថ្ងៃចន្ទ ១១រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹង ថ្ងៃទី១៥ ខែឧសភា ឆ្នាំ២០២៣ ឯកឧត្តម ស៊ឹង សុគង់ អនុរដ្ឋលេខាធិការ ក្រសួងសាធារណៈការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយឯកសារផែនការសកម្មភាពឆ្លើយតបនឹងការប្រែប្រួលអាកាសធាតុក្នុងវិស័យដឹកជញ្ជូន(CCAP 2020-2023) និងចែករំលែកចំណេះដឹងផ្នែកបរិស្ថានក្នុងវិស័យសាធារណការ និងដឹកជញ្ជូន ដោយមានការចូលរួមមកពីអង្គភាពពាក់ព័ន្ធក្រោមឱវាទក្រសួង និងមន្ទីរសាធារណការ និងដឹកជញ្ជូនទូទាំង ២៥រាជធានី-ខេត្ត សរុបសិក្ខាកាម ប្រមាណ១០០ រូប។ សិក្ខាសាលានេះ ធ្វើឡើងក្នុងគោលបំណង ដើម្បីផ្សព្វផ្សាយ ចែករំលែក ក្នុងន័យលើកកម្ពស់ចំណេះដឹងពីបរិបទនៃការប្រែប្រួលធាតុអាកាស និងបញ្ជ្រាបឯកសារផែនការសកម្មភាពដែលឆ្លើយតបនឹងបម្រែបម្រួល អាកាសធាតុប៉ះពាល់ក្នុងវិស័យដឹកជញ្ជូន និងហេដ្ឋារចនាសម្ព័ន្ធផ្សេងៗទៀតក្នុងវិស័យដែលក្រសួងគ្របគ្រងអនុវត្ត ព្រមទាំងផ្តល់ជូនជាបទពិសោធន៍នៃការអនុវត្តភស្តុភារកម្មបៃតងអន្តរជាតិ រួមជាមួយនឹងគោលការណ៍ណែនាំស្តីបរិស្ថានក្នុងវិស័យសាធារណការនិងដឹកជញ្ជូន ។ ថ្លែងទៅកាន់អង្គពិធីនាឱកាសនោះ ឯកឧត្តមអនុរដ្ឋលេខាធិការ បានថ្លែងអំណរគុណដល់អគ្គនាយកដ្ឋានផែនការ និងគោលនយោបាយ មន្ត្រីជំនាញការរបស់ទីភ្នាក់ងារសហប្រតិបត្តិការអន្តរជាតិជប៉ុន(JICA) និងសិក្ខាកាមពាក់ព័ន្ធទាំងអស់ ដែលអញ្ជើញមកពីអង្គភាពក្រោមឱ្យវាទក្រសួង និងមន្ទីរសាធារណការ និងដឹកជញ្ចូនទូទាំងរាជធានី-ខេត្ត។ នេះជាការគូសបញ្ជាក់ពីកិច្ចខិតខំប្រឹងប្រែងរបស់ក្រសួងស្របពេលខិតខំអភិវឌ្ឍហេដ្ឋារចនាសម្ព័ន្ធដែលជាចក្ខុវិស័យសំខាន់ៗ ហើយក៏បានធ្វើឱ្យប្រសើឡើងនូវបរិស្ថានបៃតង ជាមួយការបញ្ជ្រាបឯកសារពាក់ព័ន្ធដល់សិក្ខាកាម សម្រាប់ជាការឆ្លើយតប ទប់ស្កាត់នឹងការប្រែប្រួលអាកាសធាតុ ទាំងសកម្មភាពបន្សាំ និងការកសាងសមត្ថភាព ក្នុងស្ថាប័ន ជួយលើកកម្ពស់ការយល់ដឹងអំពីការប្រឈមលើកត្តាបរិស្ថានក្នុងវិស័យដឹកជញ្ជូន ហើយបានរួមចំណែកផ្ដល់ចំណេះដឹង និងបទពិសោធន៍ថ្មីៗថែមទៀត។ គួរកត់សម្គាល់ផងដែរថា សិក្ខាសាលានេះបានបង្ហាញនូវការចូលរួមពិភាក្សា ផ្តល់មតិយោបល់យ៉ាងផុលផុស និងបញ្ជាក់យ៉ាងច្បាស់ ជាក់ស្តែង នូវការយល់ដឹងលើការអភិវឌ្ឍ និងការចូលរួមថែរក្សាបរិយាកាសឱ្យមានភាពត្រឹមត្រូវស្រស់បំព្រងដែលប្រកបដោយចំណេះដឹងចេះគាំពារផ្នែកបរិស្ថាន នៅពេលអនុវត្តគម្រោង ផែនការសកម្មភាពរបស់ក្រសួង និងមានភាពសមស្របតាមកម្មវិធីកែទម្រង់ស៊ីជម្រៅរបស់រាជរដ្ឋាភិបាលផងដែរ៕