កិច្ចប្រជុំក្រុមការងារលើពង្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ដែលរៀបចំដោយក្រុមការងារបច្ចេកទេស P4I & Austroads ក្រោមជំនួយឥតសំណងពីរដ្ឋាភិបាល នៃប្រទេសអូស្រ្ដាលី ទីស្ដីការក្រសួង៖ ថ្ងៃសុក្រ ២កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២១ ខែមេសា ឆ្នាំ២០២៣ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមការងារលើពង្រាងបទដ្ឋានបច្ចេកទេសសម្រាប់ប្រើប្រាស់ក្នុងវិស័យហេដ្ឋារចនាសម្ព័ន្ធផ្លូវថ្នល់ ដែលរៀបចំដោយក្រុមការងារបច្ចេកទេស P4I & Austroads ក្រោមជំនួយឥតសំណងពីរដ្ឋាភិបាល នៃប្រទេសអូស្រ្ដាលី ដោយមានការចូលរួមពីថ្នាក់ដឹកនាំក្រសួង ឯកឧត្តមអនុរដ្ឋលេខាធិការ ឯកឧត្តមអគ្គនាយក នៃអគ្គនាយកដ្ឋានសាធារណការ អគ្គនាយកដ្ឋានបច្ចេកទេស ព្រមទាំងមន្ត្រីបច្ចេកទេសរបស់ក្រសួងជាច្រើនរូប។ កិច្ចប្រជុំនេះធ្វើឡើងក្នុងគោលបំណង ដើម្បីពិនិត្យពិភាក្សាទៅលើពង្រាងបទដ្ឋានបច្ចេកទេសផ្លូវថ្នល់ដែលរៀបចំដោយក្រុមការងារបច្ចេកទេស P4I & Austroads របស់ប្រទេសអូស្រ្តាលី និងដើម្បីអនុញ្ញាតឱ្យក្រុមការងារបច្ចេកទេស(Working Groups)ទាំងប្រាំរបស់ក្រសួង ទទួលភារកិច្ចពិនិត្យលើបទដ្ឋានបច្ចេកទេសនីមួយៗទៅតាមជំនាញឯកទេសរបស់ក្រុមនីមួយៗ ដើម្បីផ្ដល់ជាធាតុចូលសម្រាប់ជាជំនួយដល់ក្រុមការងារ P4I & Austroads ក្នុងការរៀបចំកែសម្រួលបទដ្ឋានបច្ចេកទេសផ្លូវថ្នល់ ឱ្យកាន់តែមានគុណភាព ប្រសិទ្ធភាព និងសមស្របតាមតម្រូវការស្ថានភាពបច្ចុប្បន្នរបស់ព្រះរាជាណាចក្រកម្ពុជា៕