ភ្លើងគប់កីឡាស៊ីហ្គេមបានមកដល់កម្ពុជាវិញហើយបន្ទាប់ពីដង្ហែរតាមប្រទេសអាស៊ាននានាអស់ជាង១ខែ --- ព្រះអគ្គិកីឡា ឬភ្លើងគប់កីឡា បានវិលមកដល់ប្រទេសកម្ពុជាវិញហើយនៅថ្ងៃព្រហស្បតិ៍នេះ បន្ទាប់ពីបានដង្ហែរចេញពីប្រទេសកម្ពុជាកាលពីចុងខែមីនាកន្លងទៅ ដើម្បីជាការចាប់ផ្តើមប្រារព្ធការប្រកួតកីឡាអាស៊ីអាគ្នេយ៍(ស៊ីហ្គេម)លើកទី៣២ ដែលកម្ពុជាធ្វើជាម្ចាស់ផ្ទះ។ ភ្លើងគប់នេះត្រូវបានដង្ហែរទៅកាន់ប្រទេសជាសមាជិកអាស៊ានទាំង១០ រួមទាំងទីម័រខាងកើត អស់រយៈពេលជាង១ខែ និងបានឆ្លងកាត់ចុងក្រោយគេពីប្រទេសឡាវចូលមកប្រទេសកម្ពុជាវិញត្រង់ចំណុចខេត្តស្ទឹងត្រែងប្រទេសកម្ពុជា។ ការដង្ហែរភ្លើងគប់នឹងបន្តធ្វើឡើងដោយកាត់តាមខេត្តមួយចំនួននៅក្នុងប្រទេសកម្ពុជារហូតដល់ពិធីបើកជាផ្លូវការកីឡាស៊ីហ្គេមលើកទី៣២ នៅថ្ងៃទី០៥ ខែឧសភា សប្តាហ៍ក្រោយ។